Bya Kuba pa Kuba’mba Mwiyowenga Kufunda Baibolo

YOSHUA bamupele mwingilo mukatampe. Bamwambijile kutangijila kisaka kya bena Isalela kutwela mu Ntanda ya Mulaye kabiji kwajinga mikiika ikatampe. Yehoba wamulayile’mba ukengilatu bulongo mwingilo ye amupele, kabiji wamutundaikile’mba: ‘Chinchika ne kukosa ne kulondela bulongo Mizhilo yami. Ukeitangenga mute ne bufuku pa kuba’mba ukalondelenga bulongo byonse byanembwamo. Mambo mu kuba bino, jishinda jobe jikawama kabiji ukobanga bintu na maana.’—Yosh. 1:7, 8.

Mu bino “bimye byakatazha,” ne atweba tupita mu makatazho akatampe. (2 Timo. 3:1) Byonka byo babuujile Yoshua, ne atweba twakonsha kuba bintu na maana inge saka tulondela mafunde a Yehoba. Twafwainwa kutanganga Baibolo pa juba pa juba ne kwingijisha mafunde ajimo inge ketupite mu meseko.

Nangwa byonkabyo, atweba bavula kitukatazha kufunda bulongo Baibolo ne kwiyowa. Pano bino, byo kiji kuba’mba kufunda Baibolo kwanema bingi, pitulukai mu kakitenguluzha ka kuba’mba “Esekai Kulondela ano Mashinda” pa kuba’mba mumone byakonsha kwimukwasha kufundanga bulongo Mambo a Lesa ne kwiyowa.

Nyimbi wa masalamo waimbile’mba: “Ntangijilai mu jishinda ja mikambizho yenu, mambo mo mo mmwena lusekelo.” (Sala. 119:35) Ne anweba mwakonsha kumwenamo lusekelo mu kufunda Mambo a Lesa. Inge ke mufunde Baibolo pa juba pa juba mukataanamo byambo byawama bingi bikemukwasha.

Nangwa kya kuba kechi mukatangijilanga kisaka kya bantu byonka byaubile Yoshua ne, bino kuji makatazho o mupitamo. Onkao mambo, byonka byaubile Yoshua, fundainga ne kulondela byonse byanembwa pa kuba’mba bimukwashe. Inge mwauba bino, ne anweba jishinda jenu jikawama kabiji mukobanga bintu na maana.