Mikambizho ku Boba Bamba Majashi mu Kupwila kwa Mwingilo
Kutendeka na uno Mwingilo Wetu wa Bufumu, nembelo ya byambo bya mu mutanchi wa Kupwila kwa Mwingilo byapimpulwako. Mikambizho ne bya kwimuvululako byalondelapo bisakulumbulula bulongo byaambiwe mu mutwe wa kuba amba: “Bya Kunengezhezha Jimo Kupwila kwa Mwingilo,” wajinga mu Mwingilo Wetu wa Bufumu wa May 2009.
◼ Jashi: Jino jashi kechi ja kwisamba na luonde ne. Ñambi wafwainwa kwamba bishinka byakonsha kukwasha kipwilo.
◼ Mepuzho ne Mikumbu: Luno lubaji lwafwainwa kutangijilwa nobe Lufunjisho lwa Kyamba kya Usopa, na byambo bicheche bya kutatwilako ne bya kupezhako, kabiji mwakonsha kwipuzha mepuzho mu mafuka onse. Awa ubena kutangijila kechi wafwainwa kwamba byambo byavula ne. Mwafwainwa kutanga binembelo bibena kulumbulula bishinka inge kimye ko kiji. Kechi mwafwainwa kutanga mafuka ne, mwafwainwa kutangatu kana kuji mikambizho yaamba amba mube bino.
◼ Mwisambo: Jino jashi javwangamo kwisamba na luonde. Kechi ja kwambatu bunke ne, kabiji kechi ja mepuzhotu ne mikumbu ne.
◼ Bimwesho ne Misambo ya Mepuzho: Mikambizho ya bimwesho ibena kulumbulula kuba amba mulongo ye bapa luno lubaji ye uji na mwingilo wa kuvwangamo ne kimwesho; pano bino kechi ye wafwainwa kwikala mu kimwesho ne. Aba bo asala kwikala mu kimwesho bafwainwa kwamba bulongo ne kwikala na byubilo byawama kabiji wafwainwa kupitulukilamo nabo jimo saka kukiji kimye. Kechi kyawama kwingijisha basapwishi bakatataka babula kupijilwa mu bimwesho na mambotu a kuba’mba bakonshe kumwekapo pa mutuntamo ne. Pano bino bamo bafwainwa kwikalako bena nzubo. Basapwishi baji mu kimwesho bafwainwa kutalañana na luonde. Aba bo baingijisha mu mwisambo wa mepuzho bafwainwa kwambila pa mutuntamo, kechi saka baikala mu luonde ne. Bimwesho ne misambo ya mepuzho byafwainwa kupitulukilwamo jimo. Inge kimye kekipwe mulongo wafwainwa kwipipisha jashi janji, pano bino kechi wafwainwa kufumyako bimwesho ne misambo ya mepuzho ne. Bankwasho mu kipwilo bafwainwa kumona mulongo ukwatankanya mingilo ya jibumba ja bakulumpe nangwa mukulumpe mukwabo saka bakyangye kusala bakwingijisha mu bino bimwesho.
Inge jashi jiji na mikambizho ikwabo, kyakonsha kuwama kulondela bulongo mikambizho yaamba pa jojo jashi. Kupichila mu kulondela ino mikambizho yaamba pa Kupwila kwa Mwingilo, balongo bakakonsha kulengela kuno kupwila ‘kubiwa na mushingi ne mo kwalondakena.’—1 Ko. 14:40.