Kusapwila Kukebewa Kuchinchika
1 Mutumwa Paulo watainemo bingi lusekelo mu mwingilo wanji wa busapwishi ye aingijile myaka kukila pa 30. Byonkatu mwingilo yense uleta lusekelo byo ekala ne na makatazho, naye waikalanga na makatazho mu mwingilo wanji wa busapwishi. (2 Ko. 11:23-29) Pano bino, Paulo kechi wikilekele kusapwila ne. (2 Ko. 4:1) Wayukile kuba’mba bulume bwa kuchinchika pa kwingila mwingilo wanji bwafumanga kwi Yehoba. (Fili. 4:13) Na mambo a kuchinchika mu bukishinka, Paulo waambile’mba: “Ikalai ba kundondela amiwa, pamo byonka byo nji amiwa wa kumulondela Kilishitu.”—1 Ko. 11:1.
2 Kuchinchika Meseko Lelo Jino: Pa juba pa juba, balongo betu bavula bebendeleka, kwibakanya, nangwa kwibalengulula ku balongo babo ba mu kisemi, ku bakwabo pa nkito, nangwa ku sukulu. (Mat. 10:35; Yoa. 15:20) Kampe byobyo kiji ne kwi anweba. Kabiji kampe mukolwa kolwa, nangwa mubena kwibikako bingi kushinda bintu bimo bimukatazha ne meseko a lwitabilo lwenu ne a kumona’mba inge mwachinchika. Twakonsha kukosa kupichila mu kumona bya kumwenako bya bakalume bakishinka bakala ne bakwetu bena Kilishitu ba ano moba bapitapo kala mu makatazho ne kwiashinda.—1 Pe. 5:9.
3 Twakonsha kwikala na bulume bwa kwikala bakosa mu mwingilo kupichila mu kumona’mba ‘Twavwala byonse bya nkondo bya Lesa.’ (Efi. 6:10-13, 15) Kabiji kyanema bingi kulomba kuba’mba tuchinchike. Lesa upana mupashi wanji wazhila kuba’mba tuchinchike meseko. (2 Ko. 6:4-7) Pa kuba’mba tushinde nkondo yetu ya ku mupashi, twafwainwa kumvwina milaye ya Lesa. (Sala. 119:24, 85-88) Byonkatu mwana byo abwezha bwezhapo kutanga nkalata yafuma ku bashanji, kutanga Baibolo moba onse kwakonsha kukosesha bulunda bwetu ne Yehoba. Twikala na maana a kuyuka mwa kubila na meseko kupichila mu kufunda kimye kyonse lufunjisho lwa pa bunke. Kino kilengela milanguluko ya Lesa kwitukwasha mu bintu byo tukeba kuba ne kukosesha bulumbuluke bwetu.—Mana. 2:10, 11.
4 Kuchinchika Kuleta Bintu Byawama: Byonkatu byo kyajinga kwi Paulo, ne atweba inge twachinchika mu bukishinka aku na kwingila mwingilo wetu, tukasangajika muchima wa Yehoba kabiji ne atwe bene tukamwenamo byawama pamo ne bakwetu. (Mana. 27:11) Twayai tukosengako mu mwingilo, ne kumwesha’mba lwitabilo lwetu lwakosa kabiji “lwakijisha ngolode yonaika mu kunema nangwa beyeseka mu mujilo.”—1 Pe. 1:6, 7.