Kufunda ku Basapwishi ba Bufumu Bapijilwa

Tumwenamo bingi pa kwikala na basapwishi ba bufumu bapijilwa kwingila mu busapwishi mu kipwilo. Bamo basapwishi baingijila Yehoba mu bukishinka pa myaka yavula bingi. Kabiji bakwabo nabo bafundatu katataka mashinda awama a kwingijilamo busapwishi. Bano basapwishi bamona Yesu byo atangijila kipwilo kya bwina Kilishitu mu ano moba apelako kupichila mu mwingilo wa kufunjisha bantu kwikala baana ba bwanga. (Mat. 28:19, 20) Kupichila mu kwingilako uno mwingilo, bano bantu batambula “bulume bwakila bwa bantu,” kimye kyo bapita mu makatazho ne meseko. (2 Ko. 4:7) Mwakonsha kufunjilako bintu byavula bingi ku bano basapwishi babanda mu bukine. Bano basapwishi bakonsha kufunjisha bakwabo bintu byawama byo bafunda. (Sala. 71:18) Onkao mambo, twafwainwa kwikalangako na kimye kya kufunda kwi abo. Pano mu ñanyi mashinda?

Mu Mwingilo. Pa kuba’mba bengilenga bulongo mu mwingilo, basapwishi bapijilwa ne babula kupijilwa mu busapwishi bafwainwa kufundanga bya kwingila uno mwingilo. Twakonsha kufunda byavula kupichila mu kumona bingila basapwishi bapijilwa. (Monai mutwe wa kuba’mba “Twajijilai Kwikala na Mukoyo mu Mwingilo,” mu Kyamba kya Usopa kya February 15, 2015, mu jifuka ja busatu pa kamutwe kacheche ka kuba’mba “Kwashai Babula Kupijilwa.”) Mwamwenamo byepi mu kwingila na bano basapwishi bapijilwa mu mwingilo?

Ingilaingako na basapwishi bapijilwa mu busapwishi. Inge uno musapwishi wapijilwa ukolwa kolwa mwakonsha kusenda muntu ye mufunjisha Baibolo ne kuya ku nzubo yanji na kufunjilako. Panyuma ya kufunda, shikishai uno musapwishi pa byo mwaji kufunjishanga pa kuba’mba emubuuleko pa byo mwaji kufwainwa kuba.

Isambainga Nabo: Yukai bano basapwishi bapijilwa kupichila mu kwisambanga nabo. Betaingako ku kupopwela kwenu kwa kisemi pa kuba’mba mwibepuzhengako. Inge uno musapwishi ukolwa kolwa, mwakonsha kwikela na kupopwela kwenu kwa kisemi ku nzubo yanji. Bepuzhai kibalengejile kwiya mu bukine. Ñanyi bintu byawama byo bamwenamo? Ñanyi kuyilako palutwe mu mwingilo wa Lesa ko bemwena? Ñanyi bintu bibaletela lusekelo mu mwingilo wa Yehoba?

Twafwainwa kuyuka kuba’mba basapwishi bapijilwa nabo kuji bimo byo bakankalwa kuba, onkao mambo, kechi twafwainwa kukebanga’mba betukwashengatu mu bintu byonse ne. Byonka byo tuji atweba bonse, basapwishi bapijilwa nabo baji na busendwe bwapusana pusana bwa mu mwingilo. (Loma 12:6-8) Bamo bakoma, kabiji kino kyakonsha kwibalengela kubula kwikala ne atweba kimye kyabaya. Nangwa byonkabyo, twakonsha kufunjilako bintu byavula mambo a bintu byo bapitamo pa kwingijila Yehoba mu bukishinka.