Ingilainga na Lusekelo
1 Yesu waambile’mba pa kimye kya bukalama bwanji bantu bavula kechi ‘bakamuyuka’ ne, byonka byo kyajinga mu moba a kwa Nowa. (Mat. 24:37-39) Onkao mambo, kyaketekelwa kuba’mba, bantu bavula bakakana kuteleka ku mambo awama a Bufumu. Ikika kyakonsha kwitukwasha kutwajijila ba lusekelo byo tubena kwingila mwingilo wetu?—Sala. 100:2.
2 Kintu kitanshi, twafwainwa kuvuluka’mba buluwe bwetu ne mwingilo wetu wa kusapwila byafuma kwi Lesa. Onkao mambo, umvwe muntu uji yense wakana kuteleka kimye kyo tuji mu mwingilo, awo muntu kinetu ubena kukana Yehoba. Kuvulukanga’mba bukishinka bwetu mu kusapwila bumutokesha pa muchima kuketukwasha kwikala ba lusekelo kabiji batokelwa ku muchima byo tuji ba kwibyuba byambo bya Lesa.—Yako. 1:25.
3 Kya bubiji, kobakiji bantu bakonsha kwitabila jishinda ja Yehoba ja lupulukilo. Nangwa kya kuba’mba bamo kechi batako maana ne, kobaji bapasha mikooko babena kukonkanyiwa pamo, mu ano moba a kapelampako. Twafwainwa kutwajijila na kusapwila, “mu muzhi mukatampe nangwa muchuchu” ne “kwipuzhamo muntu wafwainwa.”—Mat. 10:11-13.
4 Ikalai na Mulanguluko Wawama: Bintu byatama bishimikizha bantu pa mambo a bupopweshi bwa bubela byalengela bamo kubwela pa nyuma. Bamo ‘basubakanatu ne kupelelwa’ na mambo a bwikalo bwa ano moba. (Mat. 9:36) Bavula bakonsha kukatazhiwa bingi na mambo akubula pa kupuma kuboko, kubula kuvimbilwa ku bikola ne kubula mutende. Kuyuka bino bintu kuketukwasha kutwajijila mu mwingilo wetu. Esekeshai kutatula kwisamba pa bintu biletela bantu kijikila mu nyaunda yenu. Bakwashai kumona’mba Bufumu bwa Lesa bo bonka bukapwisha makatazho onse. Tangai Binembelo ne kwingijisha bishinka bya kubula kupita mu mbaji biji mu mabuku pa kuba’mba mambo awama ebafike mu michima yabo.—Hebe. 4:12.
5 Ba kwibyuba byambo bya Lesa na lusekelo bavuluka kimye kyonse’mba: ‘Lusekelo lwa Yehoba bo bulume bwabo.’ (Ne. 8:10) Kechi twafwainwa kwikala na kinyenge ne. “Umvwe nzubo yafwainwa, kibusa kyenu kikale ponka: kabiji umvwe yabula kufwainwa, kibusa kyenu kimubwelele.” (Mat. 10:13) Yehoba ulenga lusekelo lwetu ne bulume bwetu kutwajijila byo tukoselamo na butekanye mu mwingilo wetu wazhila, kabiji upesha ne bukishinka bwetu.