Twakonsha Kusapwila Byepi ku Balongo Betu?

1. Mambo ka o kikebewa kwikala na milangwe pa kusapwila ku balongo?

¹ Byo kyakonsha kuletapo lusekelo kutwela mu ntanda ipya na balongo betu saka twakwatankana na kupopwela Yehoba! Umvwe saka tusapwila ku balongo betu, uno mulaye usangajika wakonsha kwikala wa kine. Nangwa byonkabyo, pa kuba’mba tusapwile ku balongo betu, kikebewa kwikala na milangwe. Mukulumpe wa kijiiji waambile’mba: “Aba bazakula balongo babo michima kupichila mu kwibasapwila mufuma byawama bingi.” Twakonsha kuba byepi kino?

2. Kumwesha lusekelo mu balongo betu kwakonsha kwitukwasha byepi kwibazakula muchima?

² Bazakulai Michima: Teshai muchima ku byo mwakonsha kuzakula michima ya balongo benu. (Mana. 15:28) Ñanyi bintu byo bateshako muchima? Ñanyi makatazho o babena kupitamo? Kampe mwakonsha kwibamwesha kibaba kimo nangwa kwibatangila kinembelo pa mutwe umo wakonsha kwibaletela mujojo. Umvwe balongo benu bekala kwalepa, mwakonsha kwibanembela nkalata nangwa kwibatumina lamya. Kwa kubula kwisamba nabo byambo byavula ne, kusai nkunwa ya bukine, ne kuketekela mwi Yehoba kuba’mba ukeikomesha.—1 Ko. 3:6.

3. Lusekelo lwamwesha balongo betu lwakonsha kwitushinkwila byepi jishinda ja kwibasapwila?

³ Yesu wakambizhe yewa mwanamulume ye apangilemo bademona bavula amba: “Yainga kwenu ku balongo benu, mukebabule abya bikatampe byo emubila Nkambo, ne byo emubila lusa.” (Mako 5:19) Akilangulukai kino kintu byo kyakonsheshe kusangajikapo balongo banji! Nangwa kya kuba kechi mwakonsha kumweshapo kintu kya kukumya ne, balongo benu batemwa bingi mingilo yenu nangwa yoya ingila baana benu. Kutongola jashi jo mwaambile mu Sukulu ya Mwingilo wa Teokalasi, kupwila kwa nkambi ko mwatainweko, byo mwafwakashijile pa Betele, nangwa kintu kikatampe kyaubiwe, kwakonsha kwimushinkwila jishinda ja kwisambilamo nabo bintu bikwabo pe Yehoba ne jibumba janji.

4. Ñanyi bintu byo twafwainwa kuchinuzhuka kimye kyo tubena kusapwila ku balongo betu?

⁴ Yukainga Mwakubila: Kimye kyo mubena kusapwila ku balongo benu, kechi mwafwainwa kwibabulanga bintu byavula pa kimye kimotu ne. Byo avulukile kimye kyo atendekele kufunda Baibolo, Mulongo umo waitabile’mba: “Nalondolwelanga bamama kimye kyabaya bintu byonse byonafundanga mu Baibolo, kabiji javula kino kyaletanga bingi mapata, kikatakata na batata.” Nangwatu kya kuba mulongo wenu wamwesha lusekelo mu byambo bya mu Baibolo, anweba kumbulai byambo byakonsha kumushila mujojo wa kukeba kuyukilapo ne bikwabo. (Mana. 25:7) Kimye kyonse mweshainga mushingi, lusa, ne butekanye, byonkatu byo mwakonsha kumwesha mushingi umvwe ke mwisambe na bantu bangi bo mutana mu mwingilo.—Kolo. 4:6.

5. Twafwainwa kuba byepi umvwe balongo betu bakana kwibasapwila?

⁵ Kimye kimo, balongo banji Yesu balangulukile’mba wakonya. (Mako 3:21) Nangwa byonkabyo, palutwe kacheche, bamo baitabijile. (Byubilo 1:14) Umvwe kimye kitanshi balongo benu bakana kutambwila bukine, kwikileka ne. Bwikalo ne byubilo bya balongo benu byakonsha kwaluka. Twajijilai na kumonapo kimye kikwabo kyo mwakonsha kwisamba nabo kishinka kyakonsha kwibazakula muchima. Mwakonsha kwikala na lusekelo umvwe mwibakwasha batendeka kwenda mu jishinda ja ku bumi bwa myaka ne myaka.—Mat. 7:13, 14.