Bya Kusha Buku wa Baibolo Ufunjisha

Mu kino kyamukachi muji mashinda apusana pusana a kushilamo buku wa Baibolo Ufunjisha. Pa kwamba bulongo, byambai mu byambo byenu, pimpulai bya kwamba kwesakana na bantu baji mu nyaunda yenu, kabiji yukai bishinka bya kwisambapo biji mu uno buku. Mashinda akwabo engila a kwambilamo mu nyaunda yenu, akonsha kwingijishiwa.—Monai Mwingilo Wetu wa Bufumu wa January 2005, pe 8.

Amagedonyi

◼ “Umvwe bantu baumvwa kyambo kya ‘Amagedonyi,’ bavula balanguluka’mba konaunwa kwa bantu bavula. Nanchi mwakonsha kukumya umvwe mwaumvwa’mba Amagedonyi ke kintu kyawama kyo twakonsha kutengelanga na lusekelo nyi? [Lekai akumbule. Apa bino mutange Lumwekesho 16:14, 16.] Akimonai bino byambo byaamba pa bikekala bwikalo panyuma ya Amagedonyi.” Zhikulai pa mapeja 82-4, ne kutanga palagalafu 21.

Baibolo

◼ “Bantu javula bamba’mba Baibolo Mambo a Lesa. Abya mwakiipuzhapo kala ene mambo buku wanembelwe na bantu kyo bamutelela’mba Mambo a Lesa nyi? [Lekai akumbule. Apa bino mutange 2 Petelo 1:21 ne palagalafu 5 iji pa mapeja 19-20.] Uno buku upana mikumbu ya mu Baibolo ya ae mepuzho.” Mweshai mepuzho aji pa peja 6.

◼ “Ano moba, bantu bavula baji na jishuko ja kumvwa ku byambo byavula kukila kala. Pano kwepi ko mulanguluka’mba ko ko twakonsha kutana bukwasho bwawama bwakonsha kwitukwasha kwikala bwikalo bwawama bwa lusekelo? [Lekai akumbule. Apa bino mutange 2 Timoti 3:16, 17 ne palagalafu 12 pa peja 23.] Uno buku walumbulula byo twakonsha kuba bintu bisangajika Lesa kabiji ne kumwenamo atweba bene.” Mweshai mutanchi wa bintu byo ashikwa ne kipikichala kiji pa peja 122-3.

Lufu/Lusanguko

◼ “Bantu bavula kibakatazha bingi kuyuka kimweka umvwe muntu wafwa. Abya mulanguluka amba kyapela kwi atweba kuyuka nyi? [Lekai akumbule. Apa bino mutange Musapwishi 9:5 ne mapalagalafu 5-6 pa mapeja 58-9.] Kabiji uno buku walumbulula ne milaye ya mu Baibolo ya lusanguko lwa boba bafwa.” Mweshai kipikichala kiji pa peja 75.

◼ “Umvwe mulunda netu ye twatemwa wafwa, tukebesha bingi kumumona jibiji. Kechi ibyo nenyi? [Lekai akumbule.] Bantu bavula batana lutekenesho mu mulaye wa mu Baibolo wa lusanguko. [Tangai Yoano 5:28, 29 ne mapalagalafu 16-17 pa mapeja 71-2.] Kabiji kino kitango kyakumbula ano mepuzho.” Mweshai mepuzho a kutendekelapo aji pa peja 66.

Bumi bwa Myaka ne Myaka

◼ “Bantu bavula bakeba kwikala na butuntulu bwa mubiji bwawama ne kwikala myaka ne myaka. Umvwe kyakonsheka, nanchi mwakonsha kutemwa kwikala myaka ne myaka nyi? [Lekai akumbule. Apa bino mutange Lumwekesho 21:3, 4 ne palagalafu 17 pa peja 54.] Uno buku walumbulula byo twakonsha kwikala na bumi bwa myaka ne myaka ne bikekala bwikalo kimye uno mulaye kyo akafikizhiwa.”

Kisemi

◼ “Atweba bonse tukeba kwikala bwikalo bwa kisemi bwa lusekelo. Kechi ibyo nenyi? [Lekai akumbule.] Baibolo wambapo kintu kimo kyafwainwa kuba uji yense mu kisemi pa kuba’mba kisemi kikale kya lusekelo.—kulonda Lesa mu kumwesha butemwe.” Tangai Efisesa 5:1, 2 ne palagalafu 4 pa peja 135.

Mazubo

◼ “Mu mapuzha avula, pa kutana mpunzha yawama pa kwikala kyashupa bingi. Abya mulanguluka kuba’mba juba jimo kukekala mazubo avula mwa kwikala muntu yense nyi? [Lekai akumbule. Apa bino mutange Isaya 65:21, 22 ne palagalafu 20 pa peja 34.] Uno buku walumbulula bikafikizhiwa uno mulaye wa Lesa.”

Yehoba Lesa

◼ “Bantu bavula baitabila mwi Lesa bakeba kufwenya kwipi ne aye. Nanchi mwayuka kuba’mba Baibolo witwita atweba kufwenya kwipi ne aye nyi? [Lekai akumbule. Apa bino mutange Yakoba 4:8a ne palagalafu 20 pa peja 16.] Uno buku wanengezhiwa kukwasha bantu kufunda byavula pe Lesa, kwingijisha Baibolo wabo bene.” Mweshai mepuzho a kutendekelapo aji pa peja 8.

◼ “Bantu bavula balombela jizhina ja Lesa amba jizhijikwe, nangwa’mba jizhile. Abya mwijiyuka jino jizhina nyi? [Lekai akumbule. Apa bino mutange Masalamo 83:18 ne mapalagalafu 2-3 pa peja 195.] Uno buku walumbulula bulongo Baibolo byo afunjisha pe Lesa ne nkebelo yanji ku bantu.”

Yesu Kilishitu

◼ “Bantu baji panopantanda baumvwapo kala Yesu Kilishitu. Bamo bamba’mba kechi wajingatu muntutu wayile nkuwa ne. Bakwabo nabo bamupopwela amba Lesa Wabulume bonse. Nanchi mulanguluka kuba’mba kyanema kumuyuka bulongo Yesu Kilishitu nyi?” Lekai akumbule. Apa bino mutange Yoano 17:3 ne palagalafu 3 pa mapeja 37-8. Mweshai mepuzho a kutendekelapo aji munshi ya mutwe wa kitango.

Lulombelo

◼ “Abya mwakilangulukapo kala bikumbula Lesa milombelo nyi? [Lekai akumbule. Apa bino mutange 1 Yoano 5:14, 15 ne mapalagalafu 16-18 pa mapeja 170-2.] Kino kitango kyalumbulula ene mambo o twafwainwa kulombela kwi Lesa kabiji ne byo twafwainwa kuba pa kuba’mba etumvwe.”

Bupopweshi

◼ “Bantu bavula batendeka kumona bupopweshi bwa mu ntanda amba bo bubena kuleta makatazho ku muntu kechi bukwasho ne. Nanchi mwalanguluka’mba bupopweshi bubena kutangijila bantu mu jishinda jaoloka nyi? [Lekai akumbule. Apa bino mutange Mateo 7:13, 14 ne palagalafu 5 pa mapeja 145-6.] Kino kitango kyalondolola mbaji itanu na jimo iyukanyikisha bupopweshi bwaitabilwa kwi Lesa.” Mweshai mutanchi uji pa peja 147.

Malwa/Buyanji

◼ “Umvwe kwamweka bya malwa, bantu bavula bazhinauka Lesa amba kana uta muchima bantu nangwa kumona buyanji bo bapitamo nyi nangwa ne. Nanchi ne anweba mwakilangulukapo kala byobyo nyi? [Lekai akumbule. Apa bino mutange 1 Petelo 5:7 ne palagalafu 11 pa peja 11.] Uno buku walumbulula Lesa byo akafumyapo kikupu buyanji bonse bupitamo bantu.” Mweshai mepuzho a kutendekelapo aji pa peja 106.

Nkondo/Mutende

◼ “Bantu konse konse bakebesha bingi mutende. Abya mulanguluka kuba’mba luketekelo lwa mutende panopantanda kilototu nyi? [Lekai akumbule. Apa bino mutange Masalamo 46:8, 9.] Uno buku waamba pe Lesa byo akafikizha nkebelo yanji ne kuleta mutende panopantanda ponse.” Mweshai kipikichala kiji pa peja 35, ne kwisamba mapalagalafu 17-​21 aji pa mapeja 33-4.

[Kitenguluzha pa peja 5]

Mashinda a Kwambilamo Lunengezho lwa Mibingu

“Umvwe musakukeba kubingulako mubingu mucheche ku mwingilo wetu wa ntanda yonse, nsakusanta bingi.”

“Nangwa kya kuba mabuku etu kechi tupotesha ne, tusanta bingi mibingu ya kwitemenwa ya ku mwingilo wetu wa ntanda yonse.”

“Mwakonsha kukumya uno mwingilo byo engijiwa. Ke na mambo a kuba’mba mwingilo wetu wa ntanda yonse ukwashiwa na mibingu ya kwitemenwa. Umvwe mukeba kubingulako mubingu mucheche lelo, nsakusanta bingi.”