“Nanchi Nkaviluka Nyi?”

¹ Pa kumvwina mukambizho wa kwa Yesu wa kuba’mba “yainga ... [“na kulenga,” NW] ba mu mikoka yonse ya bantu baluke ke bana ba bwanga,” ba kalume bavula ba kwa Yehoba bepana bavilukila ku mpunzha kuji kukajilwa kukatampe. (Mat. 28:19) Babena kulondela Paulo waumvwijile mawi a kuba’mba: “Abukilai muno mu bushiya mu Makedonya, mwitukwasheko.” (Byu. 16:9) Nanchi kino kyafwainwa kubiwa mu ñanyi jishinda?

² Tatulaiko Pachepache: Nanchi mu kipwilo kyenu muji nyaunda ibulwa kwingijilwamo javula nyi? Mwafwainwa kuta muchima ku kwingijila mu oo manyaunda. Saka mukyangye kufukula kuvilukila ku mpunzha ingi, isambai na bakulumpe mu kipwilo kyenu kuba’ mba bamone umvwe kyafwainwa kuba’mba muviluke. Umvwe mwinengezha kuviluka, mwafwainwa kwipuzha paina wenu wingijila kijiji umvwe wayukapo kipwilo kimo ko mwafwainwa kuya na kunungulwilako butumwa bwenu. Ku lubaji lukwabo, pa nyuma ya kwikala panshi ne kulangulukishapotu bulongo, mwakonsha kufukula kuya na kukwasha ku mpunzha ingi ya kyalo kyenu nangwa ku kyalo kingi. Umvwe luno lo lusako lwenu, anweba ne jibumba jenu ja bakulumpe mu kipwilo mwafwainwa kunembela ofweshi ya musampi kwiibula ko mubena kukeba kuya na kwingijila, ne kulumbulula bulongo mingilo yenu ya teokalasi ya ku nyuma. Kyafwainwa kwikala bulongo kufwakesha yo yo mpunzha saka mukyangye kufukula umvwe kya kuba mukaviluka kikupu nangwa ne.

³ Jimukai pa Mambo a Kuvilukila Kungi: Balongo betu bavula babena kuvilukila ku byalo bingi na mambo a kukeba bwikalo bwawama nangwa kuchiina lumanamo. Mu kuba bino, bamo bajilwa makusu pa mutwe ku bantu ba bujimbi-jimbi bebalaya kuba’mba bakebakwasha kwikala mu kyalo kyo babena kukeba kuvilukilako, bino ko kyakayanga bebebila mali ne kwibashatu bunke. Mu bimye bimo, bano bantu bakanjikizha bavilukila mu byalo byabo kuba bintu byatama nangwa kuba bya mu bufyamfya. Umvwe bakana, bebashatu bunke kuba’mba bemwene abo bene mu kyalo kya bene mo batwela. Akino kyalengela bamo kwikala mu makatazho abaya bingi kukila ne pa obajinga nao mu byalo byabo. Kimo kimye bakonsha kulomba nangwa balongo kuba’mba bebasungeko ne kwibakwasha mu bintu bikwabo, akyo kinungilapo makatazho akwabo pa bisemi bikwabo bya Bwina Kilishitu. Kino kyalengela bisemi bimo kwabenamo ne kukoka lwa ku mupashi na mambo a kubula kulanguluka bulongo pa mvilukilo ya uno mutundu.—1 Timo. 6:8-11.

⁴ Umvwe mubena kukeba kuviluka na mambo a kuchina lukatazho, labijilai kuba’mba makatazho ajitu konse, kechi konka komwikelatu ne. Onkao mambo, kyapela kushinda makatazho ku mpunzha yo mwapijilwa kala mambo mwayuka mulaka ne kisho kya bantu kukila kuya nakutendeka kipya kipya ku bwenyi ko mwabula kupijilwa.