Ikalai Bazhila mu Misango Yonse ya Bwikalo Bwenu
1. Mambo ka o kyanemeka kwikala bazhila mu misango yonse ya bwikalo bwetu?
1 Byo tuji bakalume ba Lesa wazhila, Yehoba, twibikishako bingi kwikala bazhila mu misango yonse ya bwikalo bwetu. (1 Pe. 1:15, 16) Kino kilumbulula’mba twesekesha kutumbijika mikambizho ya Yehoba mu mbaji yonse ya bwikalo bwetu. kupwila kwetu kwa nkambi kwa uno mwaka kuketupa kimye kya kumwesheshamo byubilo byazhila.
2. Twafwainwa kusunga byepi nsakwa mwa kupwila kwikala yabula biko?
2 Nsakwa Yetu Yafwainwa Kwikala Yabula Biko: Kwikala bingi kwingila na ngovu mu kunengezha nsakwa mwa kupwila ne kwiiwamisha bulongo kupwila saka kukyangye kutendeka. Twafwainwa kumona’mba byonse byo twaleta mukachi ka nsakwa twibisenda kuvwangakotu ne masaka abulamo bintu ne mabotolo. Umvwe twasendelamo bintu ne kuleta mu nsakwa, twafwainwa kabiji kwibisenda umvwe bintu byo twakusendelamo byapwa.
3. Ki ka kilengela ndochi, kabiji yakonsha kufumishiwa byepi pa mpunzha pa kupwila?
3 Pa kupwila kwa nkambi kumo kumo, bisemi bijiila kajo mukachi ka nsakwa kabiji kino kyawama bingi, bino kechi twafwainwa kusha bukuuku bwaponapona kufikila kimye kya kupwisha kupwila ne. Panyuma ya kuja kajo ka pachaile, kisemi kimo kimo kiji na mutembo wa kuwamisha pokyakujiilanga. Kechi mwafwainwa kusha mabotolo mwabula bintu, bizhiko, bukuuku, bipepala bya pulasitiki mwa kusendela, bipepala pa kunembela nangwatu mapologalamu a kupwila panshi umvwe kimye kya kupwila kwa mute kyatendeka ne. Mwakonsha kusenda kipepala kya pulasitiki kuba’mba kisemi kiye kitayengamo ndochi, apa bino ne kuya na kwiitaya mu ngungulu nangwa mu kimbotela kiji pa mpunzha pa kupwila. Mwane kusha mabotolo muji bintu nangwa mwabula bintu saka alalazhama panshi ne, akonsha kuleta mapuso kabiji amwesha busaji. Umvwe tuji na nzubo nangwa musakuta pa mpunzha pa kupwila, monai’mba lubanza wenu mwamuwamisha bulongo. Mwakonsha kufunjisha baana bya kuyuka kupyanga ne kuya na kwichila biswaswa ku mpunzha yanengezhewa kuya na kutayako.
4. Ñanyi mizhilo yajinga mu bena Isalela yawamijile butuntulu bwa mubiji, kabiji lufunjisho ka bantu ba Yehoba lelo jino lobakonsha kufunda ku kino?
4 Umvwe twasha twawamisha byolonyi bulongo panyuma ya kwibingijisha nakyo kimwesha’mba ‘twibobila bantu byonse byawama.’ (Nga. 6:10) Muzhilo wa Lesa ye apele bena Isalela pa mambo a kutaya byafuma munda wayukanyikwa bulongo kabiji wapela bingi kumulondela. (Tangai Mpitulukilo ya mu Mizhilo 23:12, 13) Uno muzhilo wa kala wingila ne lelo jino kabiji tukekala bingi na butuntulu bwa mubiji bwawama umvwe twalondela mafunde ajimo. Kwikala bakishinka ku mizhilo ya Lesa yaamba pa kwikala ba butooto, kimye kyonse kuleta mfweto ne kwitupatula kufuma ku ino ntanda.—Mpitu. 28:9, 10.
5, 6. Butemwe bwakonsha kwitutundaika byepi kwikala ba butooto?
5 Kutemwa balongo betu kuketutundaika kwibalangulukilako. (1 Ko. 13:4, 5) Kechi kyawama kusha ndochi po twaikala ne, mambo bakwetu baikalatu kipikipi ne atweba. Kechi kyawama kusha ndochi mu byolonyi ne, mambo bakwetu nabo basakukeba kwibingijisha. Onkao mambo, twayai tumweshe butemwe ku bakwetu bo twaikala nabo kipikipi.—Yoa. 13:35.
6 Tutemwa bingi na mambo a mapunzha etu o tupopwelapo kabiji tusanchilwa bingi pa mwingilo wawama wingijiwa mu kuwamisha ano mapunzha. Twayai atweba bonse tutwajijile kwingila na ngovu “twitokeshe atwe bene ku bubipisho bonse bwa mubiji ne bwa muchima, kasa tulumbulula buzhile bwetu mu moyo wa kwakamwa Lesa.” (2 Ko. 7:1) Tendekelaiko jimo kuwamisha pa mazubo enu ne kufunjisha baana nabo kuwamishanga pa nzubo. Ikalai ba butooto pa Mazubo etu a Bufumu, kabiji ne kyapelako umvwe twapwila pamo pa kupwila kukatampe, mwane lekai kupwila kwetu kutumbijikenga mizhilo yawama ya Lesa wetu Wazhila Yehoba.—Isa. 60:2.
7. Byubilo byawama byavwangamo ka pa mpunzha pa kupwila?
7 Pa Kupwila: Twafwainwa kikatakata kumwesha byubilo byetu byawama pa mpunzha pa kupwila. Mwane kwatankenai pamo na bibena kwimubula baasha pa mpunzha pa kwimikila myotoka ne makinga ne mukachi ka nsakwa. (Hebe. 13:17) Bisemi byafwainwa kwikala pamo na baana babo babacheche ne bakomako kukila kwibaleka kuya na kwikala paji bakwabo banyike. Kechi mwafwainwa kusokeka bijimba ku malaichi a pa yoyo mpunzha nangwa ku kiñambañamba kya kwambilamo ne, kabiji mwafwainwa kwibingijisha bijimba bulongo kwakubula kulabika bakwenu. Umvwe mukeba kukopa bipikichala, kechi mwafwainwa kwingijisha kamela ibyasha kupwila saka kubena kubiwa ne. Mwafwainwa kuzhimya ma Pager ne ma selula foni kuba’mba mubule kulabika bakwenu. Umvwe mwatanwa pa mapuso aubiwa pa mpunzha pa kupwila, mwane bulai asha nangwa Dipatimenti ya Bukwasho bwa Bukiji Bukiji.
8. Byubilo byetu pa kupwila bitumbijika byepi Lesa?
8 Byubilo byetu bitulengela kupusanako na bantu bakwabo kabiji bitumbijika Lesa. (1 Pe. 2:12) Pa kupwila, byubilo bya Bakamonyi ba kwa Yehoba bikamwekanangatu ku uji yense. Onkao mambo, ibikishaiko kuba’mba mukekale ba butooto ku mubiji, kusunga bulongo mpunzha yetu, ne kwikala bazhila mu misango yonse ya bwikalo bwenu.
[Kitenguluzha pa peja 5]
Mweshai Byubilo Byazhila
◼ Ikalai ba Butooto
◼ Sopai baana benu bulongo
◼ Langulukilaiko bakwenu