Nanchi Mwakonsha Kutendeka Lufunjisho lwa Baibolo mu October Nyi?
1. Tukashanga ka mu October?
1 Mu October tukashanga magazini wa Kyamba kya Usopa ne Awake! Pa kuba amba tubwele ku bantu bamwesha lusekelo, twatundaikwa kwingijisha talakiti wa Nanchi Mukeba Kuyuka Bukine Nyi? kabiji ibikishaiko kutendeka lufunjisho lwa Baibolo. Twakonsha kuba byepi bino pa kubwelako?
2. Twakonsha kwingijisha byepi talakiti wa Kuyuka Bukine kutendekelamo lufunjisho lwa Baibolo pa kubwela ku muntu watambwile magazini?
2 Bya Kwingijisha Talakiti: Twakonsha kwamba amba: “Magazini o nemushijile akwasha bantu ba bwikalo ne bupopweshi bwapusana pusana kuyuka bya kwingijisha Baibolo. [Pai mwina nzubo talakiti wa Kuyuka Bukine, ne kumumwesha mepuzho aji pa jipa jitanshi.] Baibolo upana mikumbu yawaina ku ano mepuzho anema. Nanchi mwakishikishapo ano mepuzho nyi?” Panyuma ya kumvwa mukumbu wa mwina nzubo, tangilai nanji pamo mukumbu uji mu talakiti wa bwipuzho bwanji ne kutanga kinembelo kimo kijimo. Pano mubulai kuba amba kino ke kyakumwenakotu kicheche pa bifunjisha Baibolo ne kumupa buku wa Baibolo Ufunjisha. Kabiji twakonsha kwisamba nanji mafuka atanshi mu kitango kyo aji kusala pa bintu bijimo. Nangwa twakonsha kuzhikula pa jipa paji bishinka byavula bya mutwe ye twisambilepo mu talakiti. Mwakonsha kwingijisha bino byambo byalondelapo:
● Nanchi Lesa kine wituta muchima nyi? (mapa 9-11, mafu. 6-10)
● Nanchi makondo ne buyanji bikapwa nyi? (jipa 12, mafu. 12-13)
● Nanchi tutwajijila kwikala bomi umvwe twafwa nyi? (mapa 59-60, mafu. 7-8)
● Luketekelo ka lo tuji nalo pa mambo a bafu? (jipa 71, mafu. 13-15)
● Nakonsha kulomba byepi pa kuba’mba Yehoba omvwe milombelo yami? (mapa 166-167, mafu. 5-8)
● Nakonsha kutana byepi lusekelo mu bwikalo? (jipa 9, mafu. 4-5)
3. Twakonsha kwingijisha byepi nsolomokelo yapusana pusana kwesakana na bantu bo tutana?
3 Pano bino, umvwe twakankalwa kutendeka lufunjisho lwa Baibolo mu buku wa Baibolo Ufunjisha pa kimye kitanshi kyo twabwelako, twakonsha kunengezha kubwelako jikwabo ne kutwajijila mwisambo wetu. Kwesakana na kizaku kya muntu ye twatana, kimye kimo twakonsha kukeba kwisamba naji mepuzho avula saka tukyangye kumumwesha buku. Mwane twayai tukengijishe uno talakiti bulongo mu October kutendekelamo mafunjisho a Baibolo ne kukwasha bantu bakishinka ‘kuyuka bukine.’—Yoa. 8:31, 32.