Bya Kutendeka Mafunjisho mu Buku wa Baibolo Ufunjisha

Atweba bavula twakonsha kutemwa bingi kufunjisha lufunjisho lwa Baibolo umvwe kya kuba’mba twayuka mwa kutendekela lufunjisho. Buku wa bukumo wa Nanchi Baibolo Kine Ufunjisha’mba Ka? wakonsha kwitukwasha. Byambo bya kutendekelako biji pa mapeja 3-7 byanengezhiwa kwitukwasha kutendeka kwisamba na mwina nzubo mwisambo wa mu Baibolo kwingijisha uno buku. Nangwa boba babula kwibijila mu mwingilo kikebapelela bingi kwingijisha bino byambo kutendeka mafunjisho.

◼ Mwakonsha kweseka jino jishinda ja kusolomokelamo kwingijisha peja 3:

Panyuma ya kwamba masawakya amo nangwa makatazho akatazha bantu ku michima ba mu nyaunda yenu, mweshai bena nzubo mepuzho anembwa mu bifita aji pa peja 3, kabiji ne kwibepuzha kwambapo. Apa bino muzhikule pa mapeja 4-5.

◼ Nangwa mwakonsha kusalapo kutendeka kwambapo bishinka bikatampe biji pa mapeja 4-5:

Mwakonsha kwamba’mba, “Nanchi kuba kyawama umvwe kupimpulwa kwa bwikalo kwamweshiwa papo kwafikizhiwa nenyi?” Nangwa mwakonsha kushikisha’mba, “Pa ino milaye iji pape, yepi yo mwakonsha kukebesha kuba’mba ikafikizhiwe?” Telekeshai bulongo ku byo asakukumbula.

Umvwe mwina nzubo wamwesha kuta muchima pa kinembelo kimo, mumweshai Baibolo byo afunjisha pa yewo mutwe kupichila mu kwisamba mapalagalafu aji mu buku alumbulula kyokyo kinembelo. (Monai kabokoshi kaji pa ino peja ya kyamukachi.) Isambai byobyo byambo byonka byo mwakonsha kwisamba kimye kya lufunjisho lwa Baibolo. Abino byakonsha kubiwa mu maminiti atanu nangwa jikumi pa lwendo lutanshi mu kakimyetu kacheche.

◼ Jishinda jikwabo ja kusolomokelamo ke kwipuzha muntu kwiambila mwine biji ku muchima wanji kwingijisha peja 6:

Mweshai mwina nzubo mepuzho aji panshi ya peja, kabiji ne kumwipuzha’mba, “Abya mwakilangulukapo kala pa bwipuzho buji bonse pa ae mepuzho nyi?” Umvwe wamwesha kuta muchima pa bwipuzho bumo pa ae mepuzho, zhikulai pa mapalagalafu aji mu buku akumbula buno bwipuzho. (Monai kabokoshi kaji pa ino peja ya kyamukachi.) Kimye kyo mubena kwisamba bino byambo bonse, ko kuba’mba mubena kufunjisha lufunjisho lwa Baibolo.

◼ Peja 7 yakonsha kwingijishiwa kumwesha bya kufunda lufunjisho lwa Baibolo:

Tangai mikuku ya byambo itanshi isatu iji pa ino peja, apa bino muzhikule kitango 3 kabiji ne kumwesha bya kufunda lufunjisho kwingijisha mapalagalafu 1-3. Nengezhai kukabwelako na kukesamba pa mikumbu ya mepuzho aji mu palagalafu 3.

◼ Bya kunengezha kubwelako:

Pa kupwisha lufunjisho lutanshi, nengezhai kukatwajijila mwisambo. Mwakonsha kwambatu amba: “Mu maminiti achechetu, twafunda Baibolo byo afunjisha pa mutwe wanema bingi. Juba jikwabo tukesamba [bulañanai bwipuzho bwa kukesambapo]. Nakonsha kwiya mulungu mukwabo pa kyo ka kino kimye nyi?”

Byo tubena kufwenya kwipi na juba jatongolwa ja Yehoba, aye utwajijila na kwitukwasha pa kuba’mba twingile mwingilo wetu ye twapewa. (Mat. 28:19, 20; 2 Timo. 3:17) Twayai twingijishenga bulongo kino kingijisho kya bukumo kyawama kya kutendekelamo mafunjisho a Baibolo.

[Kitenguluzha pa peja 3]

Mwisambo wa Binembelo biji pa Mapeja 4-5

◻ Lumwekesho 21:4 (mape. 27-8, mapala. 1-3)

◻ Isaya 33:24; 35:5, 6 (pe. 36, pala. 22)

◻ Yoano 5:28, 29 (mape. 72-3, mapala. 17-19)

◻ Masalamo 72:16 (pe. 34, pala. 19)

Mikumbu ya Mepuzho aji pa Peja 6

◻ Mambo ka o tuyanjila? (mape. 108-9, mapala. 6-8)

◻ Twakonsha kuba byepi na bijikila bya mu bwikalo? (mape. 184-5, mapala. 1-3)

◻ Twakonsha kulengela byepi bwikalo bwa kisemi kyetu kwikala bwa lusekelo? (pe. 143, pala. 20)

◻ Ki ka kyubiwa kwi atweba inge twafwa? (mape. 58-9, mapala. 5-6)

◻ Nanchi batemwe betu bafwa tukebamona jibiji nyi? (mape. 72-3, mapala. 17-19)

◻ Twakonsha kushiinwa byepi amba Lesa ukafikizha milaye yanji mu kimye kya kulutwe? (pe. 25, mapala. 17)