Tekeneshai Balajika Michima
1 Mu kino kimye kyo tujimo, bantu babena kukeba bingi lutekenesho kukila byo kyajinga kala. Kulondela lutangijilo lwa Mfumu, aye Kilishitu Yesu, ne atweba twingila mwingilo wa “kwibabuka balajika michima.”—Isa. 61:1.
2 Jishinda ja Kutekenesheshamo Bantu: Pa kuba’mba tutekeneshe bantu, mwingilo wetu wafwainwa kwikala na byambo byanengezhiwa bulongo bipana lutundaiko. Umvwe ketukepesheko kwamba pa bintu byatama bya mu ino ntanda ne pa mafunjisho a bubela, misambo yetu ikekalanga ya kwamba pa bukine bwa mu Binembelo ne pa luketekelo lwa milaye ya Lesa itekenesha. Kino kechi kibena kulumbulula’mba kuba twaambapo pa Amagedonyi ne. Mwingilo wetu ke wa “kusapwila mwaka wa Yehoba wa kwibobila bantu lusa ne juba ja kushinkanya kwa Lesa wetu,” kabiji ne ‘kujimuna mubi amba aleke jishinda janji jatama.’ Nangwa byonkabyo, lujimuno lwa Amagedonyi ne kulumbulula lonaiko lukafumamo kechi lufungila pa kabeya kine kishina kya mambo awama a Bufumu ne.—Isa. 61:2; Ezi. 3:18; Mat. 24:14.
3 Ku Nzubo ne Nzubo: Tutana bingi bantu bavula bapopomenwa na mambo a bikola, kufwisha mutemwe wabo, nshiji ne makatazho a mali. Byo tuji bakulonda Kilishitu, ‘twibobila lusa’ aba bonse bo tutana mu mwingilo wetu. (Luka 7:13; Lo. 12:15) Nangwa kya kuba twakonsha kutangapo kinembelo kimo nangwa bibiji byalamata ku lolo lukatazho, twafwainwa ‘kupelawizha kumvwa,’ ne kuswisha yewo muntu kwiambila biji ku muchima wanji. (Yako. 1:19) Panyuma ya kuba twaumvwa byo aamba, po po twakonsha kuyuka byambo bya kumutekenesha.
4 Monka mu kwisamba na muntu, twakonsha kwamba’mba, “mbena kukeba kwimubulako byambo bikoseshañana kufuma mu Baibolo.” Twafwainwa kumona’mba kechi tubena kukanatu milanguluko yonse ya bubela awo muntu yo akonsha kwamba ne. Twafwainwa kutako muchima kwamba byambo bya lutundaiko ne bya lutekenesho kupichila mu kwingijisha Binembelo byakonsha kwibakwasha. Pa mambo a kino, mwakonsha kumona biji mu Ukupelulula Ukufuma mu Malembo mapeja 325-328 pa mutwe wa kuba’mba “Ukukoselesha” (Lutundaiko). Nangwa kampe mwakonsha kumupa mwina nzubo talakiti ya Lutekenesho ku Bapopomenwa ne kupitulukamo nanji mu byambo bijimo bikoseshañana.
5 Monaingapo Mashuko a Kutekenesheshamo Bantu: Nanchi mwayukapo wa kinkalankulo, mukwenu mo mwingijila, mo mufunjila nangwa wa mu kisemi ubena kukebewa lutekenesho nyi? Nanchi kuba mwaya na kupempula bantu ba uno mutundu ku mazubo abo na nkebelo ya kwibatekenesha mu Binembelo nenyi? Umvwe mwayuka ene mambo o babena kukebela lutekenesho, mwakonsha kunengezha bulongo bya kwamba pa bwikalo bo bajimo. Pa mambo a kukeba kutekenesha bantu, bamo banemba makalata nangwa kutuma mafoni. Butemwe bwa kine bwa kutemwa bantu buketulengela kwibomvwina lusa ne kwibatekenesha mu Binembelo.—Luka10:25-37.
6 Ee kine, twapewa mwingilo wa kutekenesha boba bajila, kusangajika bantu baji na bulanda, kabiji ne kwibakwasha kwikala na luketekelo lwa kimye kya kulutwe. Luno lo lutekenesho lo bakeba bantu kuzhokoloka ntanda yonse. Kwamba na lusekelo pa bintu byawama Lesa byo alaya kukalengela bantu ba michima ya kishinka kutekeneshiwa. Twayai tuvulukenga kimye kyonse kwibabuka balajika michima.