Kusapwila mu ino Ntanda Ibena Kwenda na Kwalauka Alaukatu
1 Bintu byo byalukapo nobe mu kukopa kwa jiso! Bantu bambapo bingi pa bya malwa biponako, kutama kwa bya bunonshi, milukuchi ya bya bumulwila ntanda nangwatu malwa akwabo apulumukatu. Kabiji bukiji bukiji babwela ke bakambeko bingi. (Byu. 17:21; 1 Ko. 7:31) Mu ino ntanda ibena kwenda na kwalauka alaukatu, twakonsha kuba byepi kuba’mba tusapwile bantu mambo a Bufumu?
2 Yukai Bintu Bibalengela Kwikala na Kijikila: Jishinda jimo ja kulengela bantu kutako muchima ku byo tubena kwisamba nabo ke kutongolapo bintu bimo byamweka kala. Byo akambizhenga banteleki banji kulangulukishapo pa byubilo byabo kwi Lesa, Yesu pa kimye kimo watongwelepo bya malwa bya ubiwe pa kyo kya kimye bantu byo bakilangulukilengapo. (Luka 13: 1-5) Byonkabyo, ne atweba pa kusapwila mambo awama, twafwainwa kutongolapo kintu kimo kyaubiwapo mu ntanda nangwa kyaubiwa koko kumpunzha kotuji kyakonsha kulengela bantu bamunyaunda yetu kutako muchima ku byotubena kwamba. Pano bino pa kwamba bino bintu, twafwainwa kujimuka kuchina twakatundaikako lubaji lumo lwa bumulwila ntanda nangwa bintutu bya mu bwikalo.—Yoa. 17:16.
3 Twakonsha kuyuka byepi bintu byo babena kulangulukapo bantu pa kyo kyo kimye? Jishinda jawama kampe ke ja kwipuzhatu jipuzho apa bino ke tuteleke. (Mat. 12:34) Kumwesha lusekelo mu bantu kwakonsha kwitulengela kuyuka byo babena kulanguluka ne kuyuka mwakwibepwizha jikwabo. Mukumbu yeakumbula muntu ye wakonsha kumwesha kijikila kijipo na bavula mu yo yo nyaunda, kabiji ye wakonsha kwimushinkwila ne jishinda ja kusapwilamo.
4 Nengezhai bya Kwamba: Pa kunengezha bya kwamba mu mwingilo wa mu bujimi mu ino ntanda ibena kwenda na kwalauka alaukatu, twakonsha kwingijisha mashinda akonsha kwitukwasha mwa kwambila aji mu buku wa Ukupelulula. Ano mashinda a mwakwingijishisha bintu bibena kumwekana aji pa mapeja 10-11, pa mitwe ya kuba’mba “Imisoka/Ukucingililwa ne Ifiponako Fya Nomba Line.” Byambo bikwabo biji mu Mwingilo Wetu wa Bufumu wa September 2000, pa peja 4. Pa kunengezha byakwamba, monai kuba’mba mwanengezhapo ne kinembelo kimo kyo musakukatanga.
5 Byotuyuka bintu byalauka alaukatu bilengela bantu ba mu nyaunda yetu kwikala na kijikila, twafwainwa kwalwila ñambilo yetu ya mambo awama ku byonkabyo bintu. Mujino jishinda, twamba na bantu pa bintu biji ku michima yabo. Mukuba bino, tukwasha bavula kuyuka Muntu ubula kwaluka mu byubilo ne mizhilo yanji.—Yako. 1:17.