Bepaine na Muchima Yense mu Mexico

KITUSANGAJIKA bingi pa kumona Bakamonyi bakyanyike bavula byo babena kupezhako bwikalo bwabo pa kuba’mba bengileko pakatampe mu mwingilo wa bwina Kilishitu. (Mat. 6:22) Ñanyi bintu byo bapimpulako mu bwikalo bwabo? Ñanyi mikiika yo bekala nayo? Pa kuba’mba tuyuke, twayai tumone byaubile bamo babena kwingijila mu Mexico.

“TWAPIMPWILEKO BINTU BIMO”

Dustin ne Jassa bafumine ku United States, besongwele mu January 2007. Byo papichiletu kimye kicheche, bapotele bwato bo bakebeshe bingi kuba’mba bakekalengamo. Bwato bwabo bebukashijile ku kitulu kiji ku bwipi na Astoria ku Oregon, U.S.A., taunyi wazhokolokwa na tutumbatumba tuji na bichi ne mitumba ya sino, pepitu na Kalunga ka Pacific. Dustin waambile’mba: “Konse ko watala, kuji bintu byawama bingi!” Bano bamulume ne mukazhi balangulukilenga’mba babena kwikala bwikalo bwapela, ne kuketekela mwi Yehoba. Balangulukilenga’mba, ‘Kabiji twikalatu mu kabwato kacheche kalepatu mamita kukila pa 7, kechi twatwela nkito ya kimye kyonse ne, tuya ku kipwilo kingijisha mulaka ungi, kabiji bimye bimo twingilako ne bupainiya bwa kukwasha.’ Pano byo papichile kimye, baishile kuyuka’mba bebepelengatu. Dustin waambile’mba: “Mu kifulo kya kukwasha kipwilo, twatayanga kimye kyabaya na kulungisha bwato bwetu. Twayukile kuba’mba twakebeshenga kubika Yehoba palutwe mu bwikalo bwetu, onkao mambo, twafwainwe kupimpula bwikalo bwetu.”

Jassa wanungilepo amba: “Saka nkyangye kusongolwa, naikalanga mu Mexico mo napwilanga ku kipwilo kya Kizungu. Naumvwanga bingi bulongo, kabiji nakebeshe bingi kubwela.” Pa kuba’mba bakoseshe mulanguluko wa kuya na kwingijila mu kyalo kingi, pa kimye kya kupopwela kwa kisemi, Dustin ne Jassa batendekele kutanga mashimikila aamba pa balongo ne banyenga bayile na kwingijila mu byalo bingi mo bakataine kuba’mba majimi afwainwa kunowa. (Yoa. 4:35) Dustin waambile’mba: “Ne atweba twakebelenga kwikala na lusekelo lo bajinga nalo.” Byo baumvwine kuba’mba balunda nabo bafumine ku Mexico balenga jibumba ja katataka jibena kukebewa bukwasho, Dustin ne Jassa bafuukwilepo bya kuba. Balekele nkito kabiji bapoteshe bwato bwabo ne kuvilukila ku Mexico.

“KINTU KYAWAMA KYABULA KWITUMWEKELAPO KALA”

Dustin ne Jassa baikele mu taunyi wa Tecomán, pano bino, uno taunyi naye wajingatu pepi na Kalunga ka Pacific palepele makilomita 4,345 kufuma ku bulenge bwa Astoria. Dustin waambile’mba: “Kuno kuntu kuji bingi kyuya kabiji kwavula bingi bichi bya mandema.” Kimye kyo bafikile, kechi bamwenepo nkito ne. Na mambo a kubula mali, bajangatu mupunga ne nkunde pa juba pa juba. Jassa waambile’mba: “Inge bya kuja byakatazha, bo twafunjishanga Baibolo betupanga mango, makondekonde, mapoopo ne mandema avula bingi.” Mu kuya kwa kimye, bano bamulume ne mukazhi batwelele nkito ya kufunjisha mulaka pa sukulu waikela mu Taiwan ufunjisha milaka kupichila mu kwingijisha Intaneti. Mali o bafola abena kwibakwasha mu bintu bikebewa pa juba pa juba.

Pano Dustin ne Jassa bomvwa byepi pa buno bwikalo? Baambile’mba: “Kwiya kuno ke kintu kyawama bingi kyabula kwitumwekelapo kala. Bulunda bwetu na Yehoba bwakoselako kabiji twitemwa bingi kukila ne byo kyajinga kala. Pa juba pa juba twingijila pamo bintu byavula bingi, nabiji kuya mu busapwishi, kwisamba bya kukwasha bo tufunjisha Baibolo ne kunengezha kupwila. Kabiji kechi twikala na bijikila byo twaikalanga nabyo kala ne.” Banungilepo amba: “Pano popo twayuka bukine bwa mulaye ye twabulanga kumvwisha utanwa pa Salamo 34:8, wa kuba’mba, ‘Mutompai, mumone byo awama aye Yehoba.’”

ÑANYI BINTU BYALENGELA BANTU BAVULA —KWIPANA KWINGILA UNO MWINGILO?

Balongo ne banyenga kukila pa 2,900 baji mu masongola ne babula mu masongola, bavula baji na myaka ya mu ma 20 ne ma 30, baya na kwingijila mu bibunji bya ku Mexico kubena kukebewa basapwishi ba Bufumu bavula. Mambo ka bano Bakamonyi bonse o bafuukwilapo kwingila uno mwingilo wakatazha? Jibumba jimo byo bejipwizhe buno bwipuzho, batongwele bintu bisatu bibalengela kuba bino. Ñanyi bintu byonkabyo?

Kutemwa Yehoba ne bakwetu. Leticia wabatizhiwe saka aji na myaka 18, waambile’mba: “Kimye kyo nepaine kwi Yehoba, nayukile kuba’mba nafwainwa kumwingijila na muchima wami yense ne na mweo wami yense. Pa kuba’mba mmweshe byo natemwa Yehoba, nakebeshe kwingijisha kimye ne ngovu yami mu mwingilo wanji.” (Mako 12:30) Hermilo wasongola Leticia wayile na kwingijila kwakebewenga basapwishi ba Bufumu bavula saka aji na myaka kukila pa 20. Waambile’mba: “Namwene kuba’mba kukwasha bantu kuyuka Lesa ke jishinda jawama bingi kumwesheshamo byo watemwa bakwenu.” (Mako 12:31) Kyo kyamulengejile kuvilukila mu taunyi mucheche kufuma mu muzhi mukatampe wa Monterrey muji bingi bunonshi mo aingilanga ku banki ne kwikala bwikalo bwa ntentente.

Kwikala na lusekelo lwa kine kabiji lwa myaka. Leticia byo abatizhiwetu wayile ku muzhi na bapainiya babanda na kusapwila pa ñondo umo. Uvuluka’mba: “Nakuminye bingi pa kumona bantu byo batambwijilenga mambo a Bufumu o twibasapwijilenga kabiji kino kyandetejile bingi lusekelo. Ñondo byo apwile, napwishishe mu muchima amba, ‘Abye byo byo nkeba kuba mu bwikalo bwami.’” Byo byo kyajinga ne kwi nyenga wabula kusongolwa aye Essly. Lusekelo lwajinga na balongo ne banyenga lo lwamulengejile kufuukulapo kutendeka uno mwingilo saka akijitu na myaka kukila pa 20. Byo akijinga ku sukulu wisambanga Bakamonyi bavula kabiji babambakana bingi bayile na kwingijila kwakebewenga basapwishi bavula. Waambile’mba, “Lusekelo lwajinga na bano balongo ne banyenga lo lwandengejile kukomoka bwikalo bwabo.” Banyenga bavula nabo bauba byonka byaubile Essly. Mu Mexico muji banyenga babula kusongolwa 680 babena kwingijila kubena kukebewa basapwishi bavula. Bano ke bakumwenako bakyanyike bakwabo ne bakulumpe pamo.

Kwikala bwikalo bwalumbuluka. Essly byo apwishishetu sukulu kuji bepaine kumupainako mali ku sukulu mukatampe. Bakwabo bamutundaikilenga kulondalonda bwikalo bo bamona’mba, “bwawama” bwa kwikala na bipepala bya ku sukulu mukatampe, kwikala na motoka ne kwikala na kimye kya kuya na kufwakasha. Bino aye kechi waswile byo baambilenga ne. Waambile’mba: “Balunda nami bena Kilishitu bavula byo byo baubilenga, kabiji namwene kuba’mba kechi batangizhengako kwingijila Lesa mu bwikalo bwabo ne. Namwene ne kuba’mba bwikalo bwabo bwibaletelangatu bijikila kabiji bwibalengelanga kutwezhamo ne mutwe mu bya ntanda. Amiwa nakebelenga kwingijila Yehoba mu bwanyike bwami.”

Essly wayile ku sukulu na kufundapo mingilo imo pa kuba’mba akekalepo na mwakumwena mu mwingilo wa bupainiya, kepo ayile na kwingijila kwakebewenga basapwishi ba Bufumu bavula. Akwa ko ayile, wakafunjilenga mulaka waambanga bantu batelwa’mba, ba Otomi ne ba Tlapaneco. Pa myaka isatu yo aingijila ku ino mpunzha ya ku muzhi na kusapwila, waambile’mba, “Kwingijila kubena kukebewa basapwishi bavula kwandetela lusekelo lukatampe, kwandengela ne kwikala bwikalo bwalumbuluka. Kabiji kwandengela kwikala na bulunda bwakosa na Yehoba.” Ba Phillip ne ba Racquel, bamulume ne mukazhi baji na myaka kukila pa 30 bafumine ku United States nabo baitabizha kino. Baambile’mba: “Mu ino ntanda bintu bibena kwaluka bingi bukiji, kino kyalengela bavula kulanguluka’mba bwikalo bwabo kechi bwashikimana ne. Kusapwila ku mpunzha kuji bantu babena kutako muchima ku byambo bya mu Baibolo kwitulengela kuyuka’mba tubena kuba kintu kyanema. Kino kituletela bingi lusekelo.”

BYA KUBA NA MAKATAZHO

Pano bino, kwingijila ku mpunzha kubena kukebewa basapwishi ba Bufumu bavula kwikala ne makatazho. Lukatazho lumo ke kukeba mali a kwikwashishamo. Pa kuba’mba umone mwa kwikwashisha wafwainwa kufunda kwikela monka mwikela bantu ba ku yo yo mpunzha. Verónica painiya waingila pa myaka yavula walumbulula’mba: “Ku mpunzha imo ko nayile na kwingijila, napoteshanga kajo ka kutekela jimo. Ku mpunzha ikwabo, napoteshanga bivwalo ne kutenda bantu nsuki. Pa kino kimye, ñingila mwingilo wa kuwamisha nzubo ya muntu kabiji ne kufunjisha banabakazhi bakyanyike bya kulama baana babo.”

Kufunda kisho kukatazha bingi kikatakata inge ubena kwikala na bantu ba mu mpunzha iji mu nkonkoso babula kuyukapo bisho bikwabo ne. Kino byo byo kyajinga kwi ba Phillip ne ba Racquel kimye kyo bayile na kwingijila ku mpunzha ko bamba mulaka wa Nahuatl. Ba Phillip baambile’mba: “Kisho kya bano bantu kyapusana bingi na bisho bikwabo.” Pano ki ka kibakwashishe kwikela mo bekela bano bantu? Ba Phillip baambile’mba: “Twatele muchima pa bintu byawama byo twamwene mu bano bantu, nabiji byo bakwatankana mu bisemi, bukishinka ne bumpanyi bwabo.” Ba Racquel banungilepo’mba: “Kwikala kokwa ne kwingijila pamo na balongo ne banyenga ba konkakwa kwitufunjishe bintu byavula bingi.”

BYA KWINENGEZHA

Inge mukeba kuya na kwingijila ku mpunzha ya kwalepa kubena kukebewa basapwishi bavula, mwafwainwa kwinengezha byepi? Balongo ne banyenga baingilapo kala uno mwingilo bamba’mba: Saka mukyangye kuviluka, mwafwainwa kutendekela jimo kupezha bwikalo bwenu ne kusekela mu byo muji nabyo. (Fili. 4:11, 12) Leticia washimikizha’mba: “Nachinuzhukanga makito akebewanga kwikala pa mpunzha imo kimye kyabaya. Nakebanga kuya konse ko nasaka kabiji pa kimye kyo nkeba.” Hermilo waambile’mba: “Nafunjile kuteka, kuchapa ne kukisa bivwalo.” Verónica washimikizha’mba: “Kimye kyo naikalanga pa nzubo na bansemi ne bankasami, nawamishanga pa nzubo kabiji nafunjile kunengezha kajo. Nafunjile ne kulama bulongo bintu.”

Levi ne Amelia bafumine ku United States baikala mu masongola pa myaka 8 bashimikizha milombelo byo ibakwashishe pa kwinengezha kuya na kwingijila ku Mexico. Levi washimikizha’mba: “Twabajile mali akebewenga a kuya nao ku kyalo kingi pa mwaka umo kabiji twalombele Yehoba kuba’mba etukwashe kumona mashinda mwakumwena ano mali.” Byo papichiletu bañondo bacheche, bataine ano mali o batongwele mu lulombelo kabiji bavilukile kwa kubula ne kutaya kimye ne. Levi waambile’mba: “Yehoba wakumbwile lulombelo lwetu, onkao mambo, twafwainwe kubila monka mwayijile lulombelo lwetu.” Amelia wanungilepo amba: “Twalangulukilenga’mba tukekalakotu mwaka umo, pano bino, twaikalako myaka itanu na ibiji, kabiji kechi tubena kulangulukapo bya kufumako ne. Kwikala kuno kwitulengela kumona Yehoba byo akwashañana. Pa juba pa juba tubena kwimwena byo awama.”

Adam ne Jennifer, bamulume ne mukazhi bafumine ku United States babena kwingijila mu nyaunda muji bantu bamba Kizungu mu Mexico, nabo lulombelo lwibakwashishe bingi. Baambile’mba: “Kechi kupembela’mba kana bintu bikawame ne. Umvwe mukeba kuya na kwingijila ku kyalo kingi, lombaipo ne kubila bintu monka mwayila milombelo yenu. Pezhaiko bwikalo bwenu, tumai nkalata ku musampi wa mu kyalo kyo mubena kukeba kuya na kwingijilako, kabiji inge mwabala mali abena kukebewa, vilukai!”a Inge mwauba byobyo, mukekala bwikalo bwawama kabiji bulunda bwenu na Lesa bukakoselako.

[Tubyambo twa mushi]

[Kipikichala pa peja 3]

Dustin ne Jassa

[Kipikichala pa peja 4]

Amelia ne Levi

[Kipikichala pa peja 4]

Racquel ne Phillip

[Kipikichala pa peja 4]

Essly

[Kipikichala pa peja 5]

Leticia ne Hermilo

[Kipikichala pa peja 5]

Verónica

[Kipikichala pa peja 5]

Adam ne Jennifer