Buneme Buji mu Kufunda pe Lesa
1 Bantu bavula balanguluka amba Bakamonyi ba kwa Yehoba bafwainwatu kuta muchima mu kukwasha kukepesha makatazho a bantu lelo jino. Bantu ba yenka uno musango bakankalwa kuyuka buneme bwine bwa mwingilo wetu wa lufunjisho lwa Baibolo. Kiji nobe byonka byanembele mutumwa Paulo kuba’mba: ‘Mambo a [kichi kyalumanamo NW] bo bumbulwa maana kwi abo babena konaika; pakuba kwi atweba tubena kupuluka, bo bulume bwa Lesa.’ (1 Ko. 1:18) Mu bukishinka, atweba twayukishatu kuba’mba mwingilo wa bena Kilishitu ubena kwingijiwa panopantanda lelo jino ye wakijishapo kunema.
2 Bwikalo Bwawama pa Kino Kimye: Mingilo ibena kwingila bantu ya kuba’mba bapwishe makatazho a bantu yapelelela. Mizhilo yamba pa mambo a kupwisha byubilo bya bumbanzhi kechi yapwisha kikupu buno bumbanzhi bubena kubailakotu ne. Lulayañano lwa kuleta mutende ne bipamo bya bashilikale bilwisha kuleta mutende kechi byapwisha makondo ne. Bipanyi bisambakana na kwisamba mashinda mwakukwashisha bantu, byakankalwa kufumyapo buyanji bonse. (Sala. 146:3, 4; Yele. 8:9) Mu kupusanako, mambo a Bufumu abena kupimpula bantu bavula kupichila mu kwibakwasha kuvwala bumuntu bupya bwaitabizhiwa na Lesa. (Loma. 12:2; Kolo. 3:9, 10) Mu kuba kino, beyowa kwikala bwikalo bwawama pa kino kimye.—1 Timo. 4:8.
3 Bwikalo Bwa Kulutwe Bwawamisha: Kununga pa maana a Lesa etukwasha byo twakonsha kwikala ne kuchinchika na makatazho etu, etukwasha ne kulangulukapo bulongo pa byo tukoba kulutwe na lwendo. (Sala. 119:105) Etukwasha kuchinuzhuka kuba bintu byabula ne nkito bya kukeba kwalula buno bwikalo bujipo. (Sapwi. 1:15; Loma. 8:20) Tuji bingi na lusekelo lwa kuba’mba kechi tubena kwionauna atweba bene kupichila mu kukeba kwibikila bikonkwanyi byabula kuluñama ne! Atweba twatatu muchima ku mulaye wa kwa Yehoba wa kine wa “meulu apya ne ntanda ipya” mukekala bololoke. Umvwe juba ja Yehoba ja buchibamambo jafika, kikamwekanatu patoka kuba’mba aba bonse baketekejile maana a Lesa basajile bulongo.—2 Pe. 3:10-13; Sala. 37:34.
4 Nangwa kyakuba maana a Lesa kechi amwekana kunema ku boba bonse bachinamina mu ‘maana a ba panopantanda ne,’ atweba twayukishatu amba ano maana a Lesa o onkatu o twafwainwa kulondela. (1 Ko. 1:21; 2:6-8) Onkao mambo, tutwajijila kusapwila konse konse panopantanda mambo awama afuma kwi Lesa, ‘yenka wa maana bunke.’—Loma. 16:27.