Bya Kunengezhezha Jimo Kupwila kwa Mwingilo
1. Ñanyi nkebelo ya Kupwila kwa Mwingilo, kabiji twakonsha kumwenamo byepi mu kuno kupwila?
1 Kupwila kwa Mwingilo bekunengezha kwitukwasha kusapwila bulongo. Kwaimena pa kusapwila mambo awama a Bufumu, kulenga baana ba bwanga ne kusapwila buchibamambo bwa Lesa bwafwenya kala pepi. (Mat. 28:20; Mako 13:10; 2 Pe. 3:7) Tumwenamo bingi mu kuno kupwila kwanema umvwe twanengezhezha jimo bulongo ne kuya na kukumbulapo.
2. Twafwainwa kunengezha byepi kuteleka ku jashi?
2 Jashi: Byambo bya kwingijisha mu jashi bebitongola mu mikambizho ya ñambi. Mwafwainwa kupitulukamo mu byambo bya jashi, kuvwangako ne binembelo bijimo, kabiji ne kulanguluka byo mwakonsha kwingijisha byobyo byambo mu mwingilo.
3. Twakonsha kunengezhezha jimo byepi mwisambo wa mepuzho ne mikumbu?
3 Mwisambo wa Mepuzho ne Mikumbu: A luno lubaji lutangijilwa nobe Lufunjisho lwa Kyamba kya Usopa, na byambo bicheche bya kutatwilamo ne bya kupezhako. Shabulai bishinka bikatampe mu mafuka onse ne kwinengezha kukumbulapo mikumbu ipi ikoseshañana.
4. Twakonsha kunengezhezha jimo byepi jashi ja kwisamba na luonde?
4 Kwisamba na Luonde: Aluno lubaji belwamba nobe jashi, pano bino ñambi wambila luonde ku kumbulapo. Umvwe mwanengezha bishinka ne kutanga binembelo bijimo, mwakonsha kukumbulapo inge ke bepuzha mepuzho. Mulongo ubena kutangijila luno lubaji wafwainwa kweseka na ngovu kumona’mba luonde lwaumvwisha bishinka.
5. Ki ka kyakonsha kwitukwasha kumwenamo pakatampe mu bimwesho?
5 Bimwesho: Mbaji imo mwavwangwa bimwesho bya kumwesha byo mwafunda byo byakonsha kwingila mu nyaunda yenu. Bakulumpe mu kipwilo ne basapwishi bafikapo nangwa bapainiya bakonsha kwibambila kuba bino bimwesho. Kunengezha kwenu mu luno lubaji mwavwangwa kulanguluka byo mwakonsha kuba kino kimwesho. Umvwe bamwesha mashinda akwambilamo, langulukai pa byo mwafwainwa kufuukula bya kwamba ne byo mwakonsha kupimpula mwakwambila na mwina nzubo. Monai kuba’mba muji na buku nangwa magazini ye mwakonsha kwingijisha mu kimwesho. Kimye kya Kupopwela kwa Kisemi kyakonsha kuwama bingi kupichilamo jimo mu mashinda akwambilamo.
6. Mambo ka o tunengezhezha jimo Kupwila kwa Mwingilo?
6 Kupwila kwa Mwingilo kuwama bingi umvwe twanengezhezha jimo ne kulanguluka pa byo twanengezha kupwila saka kukyangye kutendeka. Kuba bino kwakonsha kwitulengela kwikwasha atwe bene na bene. (Loma 1:11, 12) Umvwe twaikala na kimye kya kunengezha Kupwila kwa Mwingilo, kiketulengela kwikala bawaina kwingila mwingilo wetu.—2 Timoti 3:17.