Nanchi Mwi bakataya Mbila ba Bufumu ba Kimye Kyonse Nyi?
1 Bonse twasangalele bingi pa kumvwa’mba Zambia yafika pa mpendwa ikatampe ya basapwishi 107,233, mu August 1999. Kine kine kwajinga kwibikako ne kwingijila pamo mu buumo! Pano bino mukupita kwa kimye kyamwekele kuba’mba mu ba ñondo balondejilepo, basapwishi bamo bajinga na lukatazho lwa kwikala bakataya mbila ba Bufumu ba kimye kyonse, mambo avareji ya basapwishi batuma lipoti kila-ñondo kufuma kyo kya kimye ke 92,000. Kino kibena kumwesha kuba’mba musapwishi umo mu kila-basapwishi 7 kechi utuma lipoti wa mwingilo wa butumwa kila-ñondo ne. Twaketekela kuba’mba lutundaiko luji panshi pe lwakonsha kukwasha kupwisha luno lukatazho.
2 Sanchilai Jino Jishuko: Twafwainwa kwikala na lusanchilo lukatampe pa jishuko jo tuji najo ja kusapwila mambo awama a Bufumu ku bantu bakwabo. Uno mwingilo usangajika muchima wa kwa Yehoba ne kukwasha bantu bakishinka kufunda jishinda jiya ku bumi. (Mana. 27:11; 1 Timo. 4:16) Kusapwila kimye kyonse kwitulengela kwikala bapilwa mu butumwa ne kwituletela lusekelo kuba’mba tubena kwingila.
3 Tumai Lipoti wa Mwingilo Wenu: Bamo bekalamo na lubaji mu mwingilo wa mu bujimi bomvwa mukose kutuma lipoti wa mwingilo wabo pa kimye kyafwainwa. Kechi twafwainwa kulanguluka’mba mwingilo ye twaingijile kechi wawaina lipoti ne. (Esakanyaiko Mako 12:41-44.) Mu jishinda jonse, twafwainwa kutuma lipoti wa mwingilo wetu ye twaingijile! Kupichila mu kwikala na jishinda jimo janengezhiwa bulongo pa nzubo, na biji ja kwingijisha kalenda kunembapo maola o mwaingijisha mu butumwa kikekala kya kwimuvululako kimye kyonse kunemba lipoti yaluñama ne kwiituma bukiji-bukiji ku mpelo ya kila-ñondo.
4 Panai Bukwasho Bukebewa: Kimye kimo mwakonsha kuwamyako ñiñijilo ya pa kipwilo kyenu pa kuba’mba mukwasheko babena kukeba bukwasho bwa kwikalamo na lubaji mu butumwa kimye kyonse. Kanemba wa kipwilo ne batangijila masambijilo a buku bafwainwa kutanchika kuba’mba basapwishi bapijilwa bakwashengako basapwishi bakwabo babula kupijilwa mu butumwa. Umvwe muji na bana, nangwa basambi ba Baibolo, bino sabaji basapwishi babula kubatizhiwa, bafunjishai kutuma lipoti wa mwingilo wabo kila-ñondo.
5 Vulukai jishimikila jiji mu Ulupungu lwa kwa Kalinda lwa October 1, 1997 jiji na mutwe wa kuba’mba: “Ndetasha Pa Myaka Ubwingi Nabombela Yehova,” jaamba pa bwikalo bwa kwa nyenga Ottilie Mydland wa mu kyalo kya Norway . Uno nyenga waikele musapwishi wa kimye kyonse wa mambo awama saka akyangye kubatizhiwa mu 1921. Byo papichile myaka 76, saka aji na myaka ya kusemwa 99, waambile’mba: “ Nji na lusekelo pakuba kyakimfwainwa kwikala musapwishi wa kimye kyonse.” Byo ajipo mulanguluko wawama ye bafwainwa kulondela ba mwingilo ba kwa Yehoba bonse!