Kwashai Baana Benu Kukomenako mu Mwingilo
1 Bansemi ba bwina Kilishitu baji na mutembo mukatampe bingi wa kufunjishanga baana babo mu mwingilo kufumatu ku bwanyike bwabo. Kino kyakonsha kwingijiwa mu mashinda apusana pusana. Baana bamo bakonsha kwamba byambo biji mu kinembelo kimo kya Baibolo saka bakyangye ne kuyuka kutangatu ne. Kino kyakonsha kufika bingi pa muchima wa babena kuteleka. Bakyanyike byo baya na kukoma, bakonsha kuba byavula mu mwingilo. Anweba bansemi, mwakonsha kukwasha byepi baana benu kusapwila? Ano mashinda alondelapo kampe akonsha kukwashañana.
2 Panyuma ya kwiimuna, mwakonsha kwamba’mba:
◼ “Mwanami [jizhina janji], ubena kukeba kwimubulako kinembelo kimo kyanema bingi.” Mwanenu wakonsha kwamba’mba: “Kino kinembelo kya Masalamo kyamfunjishe jizhina ja Lesa. [Mwana watanga nangwa kwambatu kinembelo kya Masalamo 83:18.] Ano magazini aamba pa bintu Yehoba Lesa byo aketubila. Mwane nemushile ano magazini nyi?” Mwakonsha kupezhako mwisambo kupichila mu kwamba mwingilo wa ntanda yonse byo akwashiwa.
3 Nangwa mwakonsha kwingijisha jino jishinda:
◼ “Baji byepi mwane. Mbena kufunjisha mwanami wamukazhi, [jizhina janji] bya kuta muchima bakwabo baji mu ino nyaunda. Ukeba kwimubulako byambo bya mu Baibolo.” Mwanenu wakonsha kwamba’mba: “Jishinda jimo jo nkwashishamo bantu ke kupichila mu kwibabulako luketekelo luji mu Baibolo lwa mu kimye kya kulutwe. [Mwana watanga nangwa kwambatu kinembelo kya Lumwekesho 21:4.] Ano magazini alumbulula bintu Bufumu bwa Lesa byo buketubila. Naketekela musakutemwa kwiatanga.”
4 Kwingijisha kimye kyonse ñambilo yapela, kukwasha baana kwikala na luketekelo lwa kusapwila mambo a Bufumu. Bipungu bya kupitulukamo kukeba kwamba bulongo kabiji na jiwi jasansuka kukebakwasha kwamba mu mbaji yapusana pusana. Kunengezhela jimo bulongo kabiji ne kwibatakaika kukwasha bakyanyike kumwesha lwitabilo lwabo.
5 Na lutundaiko lwa uno mutundu, bakyanyike bavula babaikale ke basapwishi babula kubatizwa. Byo kiletapo lusekelo pa kumona baana betu sa bakomenako mu mwingilo wa bwina Kilishitu!—Sala. 148:12, 13.