Sapwilai Mambo A Bufumu
1 ‘Nafwainwa nsapwile mambo awama a bufumu bwa Lesa, mambo kyo kyo natuminwe.’ (Luka 4:43) Mubino byambo, Yesu watongwele mutwe mukatampe wabusapwishi bwanji, neuno mutwe kekusapwila Bufumu bwa Lesa. Neatweba lelo jino tusapwila mambo a Bufumu, byonka byokyaambijilwe jimo mu Mateo 24:14 kuba’mba: “Ano mambo awama a bufumu akasapwilwa panopantanda ponse mwa kwibashimwina ba mu mikoka yonse ya bantu; bino ke ku mpelo.” Nanchi bukineka bantu bobafwainwa kumvwa pamambo a Bufumu bwa Lesa?
2 Bufumu bwa Lesa bubena kulama mwiulu kabiji katatakatu bukapinge pabukalama bwabantu bonse. Diabola bamwelele kala kufuma mwiulu kabiji nebuno bwikalo bubi botujimo bwatwela mumoba apelako. (Lum. 12:10, 12) Buno bwikalo bwakwa Satana bubi bukonaunwatu shata, pakuba Bufumu bwa Lesa abo bukekala myaka nemyaka.—Da. 2:44; Hebe. 12:28.
3 Buno Bufumu bukapa bantu balukokelo bonse bintu byawama bisaka muchima wabo. Bukakuula bantu kumalwa a nkondo, bumbanzhi, kumanyikwa, nebuyanji. (Sala. 46:8, 9; 72:12-14) Bantu bonse bakekala nakajo kavula. (Sala. 72:16; Isa. 25:6) Bikola ne bulema kechi bikekalako jibijine. (Isa. 33:24; 35:5, 6) Kimye bantu kyobakekala balumbuluka, ino ntanda ikalulwa kepaladisa kabiji bantu bakekala bakwatankana.—Isa. 11:6-9.
4 Tumwesha kuba’mba tukeba kukekala bangikazhi bamubobwa Bufumu bwa Lesa mubyubilo byotuba mubwikalo bwetu luno lonka. Mambo a Bufumu afwainwa kulama bulongo bwikalo bwetu bonse kwikala bantu babyubilo byawama, kuvwangakotu nebikonkwanyi nebintu byotwibikila kwikala bitanshi mubwikalo bwetu. Kyakumwenako, nangwa kyakuba tuji namutembo wakukebela bamunzubo yetu bintu bikebewa, kechi twafwainwa kutongokelatu mukukeba bintu byakumubiji nekuchakulapo kukebesha bufumu bwa Lesa ne. (Mat. 13:22; 1 Timo. 5:8) Twafwainwa kumvwina lujimuno lwakwa Yesu lwakuba’mba: “Nanchi sambilai kukebesha bufumu bwanji, ne bololoke bwanji; ne bino bintu byonse [bintu byakumubiji bikebewa mubwikalo] bikemubikilwapo.”—Mat. 6:33.
5 Kino kyokyonka kimye kyafwainwa bantu kumvwa mambo a Bufumu nekufuukulapo saka kukiji kimye. Twayai twibakwashe kuba kino na “kweseka kwibetabisha bya mu bufumu bwa Lesa.”—Byu. 19:8.