FWENYAI KWIPI NE LESA

“Tala! Mbena Kwalula Bintu Byonse Kwikala ke Bipya”

Nanchi mukebesha kwikala na bumi bwawama ne kwikala myaka yavula anweba ne kisemi kyenu nyi? Nanchi mukeba kwikala mu ntanda mukabula misongo, buyanji, ne lufu nyi? Bwikalo bwa uno mutundu kechi bwa kufwanyikizhatu ne. Kwambatu kine, ntanda ipya ya bololoke, katatakatu ikekaleko. Akimonai bikafika milaye yanji yanembwa pa Lumwekesho 21:3-5.—Tangai.

“[Lesa] ukebashimuna mipolo yonse ku meso abo.” (Lumwekesho 21:4) Ñanyi mutundu wa mipolo yo akashiimuna? Kechi mipolo iya na mambo a lusekelo nangwa yoya ya mu mesotu ne. Uno mulaye wa Lesa ubena kwamba pa mipolo iya na mambo a buyanji ne bulanda. Lesa kechi ukashimunatu ino mipolo ne, ukeishimuna kikupu kupichila mu kufumyapo bintu bilengela kujila nabiji, buyanji ne bulanda.

“Ne lufu.” (Lumwekesho 21:4) Kafwako kintu kilengela kujila kukila pa lufu ne. Yehoba ukapokolola bantu balukokelo ku buzha bwa lufu. Ukoba byepi bino? Kupichila mu kufumyapo kine kintu kilengela lufu: bundengamambo bwafumine kwi Adama. (Loma 5:12) Yehoba ukalengela bantu baji na lukokelo kwikala balumbuluka kupichila mu bukuzhi bwa kwa Yesu.a Bino, mulwanyi ukapelako ke lufu kabiji ‘ukonaunwa.’ (1 Kolinda 15:26) Bantu bakishinka bakekala byonka Lesa byo akebelenga ko kuba’mba bumi bwawama bwa myaka ne myaka.

“Nangwa misongo kechi bikekalako jibiji ne.” (Lumwekesho 21:4) Misongo ya mutundu ka ikabula kwikalako jibiji? Yonse misongo iya na mambo a bundengamambo ne bumbulwakulumbuluka kabiji ilengela bantu bavula kwikala na bulanda kechi ikekalako jibiji ne.

Bwikalo bwa kubula kujila, lufu, ne misongo katatakatu bukekaleko. Bino mwakonsha kwipuzha amba, ‘Pano kwepi?’ ‘Nanchi mulaye wa Lesa waamba pa bumi bwa mwiulu nyi?’ Ine. Monai byo kyaikela bino. Patanshi, byambo bya kutendekalako bya uno mulaye ke bya kuba’mba “tente wa Lesa ukekala na bantu,” kabiji bantu bekala pa ntanda. (Lumwekesho 21:3) Kyabubiji, uno mulaye waamba pa ntanda amba, “ne lufu kechi lukekalako jibiji ne” ko kuba’mba ntanda mwajinga lufu kechi ikekalako jibiji ne. Mwiulu kechi mwa kikalapo kala lufu ne, bino pa ntanda lwajingapo kufumatu ne kala. Ko kuba’mba mulaye wa Lesa wa bwikalo bwawama ukafika ponka pano pa ntanda.

Yehoba ukeba amba tuketekele mu mulaye wanji wa kuleta ntanda ipya ya bololoke. Panyuma ya kulumbulula mapesho akeya kulutwe, waamba pa mulaye wanji amba: “Tala! Mbena kwalula bintu byonse kwikala ke bipya.” Kabiji wanungapo amba: “Mambo bino byambo byakishinka kabiji bya kine.” (Lumwekesho 21:5) Mambo ka akubujila kufunjilapo bikwabo pa kuba’mba anweba ne balunda nenu mwikale pa bapopweshi ba lusekelo abo bakamonako bikafika mulaye wa Lesa?

Kutanga Baibolo mu December

1 Petelo 1-5; 2 Petelo 1-3; 1 Yoano 1-5; 2 Yoano 1-13; 3 Yoano 1-14–Lumwekesho 1-22

[Tubyambo twa mushi]

[Mabulañano pa peja 11]

Lesa ukashimuna mipolo ku meso a bantu iiya na mambo a buyanji ne bulanda