Kukwashañana Pakimye Kyafwainwa
1 Mutumwa Petelo byoamwene’mba kyafwainwa kukoseshako bakwabo bamulwitabilo, butemwe boebatemenwe bwamuzakwile muchima kuba’mba ebavululeko bintu bimo mubutemwe nekwibatundaika. (2 Pe. 1:12, 13; 3:1) Wakambizhe ‘boba batambwile lwitabilo’ kutwajijila nakukomenako mubyubilo byakumupashi kuchina ‘kwikalatu, nangwa kubula kupanga bipangwa bya maana a kumuyuka Nkambo yetu Yesu Kilishitu.’ (2 Pe. 1:1, 5-8) Kyoakebelenga Petelo kekumona kuba’mba wibakwasha kuvulukanga lwito nekusalwa kwibasajile Yehoba, pakuba’mba ‘bakatanwe mu mutende, kasa babula biko ne bulema ku meso anji.’ (2 Pe. 1:10, 11; 3:14) Luno lutundaiko lwanji lwakwashishe bingi bantu bavula.
2 Lelo jino, bakulumpe babwina Kilishitu nabo bata bingi muchima bantu ba Lesa. Mubino “bimye byakatazha,” bakalume bavula ba Yehoba bafwainwa babena kuchinchika bingi makatazho ebamwekela mubwikalo bwabo. (2 Timo. 3:1) Namambo amakatazho abula kupwa nabiji kukajilwa kwamali, makatazho amuntu mwine, bamo bakonsha kwiumvwa byonka biumvwine Davida amba: “Bibi byabula kukonsheka kubala byanzhokoloka: Bubi bwami bwankwata, kechi nakonsha kwinuna mutwe ne; Byakila mu kuvula kwa nsuki ya pa mutwe wami; Ne muchima wami wapungila.” (Sala. 40:12) Ano makatazho akonsha kubaya kyakuba’mba bantu bamo bauno mutundu bakonsha kulubako mingilo yabo yanema yakumupashi nekuleka kwingijisha mumwingilo wabwina Kilishitu. Bino nangwa kyakuba bekala namakatazho abyepi, ‘kechi bavulama mikambizho ya Yehoba ne.’ (Sala. 119:176) Pano kino kyo kimye kyafwainwa bakulumpe mukipwilo kukwasha bantu bauno mutundu.—Isa. 32:1, 2.
3 Pakuba’mba bakwashe bano bantu, bakulumpe mukipwilo batundaikwa kwibikako kuya nakukwasha boba babena kubula kuya mumwingilo wakusapwila. Uno mukwekele wakwibakwasha pano watendeka, usakutwajijila shoo kufikatu nekumpelo yañondo wa March. Bakulumpe balufunjisho lwa buku balombwa kuya nakufwakesha bakoka nekwibakwasha kumupashi namulanguluko wakukeba kwibakwasha kutendeka mwingilo wabo mukwingijila pamo nakipwilo. Yebamona kuba’mba lufunjisho lwa Baibolo lwakonsha kumukwasha, lwakonsha kunengezhewa. Basapwishi bakwabo bakonsha kulombwa kuba’mba bamukwashe. Umvwe kyakuba bemulomba kuya nakukwasha muntu wakoka, kine mingilo yenu yakonsha kukwasha yewo muntu, kikatakata inge samubena kumukosesha namuchima wakifyele nekuyuka bulongo byoaji.
4 Bonse mukipwilo kine basekela bingi pakumona muntu wakokele watendeka mwingilo wanji mukwingijila pamo nakipwilo. (Luka 15:6) Kwibikishako kwetu kwakukwasha bakoka kwakonsha kwikala kyakine ‘kyambo kyaambiwa pakimye kyafwainwa.’—Mana. 25:11.