Nanchi Mupana Sawakya Wenu Wakine Kuba’mba Abajilwe Pamo Namasawakya Onse Amwingilo Wamubujiminyi?
1 Mashimikila avula amu Baibolo amwesha bibelengelo bikwasha kuyuka bulongo kintu kyamwekele pakyokyo kimye. Kyakumwenako, Gidiona wavizhizhe kampu wabena Mijanyi nabanabalumetu 300. (Mito. 7:7) Malaika wa Yehoba waipaile bashilikale babena Asilya 185,000. (2 Mfu. 19:35) Pa Pentekosta mu 33 C.E., bantu 3,000 babatizwe kabiji palutwe kacheche bakwabo baitabijile bavujile ke 5,000. (Byu. 2:41; 4:4) Ano onse mashimikila amwesha kuba’mba bakalume ba Lesa bakala bebikishangako bingi namukoyo kunemba kibelengelo kyakine.
2 Jibumba ja Yehoba lelo jino jitukambizha kupana sawakya wetu wamumwingilo wamubujimi pañondo pañondo. Kumvwina uno mukambizho nabukishinka kukwashako mwingilo wabusapwishi kutangijilwa bulongo. Sawakya yeubulañana umvwe kyakuba kuji lubaji lumo lwamwingilo lubena kukebewa kwingijilapo, kabiji yeubulañana inge kyakuba kumpunzha imo yamwingilo kubena kukebewa bavula bakwingijilako. Mukipwilo, sawakya wamubujimi ukwashako bakulumpe mukipwilo kukonsha kumona baji nabulume bwakubaisha mwingilo wabo kabiji nekuyuka bakeba kwibakwashako. Kabiji masawakya amwesha kukomenako kwamwingilo wabusapwishi, atundaika balongo betu babwina Kilishitu bonse. Nanchi mupana sawakya wenu wakine kuba’mba abajilwe pamo namasawakya onse amwingilo wamubujiminyi?
3 Mutembo Wenu: Pakupwa kwañondo, nanchi kimukatazha kuvuluka byomwaingila mumwingilonyi? Umvwe kimukatazha, nga mamboka nekuba samunemba mingilo yenu kimye kyonse kyomwaingila mumwingilo wamubujimi? Bamo banemba pa kalenda nangwa mukabuku ka dayali. Bakwabo basenda kapepala kabo kakunembapo mwingilo wamubujimi sabenda kunembapo. Pakupwa kwañondo kechi mwakonsha kukankazhamane, bukiji-bukiji panai sawakya wenu kumukulumpe walufunjisho lwabuku. Nangwa inge mwakeba, mwakonsha kubika sawakya wenu mukabokoshi kamasawakya mu Nzubo ya Bufumu. Inge mwalubako kupana sawakya wenu, pelawizhai kumona mukulumpe walufunjisho lwabuku kukila kupembelela’mba kana akemwambile. Kupana sawakya wenu wamwingilo kimwesha kuba’mba munemeka lunengezho lwa Yehoba, nekumvwina balongo bapewa mwingilo wakutambula masawakya onse nekwiabajila pamo.—Luka 16:10.
4 Mwingilo Wamukulumpe Walufunjisho lwa Buku: Mukulumpe walufunjisho lwabuku byoaji kafunga, utako bingi muchima kumingilo yajibumba janji muñondo yense. (Mana. 27:23) Uyuka musapwishi yense umvwe wingila nangovu kimye kyonse kabiji nenalusekelo, kabiji upelawizha kukwasha yense wabujile kwingila muñondo yense. Javula muntu wauno mutundu ukwashiwatu nabyambo byakumutundaika, kumubulako jishinda mwakubila, nangwa kwingijila nanji pamo mumwingilo wamubujimi.
5 Mukulumpe walufunjisho lwabuku umona’mba yense mujibumba janji wapana masawakya amwingilo wabo pakuba’mba kikwasheko munembeshi mukipwilo kutuma sawakya wakine kuofweshi yamusampi pajuba jabutanu najimo jañondo walondelapo. Kyakonsha kuwama mukulumpe walufunjisho lwabuku umvwe keavululemo bonse mujibumba janji kuleta tupepala twamasawakya abo umvwe kekunangijila kumpelo yañondo. Inge kyakuba bamo bajitu namuteeto wakubula kuleta masawakya abo, wakonsha saebavululamo nekwibatundaika monka mokyayila.
6 Kupana masawakya amwingilo bukiji-bukiji kukwashako kuyuka bulongo sawakya wakine wabyaingijiwe mwingilo wamubujimi. Nanchi mupananga sawakya wenu wamwingilo pañondo pañondonyi?