Ikalai na Muchima wa kwa Yesu
1. Muchima wa musango ka wajingapo na Yesu?
1 Nangwa kya kuba kechi twamonapo kala mwana Lesa ne, bino kupichila mu byambo byanembwa byamba pa bwikalo ne mwingilo wa kwa Yesu, kine twamutemwa bingi. (1 Pe. 1:8) Na mambo a kukokela bikeba Shanji, washile kifulo kyanji kyanema mwiulu ne kwiya pano panshi. Byo akijinga panopantanda, waingijiile bantu na muchima yense ne kwibafwila. (Mat. 20:28) Byambo bya Lesa bitukambizha’mba: “Ikalai na ye uno muchima mwi anweba, yenka waji mwi Kilishitu Yesu.” Twakonsha kulonda byepi mupashi wanji wa kwipana?—Fili. 2:5-8.
2. Lukatazho ka bena Kilishitu bavula lobatana, kabiji ki ka kyakonsha kwibakwasha kwilupwisha?
2 Kimye kya Kumvwa Kukoka: Nangwa kya kuba Yesu wajinga muntu waoloka, naye wakokanga. Pa kimye kimo, byo “akokele na lwendo,” wasapwijile ku mwanamukazhi mwina Samaliya. (Yoa. 4:6) Mu ano moba bena Kilishitu bavula batana luno lukatazho. Panyuma ya kwingila nkito mulungu yense, kyakonsha kushupa bingi kwikala na ngovu ya kwingila mwingilo wa busapwishi. Pano bino, umvwe ketube kino kimye kyonse, tukatana kuba’mba mwingilo wa bwina Kilishitu ukwashañana bingi ku mupashi.—Yoa. 4:32-34.
3. Twakonsha kulonda byepi Yesu kwikala na muchima wa kukeba kufunjisha?
3 Pa kimye kikwabo, Yesu ne baana banji ba bwanga bayile ku mpunzha kumo kwazhindama amba bakokolokeko pacheche. Bino nangwa byonkabyo, bantu bavula bebamwene kabiji bapichile kulutwe yabo ne kwibatana. Mu kifulo kya kuzhingila, Yesu “wibobile lusa” kabiji watwajijile “kwibafunjisha byavula.” (Mako 6:30-34) Pa kutatula ne pa kufunjisha mafunjisho a Baibolo pakebewa kwikala na muchima wa yenka uno musango. Pakebewa kutwajijila na ngovu ne kwikala na butemwe bwa kine ku bantu. Umvwe kechi mubena kufunjisha lufunjisho lwa Baibolo pa kino kimye ne, kange mwikileke kutwajijila kukeba lufunjisho lwa Baibolo ne.
4. Mwingilo wa bupainiya bwa kukwasha wakonsha kwitukwasha byepi kwikala na muchima wa kwa Yesu?
4 Tangizhaiko Bintu bya ku Mupashi: Bupainiya bwa kukwasha bwakonsha kwitukwasha kutesha muchima ku bintu bya ku mupashi. Nyenga umo wakyanyike waambile’mba: “Bainanji mukwetu umo betutundaikile bonse babiji kwingilako nabo mwingilo wa bupainiya bwa kukwasha bwa ñondo umo. Nji bingi nalusekelo kumona’mba twaingijile nabo. Natemenwe bingi byo naishile kwibayuka bulongo balongo ne banyenga, kabiji palutwe kacheche nebamwenengatu nobe ba mu kisemi kyami. Kabiji naumvwine bingi bulongo kwikala na mashuko a kwamba na bantu pe Yehoba ne kwibafunjisha bukine bwa Bufumu. Byonse bino byandengejile kwiumvwa kwikala kwipi na Yehoba ne jibumba janji.”—Sala. 34:8.
5. Mambo ka o twafwainwa kwibikishakotu na ngovu kwikala na muchima wa kwa Yesu?
5 Atweba bonse tulwa nkondo pakachi ka kuba bisaka mibiji yetu ya bumbulwakoloka ne kukeba kutokesha Yehoba pa muchima. (Loma 7:21-23) Twafwainwa kukana mupashi wa panopantanda ujimbaika mukachi ka muchima wetu. (Mat. 16:22, 23) Yehoba wakonsha kwitukwasha kushinda ino nkondo kupichila mu mupashi wanji wazhila. (Nga. 5:16, 17) Byo tubena kupembelela kupokololwa ne kutwela mu ntanda ipya ya bololoke ya kwa Lesa, twayai twikale na muchima wa kwa Yesu kupichila mu kutangizhako bintu bya Bufumu ne bya bakwetu.—Mat. 6:33; Loma 15:1-3.