Branch Letter

Basapwishi ba Bufumu Batemwe:

Twibalusekelo bingi pa kumona kuyilako palutwe kwa mwingilo muno mu Zambia mu uno mwaka wa mwingilo wa 2007. Mu March, kibelengelo kya bapainiya ba kimye kyonse kyafikile ku 10,655. Balongo bavula bapita mu Sukulu ya Lufunjisho lwa Mwingilo batumwa mu bujimi kwikala bakulumpe benda, bapainiya beikajila ne ba kimye kyonse, babena kuba bingi bulongo mu uno mwingilo wa kusapwila.

Mulongo umo wapita mu Sukulu ya Lufunjisho lwa Mwingilo waambile’mba: “Pa juba jitanshi jo twajinga mu mwingilo ku mpunzha ko betutumine na kwingijila, bantu bakuminye bingi pa kwitumona satusapwila ku nzubo ne nzubo. Betushikishe’mba: “Mwafuma pi? Mambo kino kyo mubena kuba kechi kyubiwapo kuno ne.” Ponkapo twatendekele kwingijila pamo na basapwishi ne kwibakwasha kuyuka bya kwesakanya bulongo mingilo yabo ya bisemi na ya ku mupashi mu kipwilo.” Kintu kikebewa, ke kwikala na mutanchi wanengezhiwa bulongo. Basapwishi bakoma kabiji bayuka bulongo bya kwingila, bafwainwa kubulangako bakyanyike mashinda a kwingijilamo mwingilo bulongo.

Bintu bifuma mu kwingijila pamo kwa uno mutundu bileta bingi lusekelo. Makope a Mbila ya Bufumu Na. 37, ya kuba’mba “Mpelo ya Bupopweshi bwa Bubela iji Pepi!” ashiwe muno mu Zambia ajinga pepi nobe 2 milyonyi.

Nkebelo ya mikwekele ya uno mutundu ke ya kukwasha bantu ba michima ya kishinka kufunda Baibolo kine byo afunjisha. (Mat. 28:19, 20) Pa kusapwila, monainga’mba mwanemba jizhina ja muntu yense wamwesha lusekelo kuba’mba mukabweleko na nkebelo ya kutendeka lufunjisho lwa Baibolo. Twibalusekelo bingi kwingijila nenu pamo mu uno mwingilo wanema bingi kabiji twimutumina mutende wa butemwe bwa bwina Kilishitu.

Atweba balongo benu,

Ofweshi wa Musampi wa mu Zambia