‘Moba Onse Ubainga Byawama’
1 Bwikalo bwabwina Kilishitu bukebewa ‘moba onse kubanga byawama kubantu bonse.’ (1 Tesa. 5:15) Kimye kyotubena kuya kukupwila kwetu kwankambi, twikala nabimye byavula byakubilamo bintu byawama kubakwetu. Pabino bimye, bantu bavula betumona, kabiji aba beya nakupwañena pamo neatweba betulangulukilapo bimo kwesakana namotwibatambwila. Pakuba’mba twikale babula kaneneno byotuji Bakamonyi bakwa Yehoba, mubyubilo byetu twafwainwa kumweshanga’mba ‘tunemeka bantu bonse.’ (1 Pe. 2:17) Kokuba’mba ‘kechi kuteshatu muchima ku bintu byetu byonka ine, kana ne ku bya bakwetu pamo.’—Fili. 2:4.
2 Funjishainga Baana Kuba Byawama: Kimo kimye, baana bashala kwakubula mukulumpe wakwibalama bulongo baleta bingi makatazho. (Mana. 29:15) Bimye bimo, bansemi batabankana bingi namingilo ikwabo nekusha baana babo kwakubula wakwibasopa. Baana bamo batatula kupanga kyongo. Kino kizhikaula bingi kumatwi nekuletela bakwetu bufinda, kikale Bakamonyi nangwa babula Bakamonyi.
3 Anweba bansemi, samukyangye kuya kukupwila kwankambi, kikemukwasha bingi umvwe mwataya kimye kyabaya nakupitulukila pamo nabaana benu mubyubilo byafwainwa bena Kilishitu byobafwainwa kumweshanga kimye kyonse nekumapunzha onse. (Efi. 6:4) Kyakumwenako, babulai kuba’mba butemwe bwafwainwa bwabwina Kilishitu ‘kechi buba bya bumvu ne, kechi bwikebela bintu ne; kechi buzhingila ne.’ (1 Ko. 13:5) Bansemi bafwainwa kukosesha bino byambo kupichila mukwibimwesha kubonse. Anweba baana mwakonsha kuba byawama umvwe kemukokele bansemi, kunemeka bintu byabakwenu, nekukwasha boba bomuji nabo kinkalankulo. (Kolo. 3:20) Byotutwajijila kukwatankana mukuba byawama kubantu bonse, ‘tulengela lufunjisho lwa Lesa, Mupulushi wetu, kumweka bulongo mu bintu byonse.’—Titu. 2:10.
4 Kusulusha Bintu: Bamo, byobayuka amba bantu bavula beya kukupwila kwankambi kechi baji namakamelane, bakwata nepanshi amba bobenga busulu bwakukopa bipikichala pakuno kupwila kwankambi nepakupwilatu kukwabo kubiwa nabantu ba Yehoba. Kafwako kyatamane umvwe tubena kukeba kukopa bipikichala pakuno kupwila kwiikajila. Pano bino, aba bavula bakopa batanamo nsubu, kino kibena kulumbulula’mba, babena kwingila mwingilo wabusulu. Pakuba’mba kino kibule kutamisha buuya bwakumupashi bwakupwañena pamo kwabwina Kilishitu, kechi twafwainwa kuleta kisonso kyabone. Bino byobyo kiji nekumingilotu ikwabo yabusulu. Nkebelo yetu ine yakupwila pamo keyakupopwelatu Yehoba kwapwa, kujiila patebulu wanji wakumupashi nekwikosesha atwe bene nabene.—Loma 1:11, 12.
5 Byubilo byetu byawama kechi bikwashatu bantu bonka betumonane, bino nebobatu betushikwa namambo akintu kimo nangwa bintutu bikwabo. Mubyonse byotuba, ñambilo yabwina Kilishitu nebyubilo byetu byafwainwa kumwesha kuba’mba tukeba kuba byawama.
[Kitenguluzha pa peja 4]
Mwane Vulukai’mba:
■ Mwalama bulongo baana benu.
■ “Mpunzha” yakupwilapo kupwila kwankambi kechi yakubilapo “busulu” buji bonsene.
■ Mpunzha yakupwilapo kupwila kwankambi yafwainwa kwingijishiwatu kunkebelo yayo amba mpunzha yakupopwelapo Yehoba kwapwa.