Inengezhezhai Jimo bulongo Kukavuluka Kivuluko
Byo kyaikalapo kya lusekelo ne jishuko ku baana ba bwanga ba kwa Yesu kunengezhezha jimo bulongo kukavuluka juba ja lufu lwa kwa Yesu Kilishitu! (Luka 22:19) Twakonsha kuba byepi pa kwinengezha kukavuluka Kivuluko?
◼ Kimye ne Mpunzha: Bonse bafwainwa kuyuka bulongo kimye ne mpunzha kukekela Kivuluko. Umvwe bipwilo kukila pa kimo bikengijishanga Nzubo ya Bufumu imo, kyanema bingi kufika bukiji ne kubula kwishindaika pa kulupuka, mambo kimye kyo betupa panyuma ya kupwila kyakepa bingi. Kyanema bingi kumona’mba bantu kechi babena kwishindaika pa kibelo, mwakupita ne pa kwimikila myotoka ne.
◼ Tubipepala twa Kwichilapo Bantu: Nanchi basapwishi bonse baji na tubipepala twa kwichilapo bantu ne kuyuka bijimo nyi? Nanchi mwinengezhezha jimo bya kusha tuno tubipepala twa lwito nyi? Bañanyi bo mukapa tubipepala twa lwito? Twafwainwa kwibikako pa kuba’mba tukashe tonse tubipepala twa lwito.
◼ Ñendelo: Bantu bamo bamwesha lusekelo, kabiji ne balongo ne banyenga nabo bakakebanga mwakwendela nangwa bukwasho bukwabo. Mwaubapo ka pa kukakwasha balongo ne banyenga bakakebanga bukwasho?
◼ Bimpashañano: Monai’mba kechi mwapishamo bimpashañano juba saka jikyangye kuzhika ne. Mwafwainwa kumona’mba mwatwajila bimpashañano mushingwa yense wakankalwa kutanwako na mambo a kukolwa nangwa na mambo a kukepelwa bulume bwa kwenda. Mwafwainwa kunengezhezha jimo shinkwa ne binyu.—Monai Kyamba kya Usopa kya March 1, 2003, peja 10-11, jifuka 14, 17.
◼ Nzubo ya Bufumu: Mwafwainwa kuwamishisha jimo bulongo nzubo ya Bufumu saka kukiji kimye. Michiba, matambula, tebulu wanengela bulongo ne kisapi kya kwanshikapo kyafwainwa kuletelwa jimo ku mpunzha kukekela Kivuluko. Umvwe mwaingijisha kishimikwa kikwabo, monai’mba biñambañamba bya kwambilamo bijitu bulongo kuba’mba bonse mu luonde bakakonshe kumvwa bikambanga ñambi. Mwafwainwa kusajila jimo baasha ne bakupishamo bimpashañano ne kwibabujila jimo mingilo yabo ne bya kwiingila, kabiji ne buneme bwa mvwajilo ne mwekelo yawama.
Pa jino juba janema ja kuvuluka Kivuluko kya lufu lwa kwa Yesu Kilishitu, tukeba kwinengezhezha jimo bulongo pa muntu pa muntu kabiji ne mu bu kipwilo kyonse. Ee, bibusa bya Yehoba bikekala pa boba bonse bamwesha lusanchilo kufuma panshi ya michima pa bintu byonse Yehoba byo anengezhezha bantu kupichila mu kitapisho kya Mwananji ye atemwisha, aye Yesu Kilishitu.