Kobuji—Bupopweshi bwa Bwina Kilishitu Bumo bwa Kine

YESU KILISHITU watendekeshetu bupopweshi nangwa’mba kipwilo kimotu. Akya kipwilo kyajinga mubiji umotu, kisemi kya ku mupashi. Kino kibena kulumbulula’mba kwajinga kukonkanyiwa pamo kwa bantu basajilwe na mupashi wazhila wa Lesa, bonse bayukanyikilwe kwi Lesa amba ‘baana’ banji.—Loma 8:16, 17; Ngalatiya 3:26.

Yesu wafunjishe kuba’mba Lesa wingijishatu jishinda jimo jitangijila bantu ku bukine ne ku bumi. Pa kulumbulula buno bukine bwanema, Yesu waingijishe kyambo kya jishinda kulumbulula jishinda ja ku bumi bwa myaka ne myaka. Waambile’mba: “Twelai pa kibelo kyakepa: mambo kibelo kyabaya ne jishinda japela kwendamo biya ku lonaiko, ne batwelamo bo bavula. Mambo kibelo kyakepa ne jishinda jakatazha biya ku bumi, kabiji bebimona bo bacheche.”—Mateo 7:13, 14; Yoano 14:6; Byubilo 4:11, 12.

Kipwilo Kyakwatankana

Buku wa The New Dictionary of Theology waamba’mba, kechi twafwainwa kulanguluka’mba kipwilo kya mu myaka kitota kitanshi “kyakwatankene ne kutangijilwa bulongo ntanda yonse byonka byo tulumbulula inge twauba’mba twambe pa kipwilo kya kikatolika ne.” Mambo ka? Waamba’mba “kishinka kijitu kimo,” kya kuba’mba, “kipwilo kya uno mutundu kyakwatankene ne kutangijilwa bulongo kechi kyajingako ne.”

Bino kafwako nangwa umo wakonsha kukana kuba’mba byajinga kyokya kipwilo kya bwina Kilishitu kitanshi, kyapusenshatu na mutundu wa bipwilo byo tubena kumona ano moba ne. Akyo mino, kyajinga kyakwatankana bingi bulongo. Bipwilo kechi byajinga na lūsa lwa kwiubila bintu abyo bine ne, byonse byayukile kuba’mba lūsa lwajingatu na jibumba jitangijila ja mu Yelusalema. Aja jibumba, jajinga jibumba ja batumwa ne banabalume bakulumpe mu kipwilo mu Yelusalema jakwashishe mu kukwatankanya pamo kipwilo kwikala “mubiji umo” wa Kilishitu.—Efisesa 4:4, 11-16; Byubilo 15:22-31; 16:4, 5.

Kyaikele byepi akya kipwilo kimo kya kine? Nanchi kyo kyaishile kwikala ke Chechi ikatampe ya Katolika nyi? Inyi kyo kyaishile kusema machechi avula a abenamo aba Polotesitanti ajiko mu ano moba? Nangwa po kampe paubiwepo kintu kimo nyi?

“Kajo” ne “Bincha”

Pa kuba’mba tuyuke bino, twayai tukilanguluke pa byaambile Yesu Kilishitu kuba’mba bikamweka. Kimo kimye mwakonsha kukumya kuyuka’mba Yesu waketekejile kuba’mba kipwilo kyanji kikaleka kumvwanyika kabiji ukaswisha kino kintu kya bulanda kutwajijila pa myaka yavula.

Wapashañenye kipwilo kyanji ku “bufumu bwa mwiulu.” Waambile’mba: “Bufumu bwa mwiulu bwapashañana pamo nobe muntu wakushile nkunwa yawama mu bujimi bwanji: kabiji bantu byo balajile, mulwanyi wanji waishile, wakushilemo bincha mu kajo, kabiji wafumineko. Kabiji lubula byo lwakomene ne kusema, ponkapo ne bincha nabyo byamwekele. Ponkapo baishile bakalume ba mwina nzubo amba, Mwane! kechi mwakushile nkunwa yawama mu bujimi bwenu nenyi? Pakuba bino bincha byafuma pi? Aye wibambile’mba, Mulwanyi wauba bibye. Kumvwa bakalume amba, Mwasaka tuye tukebisekulemonyi? Kumvwa aye amba, Ine: kuchina’mba, pa kusekulamo bincha, mwakayokwela kumo ne kajo. Aki bilekai byonse bikomene pamo poso pa kukanowa; po po nkambila ba kunowa namba, Patanshi mwibibungizhe pamo bincha, mwibikute bikuta, mwibisoke; pakuba kajo mukalonge mu butala bwami.”—Mateo 13:24-30.

Yesu walondolwele’mba aye ye ‘wakushile nkunwa.’ “Nkunwa yawama” yaimenejilengako baana banji ba bwanga bakine. “Mulwanyi” wanji ke Satana Diabola. “Bincha” bajinga bantu bebepekezha’mba bena Kilishitu batwelelenga pachepache mu kipwilo kya bwina Kilishitu kitanshi. Waambile kuba’mba “kajo” ne “bincha” byafwainwa kumenena pamo poso “pa kukanowa,” ko kuba’mba mu “juba jikapelako.” (Mateo 13:37-43) Bino byonse byayijile mwepi?

Kipwilo kya Bwina Kilishitu byo Kyaishile Kutama

Batumwa byo bafwile, mu kimyetu kicheche mu kipwilo mwaimene bafunjishi basendukile mu lwitabilo. Baambilenga ‘bintu byaluwankana, bya kwibakokamo baana ba bwanga’mba bebalonde.’ (Byubilo 20:29, 30) Kyafuminemo, bena Kilishitu bavula ‘bapondokele mu lwitabilo.’ ‘Basendukijile ku bishimitu.’—1 Timoti 4:1-3; 2 Timoti 4:3, 4.

Buku wa The New Dictionary of Theology, waamba’mba byo kyanangijilenga mu myaka kitota kya buna C.E., “bwina Kilishitu bwa Kikatolika bwaikele ke bupopweshi bukatampe mu Bufumu bwa bena Loma.” Bwalengejile “machechi ne bangikazhi kukwatankana pamo,” ko kuba’mba kwaimene bupopweshi ne bantu bakaine byaitabijilemo bena Kilishitu batanshi. (Yoano 17:16; Yakoba 4:4) Uno buku waamba ne kuba’mba pa kupitapo kimye, buntangi ne kipwilo kine, kuvwangakotu ne mafunjisho akyo avula, byaalukiletu nobe mu kukopa kwa jiso “na mambo akukebesha kuyuka ne kuchapankanya mafunjisho o basombelenga kufuma mu L[ulayañano] lwa K[ala] ne bisho bya kwa plato.” Byonka byaambijile jimo Yesu Kilishitu, baana banji ba bwanga balekele kumvwanyika na mambo a kukumbana monse monse kwa bobo bebepekezhenga kwikala bena Kilishitu.

Bantu bamutelekelenga Yesu bayukile’mba kyashupile bingi kuyuka bulongo kajo ko kepi ne bincha byo byepi, mambo akuba abya bincha mu kimye kya kukoma kwabyo byamwekelengatu pamo nobe kajo. Onkao mambo, Yesu walumbulwile’mba mu yoya myaka kikashupa kuyuka’mba abe bo bena Kilishitu bakine ne babe bo bebepekezhatu’mba bena Kilishitu. Kino kechi kibena kulumbulula’mba kipwilo kya bwina Kilishitu kyazhiyile ne, mambo Yesu walayile’mba ukatwajijila kutangijila balongo banji ba ku mupashi “kufika ku juba jikapelako.” (Mateo 28:20) Yesu waambile’mba kajo kakakomanga. Byonkabyo, kwakubula nangwa kuzhinaukatu ne, mwaka ne mwaka bena Kilishitu bakine pa muntu pa muntu ne mu bujibumba bebikilengako papelela bulume bwabo bonse kulamachila ku mafunjisho akwa Kilishitu. Bino kechi baikele ke kipwilo nangwa ke jibumba jaya nkuwa ne. Kine kechi baikele nobe bupopweshi bwa bantu basenduka mu lwitabilo baletela bumvu jizhina ja kwa Yesu Kilishitu ne.—2 Petelo 2:1, 2.

“Muntu wa Bumpupabizhila Wamweka”

Mutunwa Paulo waambijile jimo kiyukilo kikwabo kya kuyukanyikisha bupopweshi bwa bubela. Wanembele’mba: “Kechi muleke nangwa umo emujimbaike nangwa kacheche ne: mambo [juba ja Yehoba] kechi jifike ne, poso patanshi akwa kupondoka ku lwitabilo kwafika, ne awa muntu wa bumpupabizhila wamweka.” (2 Tesalonika 2:2-4) Uno “muntu wa bumpupabizhila” ke jibumba ja bantangi ba bupopweshi betutujikile bene ne kwipa bukulumpe pa kipwilo kya “bwina Kilishitu.”

Kupondoka mu lwitabilo kwatendekele mu moba a mutumwa Paulo. Batumwa byo bafwiletu, kwafikenejiletu kukumbana monse, kabiji ne mingilo ya batumwa yazhimañene. Paulo waambile’mba kupondoka mu lwitabilo “kukayila monka mwayila kwingila kwa Satana na bulume bonse, ne na biyukilo, ne na bya kukumya bya bubela, kabiji ne na bujimbijimbi bonse bwabipa.” (2 Tesalonika 2:6-12) Akye kyalumbulula bingi bulongo mingilo ya bantangi ba bupopweshi bavula mwapita bwikalo bwa muntu.

Mu kukalakanya kwabo kuba’mba bupopweshi bwa Kikatolika kyo kipwilo kya kine, bantangi ba mu Katolika bamba’mba ba bishopu babo “bo banswanyi baswana batumwa batanshi kulondela mu ndonda kufuma patendekejile bwina Kilishitu.” Kuno kukalakanya kwabo kwa kuba’mba bo baswana butumwa kechi kujipo ne mu Binembelo ne. Kechi kujipo kishinka kya ntaka kitubula’mba bupopweshi bwatendekele kwikalako panyuma ya kuba batumwa ba kwa Yesu bafwa, bwatangijilwepotu nangwa jimo na mupashi wazhila wa Lesa ne.—Loma 8:9; Ngalatiya 5:19-21.

Nga machechi akwabo aishile kulengwa mu kimye kyo batelelenga’mba kimye kya Kuvumbula bukine bwine? Nanchi ano machechi aishile kulonda mu ngayo ya kipwilo kya bwina Kilishitu kitanshi nyi? Abya abwezhezhe bukine bwa kipwilo kya bwina Kilishitu kitanshi nyi? Kya kine kuba’mba mu kyokya kimye kya Kuvumbulula bukine bwine bantu bavula baishile kwikala na Baibolo mu milaka yabo. Bino, mpito imwesha’mba ano machechi atwajijile kufunjisha mafunjisho a bubela.—Mateo 15:7-9.

Pano bino, yukai kino’mba, Yesu Kilishitu waambijile jimo’mba kipwilo kyanji kya kine kimo kikabwezhiwa mu moba o atelele’mba a juba jikapelako. (Mateo 13:30, 39) Kufikizhiwa kwa bungauzhi bwa mu Baibolo kubena kumwesha’mba o ano moba otujimo. (Mateo 24:3-35) Kino byo kyaikala kya kine, atweba bonse pa muntu pa muntu twafwainwa kwishikisha’mba: ‘Nanchi bupopweshi bumo bwa kine bo bwepi?’ Kino kikemukwashako kwibuyuka.

Kimo kimye mwashiinwa kala anweba bene amba mwatana bupopweshi nangwa’mba kipwilo kya kine. Kyanema bingi kushiinwa’mba kine mwibutana. Mambo ka? Mambo byonka byo kyajinga mu myaka kitota kitanshi, kwakonsha kwikalatu bupopweshi bumo bwa kine. Abya nanchi mwakilangulukapo kala kupesapesa ne kumona kana abo bupopweshi bwenu bwayila monka mwayijile ñiñijilo yaingijilangamo kipwilo kya bwina Kilishitu kya mu myaka kitota kitanshi kyalamachila mu bukishinka ku mafunjisho akwa Yesu Kilishitu nyi? Mambo ka ne kwibupesela pesela lonka luno ne? Bakamonyi bakwa Yehoba baji na lusekelo lwa kwimukwasha kuba kino.—Byubilo 17:11.

[Bipikichala pa peja 5]

Nanchi bupopweshi bwenu bulondela monka mwaubijilenga bena Kilishitu batanshi mu kusapwila ne kufunjisha nyi?