Butemwe Bwitutundaika Kusapwila
1 Atweba Bakamonyi ba kwa Yehoba, twayukanyikwa bingi mambo a kwikala basapwishi babambakana basapwila buluwe bwa Bufumu. (Mat. 24:14) Bakamonyi kukila 6 milyonyi babena kusapwila mwaya ntanda; kabiji bapya nabo babajilwa pamo ne atweba kimyetu kitanshi kyo batatula kusapwila. Bonse bengilako uno mwingilo wa busapwishi babajilwa pamo.
2 Kika kitutundaika kwipana kwingila uno mwingilo wakatazha bibye? Kechi betukanjikizha nangwa kwitutundaika mambo a bintu bya ku mubiji nangwa’mba betutakaike ne. Kimye kitanshi kyo twatendekele kusapwila, atweba bavula twaumvwinenga moyo mambo a kwiumvwa’mba kechi twafikapo ne, kabiji ne bantu bo twasapwijilengako kechi batelengako muchima ne. (Mat. 24:9) Bavula betumona na kusapwila bakankalwa kuyuka kitutundaika. Pafwainwa kwikala kitulengela kuba’mba tutwajijilenga kwingila na mukoyo.
3 Butemwe Buji na Ngovu: Yesu walumbulwile bulongo mukambizho mukatampe pa yonse kimye aambile’mba ‘ukamutemwa [Yehoba, NW] Lesa wobe na muchima wobe yense, ne na mweo wobe yense, ne na maana obe onse, ne na bulume bobe bonse.’ (Mako 12:30) Butemwe bwa kutemwa Yehoba bwashinkamana pa kumusanchila kwetu byoaji Kalama wa mu Kulengwa konse, Mulenga wa bintu byonse ‘wafwainwa kutambula lukumo, ne buneme, ne bulume.’ (Lum. 4:11) Kafwako kyakonsha kwesakana na byubilo byanji bya kukumya ne.—Lupu. 34:6, 7.
4 Kuyuka ne kutemwa Yehoba kulengela kyeya kyetu kumweka ku meso a bantu. (Mat. 5:16) Kyeya kyetu kimweka byo tutakaika Yehoba pa mvula-bantu, byo tushimuna mingilo yanji yakukumya, ne kusampanya buluwe bwa Bufumu. Byonka biji malaika upita pakachi ka jiulu, tuji na “mambo awama a myaka ne myaka a kusapwila ... ku mikoka yonse ne ku bisaka byonse ne ku njimi yonse ne ku mitundu yonse ya bantu.” (Lum. 14:6) Butemwe bwetu bo bwitutundaika kusapwila mwaya ntanda yonse.
5 Bantu ba ku kyalo bamona mwingilo wetu wa busapwishi amba mwingilo wa ‘bumbulwamaana’ wafwainwa kusulwa. (1 Ko. 1:18) Bantu mwaya ntanda beseka na ngovu kukanya mwingilo wetu. Pano bino, butemwe bwetu bwa kishinka bwitukosesha kwamba byonka bya ambile batumwa’mba: “Kechi twakonsha kuleka kwamba bintu byo twamwene byo twaumvwine ne... . Atweba twafwainwa kukokela Lesa kukila bantu.” (Byu. 4:20; 5:29) Nangwa kya kuba’mba pekala milengulwila, mwingilo wa busapwishi watwajijila na kununguluka mu mapunzha onse a pano pa ntanda.
6 Butemwe botwatemwa Yehoba buji nobe mujilo utema witulengela kulumbulula byanji byawamisha. (Yele. 20:9; 1 Pe. 2:9) Tukatwajijila ‘kubula ba mu mikoka ya bantu byo auba ... mambo wauba bya kukumya’!—Isa. 12:4, 5.