Yehoba Wafwainwa Kutotwa Pakatampe
Kijiilo kya Nkambo Kikekalako pa April 16
1 Tubena kutengela bingi juba ja April 16, 2003 jafwenya kala ke pepi. Pa jino juba, tukavulukanga kitapisho kya lufu lwa kwa Yesu pamo na bapopweshi bakwetu bavula mwaya ntanda yonse mu kutumbijika jizhina ja Yehoba. Yehoba wafwainwa kutotwa pakatampe pa kwitunengezhezha kitapisho. Mu kino kitapisho, momo akapeshesha bantu bonse ba lukokelo. Na muchima yense, twamba na lusekelo byonka byaambile nyimbi wa masalamo amba: ‘Yehoba ye mukatampe, ye wa kutotwa kukatampe.’—Sala. 145:3.
2 Kimye kya kunangijila ku kivuluko ke kimye kya kulanguluka languluka buwame bwa Lesa ne kusanchila Yehoba pa kutuma “mwananji yenkawa umo panopantanda, amba, tumwene bumi mwi aye.” (1 Yoa. 4:9, 10) Kuvuluka Kijiilo kya Nkambo kya Mabanga mu lukokelo, kisangajika bingi michima yetu kuba’mba: “Yehoba ye wa bupe, ye wayula na lusa, ... ye wa lusa lukatampe.” (Sala. 145:8) Kine, kitapisho jo jishinda jikatampe Yehoba joamwesheshamo butemwe bwanji ku bantu bonse. (Yoa. 3:16) Kumwesha butemwe bwa Lesa ne kulanguluka pa bwikalo bwalumbuluka bwa kwa Yesu, kwitutundaika kutota Yehoba. Myaka yonse, tukamutotanga pa butemwe bwanji bukatampe boetumwesha pa kwitupa mwakumwena bumi bwa myaka ne myaka.—Sala. 145:1, 2.
3 Kwashai Bakwenu Kutota Yehoba: Lusanchilo lwetu lotusanchila bupe bukatampe bwa bukuzhi bwitupa Lesa, lwitulengela kwitako ne bakwetu nabo kwiya na kutota Yehoba. Nyimbi wa masalamo watangijilwe na mupashi kunemba’mba: “Bakambañananga mambo a nkuwa ya kuvula kwa kuwama kwenu, ne kwimba mambo a bololoke bwenu.” (Sala. 145:7) Mwaka wapwatu yenka, Bakamonyi bakwa Yehoba bepaine kwingila maawala kukila pa 1,000,000,000 mu mwingilo wa mu busapwishi. Kika kyafumamo mu kwingila kwabo na ngovu? Mulungu ne mulungu, bantu kukila pa 5,100 babatizwenga kumwesha kwipana kwabo kwi Yehoba. Bantu batainwe ku Kivuluko kuvwangako ne boba 9,000,000 bakyangye kutatula kutota Yehoba bajinga 15,597,746, bamwesha luketekelo lwa kuba’mba kuvujilako kukayangatu kikupu. Byo tuji bataya mbila ya Bufumu, twatemwa bingi kwingila mwingilo wa kusapwila mambo awama ne kwalulwila michima ya bantu kwi Yehoba, Mwananji, ne ku Bufumu bwanji.
4 Jishinda jawamisha kutundaikilamo bantu kutota Yehoba ke ja kwibetako kwiya na kutanwa pamo ne atweba ku Kivuluko kya Nkambo kya Mabanga. Nanchi mwatanchika kala mutanchi wa bonse bomukeba kwitako ne boba bomwamona kuba’mba mwafwainwa kwibavululako juba ne kimye nyi? Abya mwibabula kala bonse baji pa mutanchi wenu nyi? Umvwe mukyangye kwibabula, babulai kyonka kino kimye. Bakwashai bomvwishe Kivuluko byo kyaikelako. Pa juba ja Kivuluko, mwafwainwa kwimuna benyi baiya na kutanwako. Batambwilai bulongo, bebayuke ne ku bakwenu, kabiji ne kwibasanchila pa kwiya kwabo na kutanwako.
5 Kutanwa ku Kivuluko kwakonsha kutundaika bakatataka kukomenako ku mupashi. Ufunda Baibolo umo ukolwa kikola kya lubazhibazhi kimulengela kubula kuya kuji bantu bavula, wayishile na kutanwako ku Kivuluko. Byo bamushikishe kyoalangulukilepo pa kupwila, waambile’mba: “Jajinga juba janema bingi, kabiji ne amiwa natainweko.” Kufumatu kyokya kimye, watendeka kutanwa ku kupwila.
6 Inge Kivuluko Kyapita: Twakonsha kwibakwasha byepi bano bamwesha lusekelo lwa kukeba kutota Yehoba? Bakulumpe mu kipwilo bafwainwa kuyuka bulongo bakatataka batanwa ku Kivuluko ne kumonapo basapwishi bakonsha kwibakwasha, kuya na kwibafwakesha aku Kivuluko kipwatu na kukapituluka nabo mu bintu bya kwibakosesha byo bafunjile ne byo bamwene. Bamo bakonsha kutemwa kuba’mba bebafunjishenga lufunjisho lwa Baibolo. Kabiji mwafwainwa ne kwibabula kutanwanga ku kupwila kwa kipwilo kwa mulungu ne mulungu, mambo kutanwako kimye kyonse kwakonsha kwibakwasha kumvwisha maana a mu Baibolo.
7 Lunengezho lwa kukosesha babula kutanwa ku kupwila kimye kyonse ne bakoka lwanengezhewa kala. Umvwe bakulumpe mu kipwilo bemwambila kukwasha muntu wakoka kubwezhamo kizaku kya kwingila mwingilo wa mu bujimi, ipanai. Kukwasha balongo betu mu jino jishinda ja butemwe kwayila mu lutundaiko lwa kwa Paulo lwa kuba’mba: “Byo tuji ne mwa kubila, twibobile bantu bonse byawama, pakuba bene bene bonka bakwetu ba mu lwitabilo.”—Nga. 6:10.
8 Twayai atweba bonse twinengezhe kutanwa ku Kivuluko pa April 16. Kechi twafwainwa kushala pa jino juba janema ja kutotelamo Yehoba ne. Ee kine, kutendeka kyonka kino kimye ne myaka yonse, twayai tutote Yehoba pa mingilo yanji ikatampe!—Sala. 145:21.