‘Ikalai Monka mu Butemwe bwa Lesa
1. Buku wa ‘Ikalai Monka mu Butemwe bwa Lesa’ wanembelwa ka?
1 Tubena kutengela kutatula kufunda mu buku wakatataka wa ‘Ikalai Monka mu Butemwe bwa Lesa’ pa Lufunjisho lwa Baibolo lwa Kipwilo kutendeka mulungu wa February 15! Nkalata yanembele Jibumba Jitangijila ku bonse batemwa Yehoba yapezhako byambo bya kuba’mba: “Twaketekela kuba’mba uno buku ukemukwasha bingi kutwajijila kwingijisha bukine mu bwikalo bwenu kabiji ne kwikala monka ‘mu butemwe bwa Lesa ... Buleta bumi bwa myaka.’—Yuda 21.”
2. Uno buku wakatataka uketukwasha byepi mu bwikalo?
2 Bijimo: Mwakonsha kwingijisha byepi mafunde a mu Baibolo mu bwikalo, nabiji na balunda, mu byakisangajimbwe, kunemeka buntangi, byubilo, mu masongola, mu ñambilo ne bisho? Jiwi jetu ja mu muchima jikafundwa mwayila mizhilo yaoloka iji mu Mambo a Lesa. (Sala. 19:7, 8) Tukomvwisha mwatala milanguluko ya Lesa ne kutundaikwa kumutokesha pa muchima mu bwikalo bwetu bonse.—Mana 27:11; 1 Yoa. 5:3.
3. Mambo ka o twafwainwa kutapo muchima kunengezha kukumbulangapo kimye kyonse pa lufunjisho?
3 Inengezhai Kukumbulapo: Kimye kyo mubena kunengezha ikalai na mulanguluko wa kutota Lesa pamo na bantu banji bapwila pamo. (Hebe. 13:15) Kipwilo kikafunjilanga pamo uno buku wakatataka. Bipungu bicheche byo batanchika biketukwashanga kunengezha bulongo ne kwipanza kukumbulapo pa lufunjisho. Kunengezha bulongo kuketulengelanga kukumbula mikumbu ikatundaikanga bakwetu kumwesha butemwe ne mingilo yawama, ne kulengela lufunjisho kuwama. (Hebe. 10:24) Kabiji kwamba pa lwitabilo lwetu kuketuletelanga bingi lusekelo.
4. Mambo ka o twafwainwa kulamina mizhilo ya Yehoba?
4 Bufuku bwapeleleko mu bwikalo bwanji panopantanda, Yesu waambile’mba kyanema kulama mikambizho ya Yehoba pa kuba’mba twikale mu butemwe bwanji. (Yoa. 15:10) Buku wa “Butemwa bwa Lesa” uketukwasha kulondela mafunde a mu Baibolo mu bwikalo bwetu ne ‘kwikala monka mu butemwe bwa Lesa.’—Yuda 21.