Ingijishai Bibena Kumweka Kuba’mba Bilete Lutundaiko
1 Nanchi mubena kukeba kwikala na lufunjisho lwawama lwa twajijila alo lukalengela butumwa bwenu kwikala bwakosa kimye kyonse ne kutundaika bantu kwikala na lusekelo mu Baibolo nyi? Ingijishai bibena kumweka mu ntanda ne mu nyaunda yenu, pa kutendeka misambo. Mwakonsha kwamba pa bibena kumweka mu mpunzha yenu ne mu kyalo nangwa bibena kumweka mwaya ntanda. Kimye kyonse bino bintu byaluka-alukatu. (1 Ko. 7:31) Aki monai bya kumwenako byalondelapo.
2 Buyanji mu bya bunonshi ne buyanji mu bwikalo bileta bingi Kijikila ku bantu. Onkao mambo, mwakonsha kwamba’mba:
◼“Nanchi mwaji kutelekako ku byambo pa waileshi ne kumvwa kuba’mba mitengo ya nungwako nyi? [tongolai kyanungwa mutengo]” Nangwa mwakonsha kwamba pa kubulwa nkito umvwe kuji kampanyi kakatampe kapanga bamingilo bavula. Kwesakana na byo mukeba kutwajijila kwisamba, mwakonsha kwipuzha’mba “Nanchi mwakilangulukapo ene mambo o kyakatezha kutana mwa kujiila nyi? nangwa mwakonsha kwipuzha kuba’mba “Nanchi mwalanguluka’mba lukatazho lwa kutana mwa kujiila lukatwajijilatu kikupu nyi?”
3 Masawakya a malwañano, nabiji bulwi mu bisemi nangwa pakachi ka bana ba sukulu, aala kitendekesho kya misambo ikwabo. Mwakonsha kwipuzha kuba’mba:
◼“Nanchi mwaji kutangapo mu nyunshipepala kuba’mba [tongolai kya malwa kyamwekele mu mpunzha yenu] nyi?” Kepo mwipuzhe jibiji kuba’mba “Nanchi kika kyo mwalanguluka kuba’mba kyo kilengela malwañano avula bibye pano pa ntanda?” nangwa kuba’mba “Nanchi mulangulukapo kuba’mba kukekala kimye kyo tukeumvwa bazhikijilwa nyi?”
4 Masawakya a miyulo, bitentanshi, nangwa kiwowo mu mapunzha apusana-pusana mwaya ntanda nabyo bilengela bantu kuta muchima ku byo mubena kwamba. Ku kya kumwenako mwakonsha kwipuzha kuba’mba:
◼“Nanchi Lesa ye ulengela [tongolaipo malwa amo afuma ku bilengwa na Lesa]?” Nangwa mwafwainwa kwamba pa kiwowo kyaubiwa katataka ne kwamba kuba’mba: “Umvwe bonse bakeba mutende, mambo ka o kwabujila kwikala mutende?”
5 Kimye kyonse labijilai bibena kumweka byo mwakonsha kwingijisha pa kutendeka mwisambo. Mashinda mwa kwambila aji mu buku wa Ukupelulula pa mutwe wa kuba’mba “Ifiponako fya Nomba Line,” pa mapeja 10-11. Nangwa kikale byonkabyo, chinuzhukai kutundaika mapolitikisi nangwa bya kwambaambatu. Mu kifulo kya byo byo, shinkamanai pa Binembelo ne pa Bufumu bwa kwa Lesa kuba’mba bo bukapwisha makatazho a bantu.