Kwikosesha Atwe Bene Nabene
1 Moba onse bantu ba Yehoba bapita mumeseko alwitabilo lwabo. Byoayuka’mba kimye kyanji kekicheche, Diabola ubena kwitulukuka japelako kuba’mba onaune bulumbuluke bwetu kwi Yehoba. (Lum. 12:12) Kyanema bingi kuba’mba ‘twikoseshenga mwi Nkambo, ne mu bulume bwa ngovu yanji’ kuba’mba ‘tukonshe kwimana saka twakosa mu juba jibi; ne pa kupwa kuba byonse, saka twaimana.’—Efi. 6:10, 13.
2 Kupwila pamo nabakwetu bamulwitabilo kelunengezho lwafuma kwi Yehoba lwakwitukwasha kwikala bakosa. Mutumwa Paulo waumvwine mwatala kino. Wakebeshe bingi kupwañena pamo nabalongo banji babwina Kilishitu kuba’mba ‘bekwashe bene na bene’ ne ‘kwikosesha.’ (Loma 1:11, 12) Pakwitukosesha kuba’mba tubenga kyaswa muchima wa Lesa, Jibumba Jitangijila mubutemwe janengezha kimye kyakutana buwame mukwikosesha atwe bene nabene Pakupwila Kwankambi kukekalako kwa “Bamukoyo Wakutaya Mbila ya Bufumu.”
3 Mukatanweko Kuba’mba Mukafunde: Monai kuba’mba mwatanwako moba onse asatu. ‘Tumwenamo byawama’ umvwe ketufike lwimbo mutanshi saka akyangye kutatula nekupembelela twaambako amba “Amena” kufuma panshi yamuchima wetu mululombelo lwakupezhako. (Isa. 48:17, 18) Bavula bakakeba kupimpula mutanchi wabo wamingilo sakukiji kimye kuba’mba bakatanweko moba onse asatu. Kimo kimye, bakulumpe benu bankito kuba bemupa kimyene, bino tuji naluketekelo mwi Yehoba kuba’mba uketukwasha kuba kyaswa muchima wanji. (1 Yoa. 5:14, 15) Umvwe tukyangye kuba kinone, kino kyonka kyokimye kyakunengezha byañendelo nemwakukalaalanga, kechi kupembelela amba nangwa kikekale byepi bintu bikawamane. Twaketekela namba Yehoba uketupesha kuba’mba tukatanweko moba onse asatu.—Mana. 10:22.
4 Tengelainga Kukekosesha Anwe Bene Nabene: Abya mwakifumapo pakupwila kwankambi, samwamba’mba: “Akwa kwajinga kupwila kwawama kukyangye kubiwapo kala!” Kika kyomwiumvwijile mujino jishinda? Mambo byotuji bantu bambulwakoloka twakonsha kutembuka, kyakuba ketukebe kwitukosesha kumupashi. (Isa. 40:30) Nyenga umo walondolwele’mba: “Buno bwikalo botujimo buntembusha bingi, pano kupwila kunkosesha bingi kuta muchima jibiji kumupashi, kumpa bulume bonakajilwa kumupashi. Kimwekana nobe lutundaiko lonkeba lungishila ponka pakimye ponelukebesha.” Kampepo nenuwa mwiumvwapo kala bino.
5 Lutundaiko lotutambula kechi lwishilatu monka mumajashi nemisambo yamepuzhone, lwishila nemukajo kakwabo kakumupashi kekalako pakupwila kwankambi. Mulongo umo waambile’mba: “Mfundapo lufunjisho lwapela kumvwa, luji mumafunde amu Baibolo omfunda. Kwambatu kine, bifwanyikizho bikalako byawama bingi mambo bitukwasha kuyuka byotwakonsha kufunjilako kubyamwekejile bakwetu kala, byawama nebyatama. Mabuku akatataka alupulwa byobintu byonkeba kutambwila, kabiji ntemwa bingi kutangamo kimye kyabaya umvwe nabwela kunzubo.”
6 Kupwila kwankambi kelunengezho lwawama kufuma kwi Yehoba mubino “bimye byakatazha.” (2 Timo. 3:1) Kwitukwasha kumvwisha lujimuno lwanembeshiwa amba: “Labainga ne kukenkenta, koselai mu lwitabilo, ikalai byafwainwa banabalume, kosai.” (1 Ko. 16:13) Onkao mambo, twayai tufuukule mumuchima wetu kuba’mba tukatanweko kubipungu byonse nekwikosesha atwe bene nabene pakuno Kupwila kwetu Kwankambi kwa “Bamukoyo Wakutaya Mbila ya Bufumu”!
[Kitenguluzha pa peja 3]
Mwenai Jimo Mwakuba’mba Mukatanweko Moba Onse Asatu
■ Lombai lūsa kunkito kuba’mba bakemupe moba.
■ Nengezhai bulongo mwakukalaalanga.
■ Kokwezhai byañendelo pakuya kukupwila kwankambi.