Kabokoshi Ka Mepuzho

◼ Twafwainwa kumona byepi amba jashi jonse ja kupwila kwa kipwilo jaambiwa mu kimye kyapanyiwa?

Kimye kyenda bingi lubilo umvwe tubena kwisambapo na bakwetu misambo ikoseshañana. Na mambo a kino, kyakonsha kushupa bingi kwamba majashi mu kimye kyapanyiwa. Kika kyakonsha kwitukwasha kwamba majashi a kupwila mu kimye kyatongolwa?

Tatulai kimye inge kyakumana. Umvwe bantu bonse bakonkana, kyawama kwibabula bonse amba bekaleko saka kwakishala miniti umo nangwa abiji kuba’mba mutatule kupwila. Kino kyakonsha kulengela kupwila kutatula pa kimye kyatongolwa monka mo kyaila. (Sapwi. 3:1) Kupwila pamo kucheche, nabiji kupwila kwa kuya mu mwingilo wa mu bujimi, kechi mwafwainwa kutaya kimye na kupembelela boba bakelwa ne.

Nengezhai bulongo. Kikebewa kunengezha bulongo pa kuba’mba kimye kilondelwe bulongo. Yukai nkebelo ya jojo jashi. Yukai bishinka bikatampe, ne kwibilumbulula kuba’mba byumvwanyike. Kubikangamo byambo byabula nkito ne. Peezhai jashi jenu. Umvwe mu jashi jenu muji bimwesho nangwa mepuzho a mikumbu, pitulukilaimo jimo saka kukiji kimye. Yukilai jimo kimye kisakutaiwa kwamba jashi jenu saka mupitulukilamo jimo na jiwi jasansuka.

Abanyai jashi jenu. Nangwa kyakuba muji na jashi jakwamba nangwa jakwisamba na luonde, kyakonsha kuwama umvwe mwijabanya mu bipungu. Yukai kimye kyo musakutaya pa kipungu kimo kimo, kabiji nembai kino kimye kwapela pepala ya jashi jenu. Apa bino kimye kyo musakwambanga jashi jenu mumonenga bibena kwenda kimye. Mu jashi ja kwisamba na luonde, kechi mutendeke kwamba byambo byavula byakushinkwila ne, mambo bisakwimulengela kupitamotu lubilo lubilo mu byambo bine byanema biji kulutwe. Batangijila Lufunjisho lwa Kyamba kya Usopa bafwainwa kushako kimye kyabaya kya kupituluka mu kabokoshi ka mepuzho pa kupwisha. Kabiji bafwainwa kumona’mba kechi baingijisha kimye kyapanyiwa kwimbilamo lwimbo ne lulombelo lwa kupezhako ne.

Pwishai mu kimye kyatongolwa: Umvwe kupwila kuji na mbaji yavula, nabiji Kupwila kwa Mwingilo, ñambi umo umo wafwainwa kuyuka bulongo kimye kisakutendeka jashi janji ne kimye kyoasakupwishishamo. Kika kyafwainwa kubiwa umvwe kyakuba kimye ke kimweke nobe kisakukilaila pa kimye kyapanyiwa kupwishishamo kupwila? Kampe mulongo umo nangwa bakwabo baji na mbaji yalondelapo bafwainwa kushako kimye kyabo kyapanyiwa kwambilamo jashi kuba’mba kyesakane na mutanchi byo afwainwa kwenda. Bafwainwa kwambatu bishinka byonka kwakubula kuba saka bambatu byambo bikwabo ne. Kino kyo kiyukanyikisha ñambi wayuka kufunjisha.

Ne atweba baikala mu luonde twafwainwa kukwashako mulongo ubena kutangijila umvwe mikumbu yetu yaikala ipi kabiji ibena kufika pa kishinka. Onkao mambo, atweba bonse twafwainwa kukwashako kuba’mba kupwila kwetu kubiwenga ‘na mushingi ne mo kwalondakena.’—1 Ko. 14:40.