Mutanchi wa Kisemi—Kwingijila Pamo Kisemi Kyonse mu Mwingilo wa mu Bujimi
1 Yehoba utemwa bingi pa kumona bakyanyike sa batota jizhina janji. (Sala. 148:12, 13) Mu moba a kwa Yesu, ‘twanyike ne twana twa lukeke twatotelenga’ Lesa. (Mat. 21:15, 16) Ne lelo kintutu kimo kyo kibena kubiwa. Anweba bansemi, mwakonsha kukwasha byepi baana benu kwikala ba mukoyo wa kutota Yehoba mu mwingilo wa bwina Kilishitu? Byonka byo kyaambiwapo mu mutwe mukwabo uji peulu po ubena kwamba pa kupwila kwa kipwilo, kintu kikatampe ke anweba bene kwikala ba kumwenako. Nsemi umo wa mulume waambilepo bintu bimo bipitamo bansemi bavula amba: “Baana kechi boba bintu nsemi byo amba ne, bobako bintu byo oba!”
2 Nyenga umo ye bakomeshe ku bansemi bakamwa Lesa wavulukile’mba: “Umvwe juba ja Kibelushi jafika kechi twashikishanga ne kushikisha’mba kana tusa kuya mu mwingilo nyi, nangwa ne. Twayukanga amba tusa kuya.” Ne anweba mwakonsha kubula baana benu buneme bwa mwingilo wa kusapwila kupichila mu kwikala na mutanchi wa jonse mulungu ne mulungu wa kuyila pamo mu mwingilo wa mu bujimi kisemi kyonse. Kino kechi kikwashatu baana benu kufunjila kwi anweba ne, bino kimukwasha ne kumona ndangulukilo yabo, jishinda jo babena kubilamo bintu ne kumona byo babena kuwamishako busendwe bwabo.
3 Kufunjishanga Pachepache: Pa kuba’mba baana bobenga bulongo mu mwingilo, bafwainwa kwibabujila jimo bya kuba. Nyenga waambiwapo peulu po wanungilepo’mba: “Kechi twalondelangatu bansemi betu mu mwingilo wabo ne. Twayukile kuba’mba ne atweba twajinga na mwingilo wa kuba, nangwa kya kuba wajingatu wa kujizha tugengele tuji ku binzhilo bya mazubo a bantu ne kusha matalakiti. Kupichila mu kunengezhezha jimo bulongo mingilo ya kwingila ku mpelo ya mulungu ne mulungu, twayukijile jimo bya kuya na kwamba.” Mwakonsha ne anweba kufunjisha baana benu kupichila mu kwikalako na kimye mulungu ne mulungu kya kwibafunjishisha jimo bya kwingila mwingilo, kampe pa kimye kya lufunjisho lwa kisemi nangwa pa kimyetu kikwabo.
4 Kusapwila pamo kisemi kyonse kwimupa jishuko jikwabo ja kufunjisha bukine mu baana benu. Nsemi umo wa mulume wasendanga mwananji wamukazhi kuya na kushajika matalakiti ku bangikazhi ba mu muzhi mukwabo waikejile mu kinkunenke wa kwendapo musinso walepa makilomita 10. Uno mwana wavulukile’mba: “Bimye byo twayanga na batata na kushajika matalakiti popo babyajile bukine mu muchima wami.” (Mpitu. 6:7) Mwane kine ne anweba mubilwe bibusa pa mambo a kunengezha mwingilo wa mu bujimi kwikala lubaji lwa mutanchi wenu wa kisemi wa mulungu ne mulungu.