Lunengezho Lwakatataka lwa Malaibulale amu Nzubo ya Bufumu

Malaibulale amu Mazubo a Bufumu atelwanga kala amba Laibulale wa Sukulu ya Mwingilo wa Teokalasi akwasha bingi bipwilo byavula mwaya ntanda yonse. Mumyaka yakunyuma kyamwenwe kuba’mba kipwilo kyonse kyafwainwa kwikala nalaibulale wakyo. Pano luno byokimweka kuba’mba Nzubo ya Bufumu imo mupwila bipwilo byavula byamba milaka yapusana-pusana, kyamweka kuba’mba kyawama kwikalatu nalaibulale umo mu Nzubo ya Bufumu muji mabuku onse aino milaka yonse. Mu Nzubo ya Bufumu iji nabibamba kukila pakimo, kibamba kimo kimo kyafwainwa kwikala nalaibulale wakyo muji mabuku amilaka yonse yabipwilo bipwila mukyokyo kibamba.

Kyaketekelwa kuba’mba luno lunengezho lukakwashako kwikala nampunzha mukachi nekubula kutaya mali avula mukupota byakupota-pota. Kabiji kikwabo, kwikalatu nalaibulale umo muji mabuku abipwilo bibiji nangwa kukilapo, kukakwasha kwikala namalaibulale awama bulongo. Bipwilo byavula inge byaikala nalaibulale umo, mwakonsha kutanyiwapo mabuku amo asubukapo akukonsha kutwala ku Mazubo a Bufumu akatataka umvwe ashimikwa. Umvwe mu Nzubo ya Bufumu muji kompyuta iji na Watchtower Library mu CD-ROM, bamo bakonsha kwiingijisha.

Mulaibulale ya mu Nzubo ya Bufumu imo imo mwafwainwa kwikala utala pamabuku ajimo, kikatakata mukulumpe umo utangijila Sukulu ya Mwingilo wa Teokalasi yewafwainwa kutalanga pabiji mulaibulale. Wafwainwa kubikamo mabuku abena kukebewa abulamo, nekunembamo bulongo tuyukilo pankupo yamukachi kumwesha kuba’mba amu laibulale ya mu Nzubo ya Bufumu. Kampe jimo pamwaka pamwaka wafwainwa kutalatalanga bulongo mulaibulale nekumona inge mabuku onse moaji kafwamo wataikane kabiji nebutuntulu bwao. Mabuku amu laibulale kechi afwainwa kusendewa kufuma mu Nzubo ya Bufumu ne.

Bipwilo byonse bipwila mu Nzubo ya Bufumu muji laibulale bitwajijila kulama bulongo laibulale. Onkao mambo, twayai tumweshenga kuba’mba twanemeka luno lunengezho kupichila mukulama bulongo laibulale nekupesa-pesa mumabuku ajimo ‘maana a kumuyuka Lesa.’—Mana. 2:5.