Bya Kwamba pa Kusha Magazini

Kyamba kya Usopa Mar. 1

“Atweba bonse twayuka’mba Adama patanshi wakijingatu bunke mwanamukazhi saka akyangye kulengwa. Kino kimwesha nkebelo ya Lesa ya mwanamulume kutangijila ne kwikala mutwe. Nangwa byonkabyo, bumutwe bwa mutundu ka mwanamulume bo afwainwa kumwesha mu nzubo? [Lekai akumbule.] Kino kyepelo kyaambapo kintu kimo banabalume kyo bafwainwa kulangulukapo. [Tangai 1 Kolinda 11:3.] Kino kibaba kyalondolola’mba, byo kiji kuba’mba Kilishitu ye mutwe wa mwanamulume, banabalume bafwainwa kulonda kya kumwenako kyanji.”

Awake Feb.

“Nanchi mulanguluka’mba kino kyo kine kintu kitulengela kumona makatazho avula mu ino ntanda nyi? [Tangai 1 Yoano 5:19. Apa bino mumuleke akumbule.] Kino kibaba kyamwesha Baibolo byo aambapo pa mambo a bya kuyuka ‘aye mubi’ kabiji byo twakonsha kuchinuzhuka mashinda anji atama.” Mumweshai kibaba kyatendekela pa peja 12.

Kyamba kya Usopa Mar. 1

“Mu ndangulukilo yenu, ñanyi makatazho o batana bakyanyike pa kukokela bansemi babo? [Lekai akumbule.] Akimonai Binembelo byo byaambapo pa bakyanyike byo bafwainwa kukokela, kwa kubula kulanguluka’mba baji na maana a kwitangijila abo bene. [Tangai Luka 2:​51, 52.] Kino kibaba kyamwesha Yesu, nangwa kya kuba wajinga muntu walumbuluka byo aikele wakumwenako wawama ku baana bonse lelo jino kupichila mu kukokela bansemi banji kimye kyo ajinga panopantanda.”

Awake Mar.

“Mu ndangulukilo yenu, ñanyi makatazho amo o babena kupitamo bakyanyike lelo jino? [Lekai akumbule.] Kino kyepelo kyaambapo lukatazho lumo lwa kukeba kwikala na balunda bawama. [Tangai Byambo bya Mana 13:20.] Ino magazini yaamba pa bizumba biji mu kutana balunda kwingijisha Intaneti kabiji yalondolola ne bakyanyike byo bakonsha kuzhikijilwa.”