Sapwilai Bakwenu byo Muji Balunda Bawama
1 Yesu waambile’mba ‘temwa mukwenu pamo byonka byo witemwa obe mwine.’ (Mat. 22:39) Kino kechi kya kuzhinaukatu ne, ‘mwibobila byawama bakwenu ba mu lwitabilo,’ nga mambo ka kutemwapo ne balunda nenu bo mwikala nabo kipi-kipi? (Nga. 6:10) Mu ñanyi mashinda?
2 Mu Kwiyukisha Anweba Bene: Nanchi bakwenu bo mwikala nabo mu kimasamasa bemuyuka’mba mwi Bakamonyi nyi? Umvwe ine, mambo ka o mubujila kwibafwakashisha kimye kyo muji mu mwingilo wa mu bujimi? Kuba bino kwakonsha kuleta byawama bingi! Nangwa umvwe kimupelela, basapwilai mu busapwishi bwa kushukilwa. Umvwe baji pangye, mwakonsha kwibamona saka bengila mu lubanza wabo nangwa sabenda na kololako maulu mu mukwakwa. Basolomokai na lusekelo. Isambai nabo pa byo mwaitabilamo, mpunzha kuji Nzubo ya Bufumu ne byubiwako, kabiji ne kwibakwasha kuyuka bonse batanwako baji mu kimasamasa kyenu. Betai ku kipwilo. Kasa musapwila mambo awama ku bonse bo mwayuka.—Byu. 10:42; 28:23.
3 Bwikalo Bwenu Bwawama: Bwikalo bwenu mu kimasamasa bushimikizha byavula pe anweba kabiji bwakonsha kwimushinkwila ne jishinda ja kusapwila. Kabiji bulengela ‘lufunjisho lwa Lesa kumweka bulongo.’ (Titu. 2: 7, 10) Mweshai lusekelo lwa kine kine ku bakwenu bo mwikala nabo mu kimasamasa. Bobilai bibusa ne kwibavulukapo. Kange mwibalubankanye nangwa kwiboba kyungwe ne. Umvwe umo wakolwa, mukwashai. Inge kisemi kimo po po kyavilukila mu kimasamasa kyenu, kitambulwilai bulongo. Byubilo byawama bya uno mutundu bisangajika bingi kabiji bitokesha Yehoba pa muchima.—Hebe. 13:16.
4 Mu Mwekelo ya Nzubo Yenu: Kwikala muntu wawama mu kimasamasa kuvwangamo ne kusunga nzubo yenu bulongo saimweka kipale. Nzubo ne lubanza inge byaikala na butooto bisapwila abyo bine. Nzubo ya busaji nangwa lubanza palalazhama biswaswa ilengela bantu kukana buluwe bwa Bufumu. Onkao mambo, kyanema bingi kusunga bulongo nzubo yenu, lubanza ne motoka wenu.
5 Kuta muchima bantu babula mu kipwilo kya bwina Kilishitu kumwesha’mba mwatemwa bakwenu mo mwikela. Kika kyakonsha kufumamo? ‘Pa kumona mingilo yenu yawama,’ bamo mwiabo ‘bakatumbijika Lesa.’—1 Pe. 2:12.