“Yukai Amba Nji Nenu Moba Onse”

“Yukai amba nji nenu moba onse kukafikatu ne ku mpelo ya buno bwikalo.”—MAT. 28:20.

KEBAI MIKUMBU YA ANO MEPUZHO:

Mambo ka o twafwainwa kwambila’mba kwajinga bena Kilishitu bashingwa pano pa ntanda kufuma mu 33 C.E. kufika ne lelo jino?

Kupikita kwa mutundu ka Yesu ko aubile kutendeka mu 1914?

Ñanyi bintu bikamweka kulutwe byaambilepo Yesu mu kishimpi kya wichi ne bincha?

1. (a) Lumbululai mu byambo bicheche kishimpi kya wichi ne bincha. (b) Yesu walumbulwile byepi mwatala kino kishimpi?

MU KISHIMPI kyanji kimo kyaamba pa Bufumu, Yesu waambile pa njimi wakushile kunwa yawama ya wichi ne mulwanyi wakushilemo bincha mu wichi. Bincha byakomene kukila wichi, pano bino, njimi wakambizhe bakalume banji amba bebileke “bikomene pamo kufika kimye kya kunowa.” Mu kimye kya kunowa, bincha bebyonawine bino wichi bamubungizhe pamo. Yesu aye mwine walumbulwile mwatala kino kishimpi. (Tangai Mateo 13:24-30, 37-43.) Kino kishimpi kilumbulula ka? (Monai kakitenguluzha ka kuba’mba “Wichi ne Bincha.”)

2. (a) Bintu byaubiwe mu bujimi bwa njimi wa mu kishimpi kya kwa Yesu bimenako ka? (b) Ñanyi lubaji lwa kino kishimpi lo tusakwisambapo?

² Bintu byamwekele mu bujimi bwa uno njimi bimwesha Yesu byo akasalulula mu bantu jibumba ja wichi, ko kuba’mba bena Kilishitu bashingwa bakalamanga pamo ne aye mu Bufumu bwanji ne kimye kyo akoba bino. Kukusa kwatendekele pa Pentekosita mu 33 C.E. Kabiji kubungizha kukapwa kimye bashingwa bakatanwa bomi ku mpelo ya buno bwikalo kyo batambula tutetesho ne kuya mwiulu. (Mat. 24:31; Lum. 7:1-4) Byonkatu kukanjila pa mutumba byo kwakonsha kukwasha muntu kumona bulongo, ne kino kishimpi nakyo kitulengela kumvwisha bintu byamweka pa myaka nobe 2,000. Kino kishimpi kitulengela byepi kumvwisha bintu bikwabo byakunza Bufumu? Kyalumbulula kimye kya kukusa, kimye kya kukoma kwa wichi ne kimye kya kunowa. Uno mutwe usakwamba kikatakata pa kimye kya kunowa.a

BUKALAMA BWA KWA YESU

3. (a) Ki ka kyamwekele ku ntendekelo ya myaka kitota kya bubiji C.E? (b) Kwesakana na Mateo 13:28, ñanyi bwipuzho bo baipwizhe, kabiji bañanyi baipwizhe? (Monai byambo bikwabo.)

³ Ku ntendekelo ya myaka kitota kya bubiji C.E., ‘bincha byamenene’ kimye bantu bebepekezha’mba bena Kilishitu kyo bavujile. (Mat. 13:26) Byo kyafikilenga mu myaka kitota kya buna, bena Kilishitu baji nobe bincha bavujile kukila bena Kilishitu bashingwa. Vulukai kuba’mba mu kino kishimpi, bakalume baipwizhe nkambo yabo amba ebape luusa lwa kwibisekulamo.b (Mat. 13:28) Pano nkambo yabo wibakumbwile’mba ka?

4. (a) Byakumbwile Nkambo Yesu bisololapo ka? (b) Bena Kilishitu baji nobe wichi bayukanyikilwe ñanyi kimye?

⁴ Pa mambo a wichi ne bincha, Yesu waambile’mba: “Bilekai bikomene pamo kufika kimye kya kunowa.” Uno mukambizho umwesha kuba’mba bena Kilishitu bashingwa baji nobe wichi bajinga konka kufumatu mu myaka kitota kitanshi kufika ne lelo jino. Ne Yesu waitabizhe bino byambo byo abujile baana banji ba bwanga amba: “Nji nenu moba onse kukafikatu ne ku mpelo ya buno bwikalo.” (Mat. 28:20) Onkao mambo, Yesu ukatwajijila kuzhikijila bena Kilishitu bashingwa kufikatu ne ku mpelo. Byo kiji kuba’mba bena Kilishitu baji nobe bincha bavujile kukila bena Kilishitu baji nobe wichi, kechi twayuka bajinga mu jibumba ja wichi pa kyokya kimye ne. Nangwa byonkabyo, pa myaka nobe 30 kimye kya kunowa saka kikyangye kufika, jibumba ja wichi jayukanyikilwe. Pano jayukanyikilwe byepi?

MULUWE “WANENGEZHEZHA JIMO JISHINDA”

5. Nga bungauzhi bwa kwa Malakai bwafikile byepi mu myaka kitota kitanshi?

⁵ Pa myaka yavula Yesu saka akyangye kwamba kishimpi kya wichi ne bincha, Yehoba watangijile ngauzhi Malakai kwambila jimo bintu bikekala mu kishimpi kya kwa Yesu. (Tangai Malakai 3:1-4.) Yoano Mubatizhi ye wajinga ‘muluwe wanengezhejile jimo jishinda.’ (Mat. 11:10, 11) Yoano byo aishile mu mwaka wa 29 C.E., kimye kya kuzhachisha kisaka kya bena Isalela kyafwenyenye pepi. Yesu ye wajinga muluwe wa bubiji. Watokeshe nzubo ya Lesa mu Yelusalema jibiji, ku ntendekelo ya mwingilo wanji ne pa kunangijila ku mpelo. (Mat. 21:12, 13; Yoa. 2:14-17) Onkao mambo, mwingilo wa kwa Yesu wa kutokesha wamwingijile pa kimye kyabaya.

6. (a) Bungauzhi bwa kwa Malakai bwafikile byepi pakatampe? (b) Ñanyi kimye Yesu kyo aishile na kupikita nzubo ya ku mupashi? (Monai byambo bikwabo.)

⁶ Kufika kukatampe kwa bungauzhi bwa kwa Malakai kwajinga byepi? Myaka yavula byo yapichilepo mwaka wa 1914 saka akyangye kufika, Charles T. Russell ne bakwabo mo baingijilanga baingijile mwingilo wapasha wa kwa Yoano Mubatizhi. Uno mwingilo wanema ye baingijile wavwangilemo kuzhikula bukine bwa mu Baibolo. Bafunda Baibolo bafunjishenga bukine pa kitapisho kya bukuzhi bwa kwa Kilishitu, kusolola kuba’mba lufunjisho lwa mujilo wa helo lwa bubela, kabiji basapwijilenga ne pa mpelo ya Bimye bya Bangetila. Nangwa byonkabyo, kwajinga mabumba a bupopweshi avula bingi a betelanga’mba baana ba bwanga ba kwa Kilishitu. Onkao mambo, kwajinga bwipuzho bwanema bingi bwakebewenga kukumbulwa bwa kuba’mba: Pa ano mabumba bañanyi bajinga wichi? Pa kuba’mba buno bwipuzho bukumbulwe, Yesu watendekele kupikita nzubo yanji ya ku mupashi mu 1914. Kuno kupikita ne kwingila mwingilo wa kuwamisha kwatendekele mu mwaka wa 1914 kufika ne kuntendekelo ya mwaka wa 1919.c

MYAKA YA KUPIKITA NE KUWAMISHA

7. Yesu byo aishile na kupikita mu 1914, wataine ka?

⁷ Yesu byo ashile na kupikita wataine ka? Wataine kajibumba ka bantu babambakana batelwanga’mba Bafunda Baibolo baingijile na ngovu mwingilo wa kusapwila kukila pa myaka 30 ne kwingijisha bintu byabo kutundaikilamo uno mwingilo.d Kino kyafwainwa kyamuletejile bingi lusekelo Yesu ne bamalaika pa kutana kano kajibumba ka bajinga nobe wichi ye babula kukonyangazha ku nseku ya kwa Satana. Nangwa byonkabyo, kwakijinga mwingilo wa ‘kuwamisha bena Levi,’ ko kuba’mba bashingwa. (Mala. 3:2, 3; 1 Pe. 4:17) Mambo ka?

8. Ñanyi bintu byamwekele panyuma ya mwaka wa 1914?

⁸ Ku mpelo ya mwaka wa 1914, Bafunda Baibolo bamo balefwilwe mambo kechi bayile mwiulu ne. Kufuma mu 1915 kufika mu 1916 kwibakankanya ku bantu babujile mu jibumba kwalengejile mwingilo wa kusapwila kubwela panyuma. Kabiji kyakijilemo kutama Mulongo Russell byo afwile mu October 1916, mabano abukile mukachi ka jibumba. Bakulumpe bana pa bakulumpe batanu na babiji ba Watch Tower Bible and Tract Society basatukile na mambo a kukana Mulongo Rutherford kwikala wa kwibatangijila. Bakebele kuleta mabano mu balongo ne banyenga, bino mu August 1917 bafumine pa Betele, kwambatu kine kuno kwajinga kutokesha. Kabiji Bafunda Baibolo bamo batendekele kuchina bantu. Bino mu bujibumba baswile kwibawamisha kwi Yesu ne kupimpula byubilo byabo. Onkao mambo, Yesu wibamwene kuba’mba bena Kilishitu bakine baji nobe wichi, kabiji wakaine bonse bebepekezhanga’mba bena Kilishitu bajinga mu machechi a Kilishitendomu. (Mala. 3:5; 2 Timo. 2:19) Ki ka kyalondejilepo? Pa kuba’mba tuyuke byo kyajinga, twayai twisambe jikwabo pa kishimpi kya wichi ne bincha.

ÑANYI BINTU BYAMWEKELE KIMYE KYA KUNOWA BYO KYATENDEKELE?

9, 10. (a) Tusakwisamba pa ka pa mambo a kimye kya kunowa? (b) Ñanyi bintu byamwekele ku ntendekelo ya kimye kya kunowa?

⁹ Yesu waambile’mba: “Kunowa ke kimye kya ku mpelo ya buno bwikalo.” (Mat. 13:39) Kino kimye kya kunowa kyatendekele mu 1914. Tusakwisamba pa bintu bitanu Yesu byo aambile’mba bikamweka mu kikye kimye.

¹⁰ Kitanshi, kubungizha bincha. Yesu waambile’mba: “Pa kunowa, nkambila bakunowa namba: Patanshi bifumyaimo bincha ne kwibikasa bikuta bikuta.” Panyuma ya mwaka wa 1914 bamalaika batendekele “kubungizha” bena Kilishitu baji nobe bincha kupichila mu kwibafumya mu bashingwa, “baana ba mu bufumu.”—Mat. 13:30, 38, 41.

11. Kufika ne lelo jino, ñanyi kintu kyapusanyako bena Kilishitu bakine na boba betela’mba bena Kilishitu?

¹¹ Mwingilo wa kubungizha byo atwajijile, lupusano luji pakachi ka ano mabumba abiji lwalaajile ne musana patoka. (Lum. 18:1, 4) Byo kyafikilenga mu 1919, kyamwekeshetu patoka kuba’mba Babilona Mukatampe wapona. Ñanyi kintu kyalengejile bena Kilishitu bakine kupusanako na boba bebepekezhanga’mba bena Kilishitu? Ke mwingilo wa kusapwila. Batangijilanga jibumba ja Bafunda Baibolo batendekele kwamba pa ene mambo o kyanemena kusapwila Bufumu pa muntu pa muntu. Kya kumwenako, kabuku kanembelwe mu 1919 ka kuba’mba To Whom the Work Is Entrusted, (Bo Bapa Mwingilo) katundaikile bena Kilishitu bonse bashingwa kusapwila ku nzubo ku nzubo. Kano kabuku kaambile’mba: “Uno mwingilo wabaya bingi, bino byo aji wa Nkambo, tukamwingila mu bulume bwanji. Bonse mwafwainwa kwingilako uno mwingilo.” Pano baubilepo ka? Kufumatu kyo kya kimye, Kyamba kya Usopa kya mu 1922 kyaambile’mba Bafunda Baibolo baingijile bingi na ngovu mwingilo wa kusapwila. Kechi papichile ne kimye kyabaya ne, mwingilo wa kusapwila waishile kwikala kayukilo ka bano bena Kilishitu bakishinka, byonkatu byo aji ne lelo jino.

12. Jibumba ja wichi batendekele kwijibungizha ñanyi kimye?

¹² Kya bubiji, ke kubungizha wichi. Yesu wakambizhe bamalaika amba: “Muye na kubungizha wichi ne kumulonga mu butala bwami.” (Mat. 13:30) Kufumatu mu 1919, bashingwa bebabungizha ne kwibaleta mu kipwilo kya bena Kilishitu kyo batokesha. Bena Kilishitu bashingwa bakekala bomi kimye kikafika mpelo ya buno bwikalo, kwibabungizha kukobiwa inge batambula mfweto yabo mwiulu.—Da. 7:18, 22, 27.

13. Nga Lumwekesho 18:7 usolola byepi bilanguluka pite, nangwa’mba Babilona Mukatampe ne Kilishitendomu?

¹³ Kya busatu, ke kujila ne kushenka ku meno. Ki ka kikamweka inge bamalaika bapwisha kukasa bincha bikuta bikuta? Byo aambilenga pa bikamwekela baji mu jibumba ja bincha, Yesu waambile’mba: “Mo mo bakajilanga ne kushenka ku meno.” (Mat. 13:42) Nanchi kino kibena kubiwa lonka luno nyi? Ine. Lelo jino Kilishitendomu byo aji lubaji lwa pite, wamba’mba: “Amiwa ne mfumu wamukazhi uji pa jitanda kabiji kechi nemwanamukazhi wafwilwa ne. Kechi nkajilapo mabingo ne.” (Lum. 18:7) Byo byo kiji, Kilishitendomu wimona’mba uji na luusa lukatampe, kabiji ulanguluka’mba uji nobe “mfumu wa mukazhi” waikala peulu ya jibumba ja bantangi ba bumulwila ntanda. Mu ano moba aba bemenako bincha babena kwitota, kechi babena kujila ne. Bino, bintu katatakatu bikebatamine.

14. (a) Ñanyi kimye bantu bebepekezha’mba Kilishitu kyo ‘bakashenka ku meno,’ kabiji mambo ka? (b) Nga ñumvwino yetu yakatataka ya Mateo 13:42 yakwatankana byepi na byambo biji mu Salamo 112:10? (Monai byambo bikwabo.)

¹⁴ Mu kimye kya malwa akatampe, mabumba onse a bupopweshi bwa bubela akonaunwa kabiji bayamo bakasusutanga na kukeba mwakufyama, pano bino kechi bakemumona ne. (Luka 23:30; Lum. 6:15-17) Bino, byo bakayuka kuba’mba kechi bakapuluka ne, bakajila kya mama nafwa ne ‘kushenka ku meno’ na bukaji. Kwesakana na byaambijile jimo Yesu mu bungauzhi bwanji bwaamba pa malwa akatampe, pa kyo kya kimye kyakatazha, ‘bakatama miteto.’e—Mat. 24:30; Lum. 1:7.

15. Bincha bakebyuba byepi, kabiji kino kikobiwa ñanyi kimye?

¹⁵ Kya buna, ke kwibataya mu kisha kya mujilo. Bikuta bya bincha bakebyuba byepi? Bamalaika ‘bakebitaya mu kisha kya mujilo.’ (Mat. 13:42) Kino kibena kulumbulula lonaiko lwa myaka ne myaka. Onkao mambo, bonse baya mu mabumba a bupopweshi bwa bubela bakonaunwa ku mpelo ya malwa akatampe, ko kuba’mba pa Amagedonyi.—Mala. 4:1.

16, 17. (a) Ñanyi kintu kikapelako kumweka kyaambilepo Yesu mu kishimpi kyanji? (b) Mambo ka o twaambila’mba kuno kusama kukobiwa kulutwe?

¹⁶ Kya butanu, ke kusama. Yesu wapwishishe kwamba buno bungauzhi na byambo bya kuba’mba: “Pa kyokya kimye, baoloka bakasama nobe juba mu Bufumu bwa Shabo.” (Mat. 13:43) Pano kino kikobiwa ñanyi kimye, kabiji kwepi? Kino kintu kikobiwa kulutwe. Yesu kechi waambilenga pa mwingilo ubena kwingijiwa pano pa ntanda ne, bino waambilenga pa kintu kikobiwa mwiulu.f Akimonai bino bishinka bibiji bitulengela kwamba bino.

¹⁷ Kishinka kitanshi ke mukumbu wa bwipuzho bwa kuba’mba “ñanyi kimye.” Yesu waambile’mba: “Pa kyokya kimye, baoloka bakasama.” Byambo bya kuba’mba “pa kyokya kimye” bibena kwamba pa kintu kikamweka kulutwe kyafuminetu na kwambapo Yesu kya ‘kutaya bincha mu kisha kya mujilo.’ Kino kikamweka ku mpelo ya malwa akatampe. Onkao mambo, ‘kusama’ kwa bashingwa kukobiwa mu kikye kimye kya kulutwe. Kishinka kya bubiji ke mukumbu wa bwipuzho bwa kuba’mba, “kwepi?” Yesu waambile’mba baoloka ‘bakasama mu bufumu.’ Nga kino kilumbulula ka? Bonse bashingwa bakishinka bakatanwa pano pa ntanda lubaji lutanshi lwa malwa akatampe saka lwapita kala bakatambula tutetesho. Byonka byaambile Yesu mu bungauzhi bwaamba pa malwa akatampe, bakebakonkanya pamo mwiulu. (Mat. 24:31) Mwiulu mo mo bakasama “mu Bufumu bwa Shabo,” kabiji aku nkondo ya Amagedonyi ipwatu bakasangalala nobe musongwa wa kwa Yesu pa “masongola a Mwana mukooko.”—Lum. 19:6-9.

BYO TWAMWENAMO

18, 19. Atweba bonse pa muntu pa muntu twamwenamo byepi mu kumvwisha mwatala kishimpi kya kwa Yesu kya wichi ne bincha?

¹⁸ Twamwenamo byepi mu kumvwisha kino kishimpi? Akilangulukai pa bino bintu bisatu. Kitanshi, kino kishimpi kitulengela kumvwisha byazhika. Kabiji kitulengela kuyuka ene mambo Yehoba o aswishisha bubi. ‘Walekele bijiilo byo akebelenga kuletela bukaji’ kuba’mba anengezhe “bijiilo bya lusa,” ko kuba’mba jibumba ja wichi.g (Loma 9:22-24) Kya bubiji, kino kishimpi kikosesha luketekelo lwetu. Mpelo byo ibena kufwenya pepi, balwanyi betu bakakizhamo kwitulwisha, ‘bino kechi baketushinda ne.’ (Tangai Yelemiya 1:19.) Byonkatu Yehoba byo azhikijila jibumba ja wichi pa myaka yavula, ne atweba Shetu wa mwiulu, kwingijisha Yesu ne bamalaika ukekala ne atweba mu “moba onse” a kufika ne ku mpelo.—Mat. 28:20.

¹⁹ Kya busatu, kino kishimpi kitulengela kuyuka boba bemenwako na wichi. Mambo ka kuyuka kino o kwanemena? Kuyuka bena Kilishitu baji nobe wichi kwanema bingi pa kuba’mba tukumbule bwipuzho bwaipwizhe Yesu buji mu bungauzhi bwanji bwaamba byavula pa moba apelako. Waipwizhe’mba: “Nanchi kalume wakishinka kabiji wa maana ye ñanyi?” (Mat. 24:45) Mitwe ibiji yalondelapo ikakumbula bingi bulongo buno bwipuzho.

BYAMBO BIKWABO: (Byafwainwa kutangwa byonka bitangwa tubyambo twa munshi monka mu mafuka mo biji.)

[Tubyambo twa mushi]

[Chati pa peja 10, 11]

WICHI NE BINCHA

33 C.E. KUKUSA KWATENDEKA

NJIMI: Yesu

NKUNWA YAWAMA YA KUSHILWE: Kushingwa na mupashi wazhila

BUJIMI:Bantu baji pa ntanda

“Muntu wakushile nkunwa yawama mu bujimi” (Mat. 13:24)

MULWANYI: Diabola

BANTU BALAAJILE: Kufwa kwa batumwa

‘Bantu byo balaajile, mulwanyi waishile ne kukusamo bincha’ (Mat. 13:25)

WICHI: Bena Kilishitu bashingwa

BINCHA: Bantu bebepekezha’mba bena Kilishitu

“Bikomene pamo kufika kimye kya kunowa” (Mat. 13:30)

1914 KUNOWA KWATENDEKA

BAKALUME/ BAKUNOWA: Bamalaika

Bena Kilishitu baji nobe bincha bebafumishemo mu bashingwa, “baana ba mu Bufumu”

Bincha bebibungizha ne kwibikasa bikuta bikuta (Mat. 13:30)

(Monai mafuka 10, 11)

1919 KUBUNGIZHA NE KULONGA MU BUTALA: Bena Kilishitu bashingwa bebakonkenya mu kipwilo kyo batokesha

KIMYE KYA KUNOWA

“Kubungizha wichi ne kumulonga mu butala” (Mat. 13:30)

(Monai jifuka 12)

AMAGEDONYI

Pa Amagedonyi, bincha bakebitaya mu mujilo

KUSAMA

Pa kimye kicheche kikapitapo Amagedonyi saka ikyangye kutendeka, bashingwa bakishinka bashalapo bakebakonkenya mwiulu

Baoloka bakasama nobe juba mu Bufumu (Mat. 13:43) (Monai mafuka 16, 17)

Bincha bakebitaya mu kisha kya mujilo (Mat. 13:42) (Monai jifuka 15)

[Caption pa peja 13]

Katatakatu bulunda bwa Kilishitendomu na bantangi ba bumulwila ntanda bukapwe

(Monai jifuka 13)