Nyimbo Isangajika Muchima
1 Nyimbo ne kwimba ke lubaji lukatampe bingi mu kupopwela kwa kine. Kala ku bena Isalela, Asafwa ne balongo banji baimbile’mba: “Ubai sante kwi Yehoba... . Mwimbilai, mwimbilai ya kumutota; isambainga na mambo a mingilo yanji yonse ya kukumya.” (1 Moba. 16:8, 9) Lelo jino tumwimbila Yehoba pa kupwila kwetu kwa kipwilo kwa mulungu ne mulungu. (Efi. 5:19) Byo kikalapo kimye kyawama kya kutotelamo jizhina janji!—Sala. 69:30.
2 Kuteleka ku ma Kingdom Melodies, nyimbo ya Bufumu yaimbwa na jibumba, kwakonsha kuyuzha michima yetu na milanguluko ya ku mupashi. Nyenga umo walondolwele’mba: “Umvwe ino nyimbo ke imbiwe, tendeka kuvuluka byambo biji mu lwimbo. Jino ke jishinda jawama bingi jo namuvulukilamo Yehoba kimye kyo mbena kuteleka ku nyimbo!”—Fili. 4:8.
3 Bimye bya Kutelekako: Kujizha ma Kingdom Melodies pa nzubo kuleta bingi lusekelo lunungulula mutende wa kisemi. Kisemi kimo kyanembele’mba: “Tujizha ino [nyimbo] javula pa nzubo ne mu motoka kabiji kechi tukoka na kutelekako ne. Javula ma Kingdom Melodies etulengela kwikala na milanguluko yawama kimye kyo tubena kwinengezha kuya ku kupwila kwa bwina Kilishitu nangwa kuya ku kupwila kukatampe.” Nyenga umo waambile’mba: “Nsangalala bingi byo ntelekako pa kwingila mingilo ya pa nzubo kabiji kafwako wayuka lusekelo lo ngikala nalo inge mbena kuchimpa bivwalo ne. Ntemwa bingi kujizha ino nyimbo umvwe nalefulwa. Ino nyimbo isangajika bingi muchima! ... Nyimbo yonse indetela lusekelo.” Nanchi kujipo bimye bimo ino nyimbo isangajika muchima mo yakonsha kwimukwasha nyi?
4 Nyimbo yavula ya ano moba imwesha byubilo bya ino ntanda. Bansemi bakonsha kukwasha baana babo kutemwa nyimbo yawama kupichila mu kwingijisha ma Kingdom Melodies. Bantu bavula babena kufunda Baibolo ne boba bakeba kufunda bukine nabo bakonsha kutemwa bingi umvwe bayuka ino nyimbo ya ku mupashi ya kimenge itumbijika Yehoba ne kusangajika muchima.—Sala. 47:1, 2, 6, 7.