Ikalai Bakumwenako ba Mingilo Yawama
1. Mambo ka o twafwainwa kuteshako muchima ku byubilo byetu pa kupwila kwa nkambi?
1 Umvwe twapwila pamo pa kupwila kwa nkambi, bantu betutala bamona byubilo byetu ne bintu byotubila bakwetu. Onkao mambo, atweba bonse pa muntu pa muntu twafwainwa kuteshako muchima ku lujimuno lwa mu Baibolo lwa kuba’mba: ‘Ikalai ba michima yatekanya: mu bintu byonse wimweshe obe mwine ke kya kumwenako kya mingilo yawama’. (Titu. 2:6, 7) Kibena kukebewa kwibikako na ngovu kuba’mba ‘atweba bonse pa muntu pa muntu, kechi tuteshe muchima ku bintu byetu byonka ine, kana ne ku bya bakwetu pamo.’ (Fili. 2:4) Twayai tumone mbaji imo motwakonsha kwingijishisha luno lutundaiko pa Kupwila kwetu kwa Nkambi kubena kwiya kwa “Pai Lesa Lukumo”.
2. Kika kyotwakonsha kuvulukanga pa mambo a bya busulu pa mpunzha ya kupwila?
2 Busulu: Bamo bayuka’mba bantu bavula beya na kupwila kechi baji na ma kamela ne, abo pano ke kuba busulu bwa kukopa bipikichala pa kupwila kwa nkambi ne pa kupwilatu kukwabo kwa bantu ba Yehoba. Kechi kyatama kukopa bipikichala pa kuno kupwila kwa byonkabye ne. Pano bino nangwa byonkabyo, bavula bakopa bino bipikichala bebikopela mukukeba kumwenamo nsabo, mu jino jishinda boba busulu. Onkao mambo, pakuba’mba kino kibule kutamisha buwame bwa bwina Kilishitu bwa kupwañena pamo ku mupashi, kange tukopwenga bipikichala ku babena kuba busulu ne. Kabiji ne mingilotu ikwabo ya busulu nayo kimotu. Nkebelo ya kupwila pamo ke ya kupopwelatu Yehoba kwapwa, kuja ku tebulu wanji wa ku mupashi, kabiji ne kwikosesha atwe bene na bene.—Loma 1:11, 12.
3, 4. Twakonsha byepi ‘kubila bantu bonse byawama’ pa mpunzha ya kupwila?
3 Kutesha muchima ku bakwetu kwakonsha kumwekela mu kusunga mpunzha ya kupwila kwikala ya butooto. Mwaka wapwa, kyawamine bingi pa kumona bisemi byo byaikele mu mutende ne na butooto. Bakulumpe bavula ne banyike baingijile bingi mwingilo wa kutolaula biswaswa, bipepala, ma pulasitiki ne kajo kashalapo kukebitaya mu ngungulu ne mu bimbo byapoyewe. Ee kine, bantu ba ino ntanda bakonsha kutalangapotu pa busaji, pakuba atweba byo tutako muchima kwikala na butooto, mapunzha etu po tupwila ekala bingi a butooto, kabiji kino kimwesha munema wa kupwila kwetu ne kwikala ke kya kumwenako kya kuba’mba twafwenya kwipi ne Lesa wazhila, aye Yehoba.—Levi. 19:2; 2 Ko. 7:1.
4 Abya mumona byolonyi bya pa mvula bantu byo bikala bya busaji byakukankalwa kutwelamo na mambo a kwibingijisha bibi ne kwibitamisha nyi? Kusha byolonyi bya butooto panyuma ya kwibingijisha, ke jishinda jikwabo ja kumwesheshamo amba ‘tubila bantu bonse byawama.’ (Nga. 6:10) Muzhilo wa Lesa ku bena Isalela pa mambo a kuzhiika busaji bufuma munda wayukanyikilwe bingi kabiji wajinga wapela kulondela. Muzhilo wajinga wa kuba’mba muntu inge waya kungye, patanshi wafwainwa kupoya ka kimbo kakuzhikamo busaji bufuma munda, kabiji inge wapwisha wazhikapo. (Mpitu. 23:12, 13) Aya mizhilo yakala ikingila ne lelo jino kabiji bavula bekala na butuntulu bwa mubiji bwawama na mambo a kulondela mafunde ayo. Kukokela mizhilo ya Yehoba mu bukishinka kuleta bingi mapesho kimye kyonse kabiji kyo kitupusanyako na bantu ba ino ntanda.—Mpitu. 28:9, 10.
5, 6. Baana bakonsha kupa byepi Yehoba lukumo, kabiji mwingilo ka bansemi ye baji nanji?
5 Bansemi ne Baana: Mu ino ntanda muji bakyanyike babula kwilama, baana betu bapusanako, kabiji kino kipana lukumo kwi Yehoba ne ku jibumba janji. Bino nangwa byonkabyo, bimye bimo pekala makatazho na mambo a kubula kusopa baana bulongo. (Mana. 29:15) Bansemi kechi bafwainwa kushatu baana babo bunke pa mpunzha ya kupwila kwa nkambi ne.
6 Kupwila saka kukyangye kufika, bansemi bamo babujila jimo baana babo byubilo byo bafwainwa kumwesha. (Efi. 6:4) Bakwasha baana babo kumvwisha kuba’mba butemwe bwa kine bwa bwina Kilishitu kechi ‘buba bya bumvu ne’ nangwa “bwikebela bintu ne.” (1 Ko. 13:5) Kupwila kwa nkambi ke kimye kyanengezhewa kufunjishiwa kwi Yehoba, kabiji bakulumpe ne banyike bakonsha kumwesha munema wa luno lunengezho kupichila mu byubilo byabo byo bamwesha pa mpunzha ya kupwila ne ku mapunzha kukwabotu.—Isa. 54:13.
7. Byubilo byetu byawama byakonsha kulengela bantu kuba ka?
7 Byubilo byetu byawama byakonsha kufumyapo milanguluko yatama bantu yo betulangulukila kabiji byakonsha ne kwibakebula kwiya mu bupopweshi bwa kine. (Mat. 5:16; 1 Pe. 2:12) Lekai byubilo byetu bikasapwile ku boba bonse botukamonañana nabo pa kupwila kwa nkambi. Mu jino jishinda, ‘tukemwesha atwe bene ke kya kumwenako kya mingilo yawama’ ne kupa Yehoba lukumo.—Titu. 2:7.
[Kitenguluzha pa peja 4]
Langulukilaiko Bakwenu
▪ Chinuzhukai bya busulu
▪ Sungai nsakwa ne byolonyi butooto
▪ Sopai baana benu