Nanchi Mwakonsha Kuya na Kwingijila ku Mpunzha Kuji Kukajilwa Kukatampe Nyi?
1 Abya mwakilangulukapo kala kuya na kwingijila ku mpunzha kubena kukebewa basapwishi ba Bufumu bavula nyi? Umvwe bemwita’mba ‘abukilai ... kuno mwitukwasheko,’ abya mwakonsha kuba byonka byaubile mutumwa Paulo nyi? (Byu. 16:9, 10) Mu bipwilo byavula mubena kukebewa bisemi byakoma ku mupashi nangwa bapainiya ba kuya na kukwasha kwingila mu nyaunda nangwa bakulumpe ne bankasho ba kukwasha kutangijila kipwilo. Mu mapunzha amo a mu mizhi, kimye kimo nyaunda ikalatu na tumizhi tucheche tuji palepa-lepa. Nzubo ya Bufumu ijiko pepi yakonsha kwikela pa mpunzha patalumukako. Kechi kwikalapo ne kwa kutwela nkito ne, kabiji kimye kimo kechi kukya bulongo ne. Abya mwakonsha kwipana kuya na kwingijila ku yo yo mpunzha nangwa kya kuba kuji makatazho auno mutundu nyi? Mwakonsha kwingila byepi bulongo?
2 Pakebewa Kwikala na Lwitabilo ne Luketekelo: Monka mo bamukambizhizhe kwi Lesa, Abulama wafumine ku muzhi wanji wa Ula ne kwenda makilomita 1,000 kuya ku Halana pamo na mukazhanji, mwana kolojanji, ne bashanji bakote, ba Tela. (Nte. 11:31, 32; Ne. 9:7) Kimye Tela afwile, Abulama saka aji na myaka ya kusemwa 75, Yehoba wamukambizhe kufuma ku Halana ne kusha balongo banji kuya ku kyalo kyamubujile Lesa. Kepo ba Abulama, Selai, ne Lota ‘baimene ke baye’ ne kuya. (Nte. 12:1, 4, 5) Kya kine, Abulama kechi wavilukile’mba aye na kwingijila kwakebewenga basapwishi bavula ne. Pano bino paji kyamulengejile’mba aviluke. Kika kyo?
3 Abulama wajinga na lwitabilo ne luketekelo, kyo kyamulengejile kuviluka. Wapimpwile milanguluko ne bwikalo bwanji kepo ne kusha balongo banji boaibijile nabo. Bino waketekejile’mba Yehoba ukamulama pamo ne ba mu kisemi kyanji. Byonkabyo, ne lelo jino bavula nabo baketekela mwi Yehoba.
4 Mwingilo wa pa ka Kimye Kacheche: Nanchi mwakitanapo kala mfweto ifuma mu kwingijila mu nyaunda ibulwa kwingijiwamo javula nyi? Bamo pa kuba byobyo, baendele misinso yalepa bingi. Abya nanchi bekatezhetu nyi?
5 Pa juba jabo jitanshi ja kusapwila mu nyaunda ibulwa kwingijiwamo javula, iji kumusela palepa makilomita 80 kufuma mu Lusaka, bamulume ne mukazhi bamo bataine wamulume mukote wafwilwa waikala myaka 8 kufuma kimye kyo afwishishe mukazhanji. Batatwile kumufunjisha mu buloshuwa ya Nanchi Lesa Ukebaka kabiji waubilenga bingi bulongo. Panyuma ya kupwisha lufunjisho 10, “Byubilo Lesa Byoashikwa” uno wamulume wafuukwile kuleka kupepa ne kupotesha fwanka yoapoteshanga pa nzubo yanji. Mulongo washimikizhe’mba: “byambo byonamutangijile byamufikile bingi pa muchima. Waubilepo ka? ... Wantajile ne kunshikisha’mba, ‘nafwainwa kuba byepi pakuba’mba ndeke kino kisela kyatama?’ Twamukoseshe kulomba kwi Yehoba moba onse.” Nangwa kya kuba javula byo bayanga na kumufunjisha lufunjisho lwa Baibolo bamutananga saomvwa bibi, wibasashijilanga amba: “Mwane mfunjishaiko ne jikwabo pacheche pa mambo a ntanda ya paladisa.” Kimye kyabo bano basapwishi byo kyafikile kya kubwela kwabo, uno mukote watwajijile na kukomenako ku mupashi. Wikilekele kuya ku chechi yoayangako kabiji walekele kupepa ne kupotesha fwanka pa nzubo yanji, mu kupita kwa kimye uno muntu wakolelwe ne kufwa. Pano bino kwingila na ngovu kwa boba basapwishi kwatwajijile na kupanga bipangwa, mambo balongo banji bamo pamo ne mwananji wamukazhi batatwile kufunda Baibolo. Basapwishi bavula baswa kuba’mba kwingijila ku mpunzha kuji kukajilwa nangwatu pa ka kimye kacheche kwibalengela kutemwa mwingilo wabo pakatampe. Ipuzhai baingijilapo kala ku mpunzha kuji kukajilwa, bakemubula byo bakosejileko ku mupashi kabiji inge baikala na jishuko ja kuya bakonsha kutemwa bingi kuyako ne jikwabo.
6 Kuya na kwingila pa ka kimye kacheche ku mpunzha kuji kukajilwa kwakonsha kulengela muntu kufunjilapo byavula. Onkao mambo, aba babena kukeba kuba byobyo bafwainwa kuyukila jimo biji mpunzha ko bakavilukila pa kuba’mba bamwenepo jimo ‘tumali’ mwakukekwashishanga.—Luka 14:28.
7 Kuvilukila ku Mpunzha Kuji Kukajilwa Kukatampe: Yehoba ukeba amba mambo awama asapwilwe “panopantanda ponse” mpelo saka ikyangye kwiya. (Mat. 24:14) Byo mwayuka kino, abya mwakonsha kwipana kuvilukila ku mpunzha kuji kukajilwa kukatampe nyi? Mapunzha muji kukajilwa avula bingi.
8 Nanchi mwatambula penshonyi nyi? Muji na mwakutaina mali? Umvwe ine, mwakonsha kufundapo kakito kamo ka kwiingijila anweba bene? Abya mwakonsha kwikala ku mpunzha ingi ne kwibijila bwikalo bujiko nyi? Inge kechi mwakonsha kuviluka ne, nanchi mwakonsha kukwasha wa mu kisemi kyenu kuya na kwingijila kungi nyi?
9 Umvwe panyuma ya kulangulukapo na lulombelo mwatana kuba’mba mwakonsha kuviluka ne kuya na kwingijila kuji kukajilwa kukatampe, isambai na ba mu kisemi kyenu ne bakulumpe mu kipwilo kyenu, apa bino munembe nkalata ne kupa bakulumpe mu kipwilo kuba’mba nabo banembepo byo babena kwimumona pamo ne byambo bya kwimuswisha saka bakyangye kwiituma ku ofweshi ya musampi.
10 Byambo ka byo mwakonsha kunemba mu nkalata yenu? Nembaimo myaka ya kusemwa yo muji nayo, juba jo mwabatizwe, mwingilo ye muji nanji mu kipwilo, lumbululai umvwe muji mu masongola nangwa ne, kabiji mutongole umvwe muji na baana babacheche nangwa ne. Tongolai kipwilo kyo mukeba kuya na kwingijilako, kwesakana na byo mukeba anweba bene.
11 Umvwe musapwishi ukeba kuvilukila ku kipwilo kitalwapo na ofweshi ya musampi ungi, Kometi ya Mwingilo wa Kipwilo yafwainwa kutuma nkalata ya yewo muntu pamo na yabo ya kumuswisha, ku musampi utala pa kyokyo kipwilo. Mwakonsha kutana makeyala a misampi pa peja yapelako ya Yearbook yakatataka.
12 Abya mwabambakana kabiji mwakonsha kwitatwilako nyi? Nanchi mwakonsha kwingijila kuji kukajilwa kukatampe nyi? Umvwe ibyo, mukamona Yehoba byo atwajijila na kwitulwila bibusa pa bantu bepana kabiji bamuketekela!—Sala. 34:8; Mala. 3:10.