‘Jizhina ja Lesa Jizhile’
1. Kishina kya kubuñana kwa mwanzo kwa mu mwaka wa mwingilo wa 2012 kiji na ñanyi mutwe kabiji kyaimena pa ka?
1 Kyawama bingi kuba’mba tutelwa pa jizhina ja Nkambo walengele bintu byonse, aye Yehoba. Lesa ye witutelele pa jizhina janji kabiji byo tuji Bakamonyi ba kwa Yehoba, twayukanyikwa ku bantu pa jizhina ja Yehoba kutendekatu mu mwaka wa 1931. (Isa. 43:10) Mwana Lesa yenkawa umo, aye Yesu wanemekele jizhina ja Lesa kabiji kyo kintu kitanshi kyo aambilepo mu lulombelo lo afunjishe baana banji ba bwanga kulomba. (Mat. 6:9) Bino byambo bya kwa Yesu po paimena kishina kya kubuñana kwetu kwa mwanzo kwa mu mwaka wa mwingilo wa 2012. Kino kishina kiji na mutwe wa kuba’mba “Jizhina ja Lesa Jizhile.”
2. Ñanyi bintu byo tubena kutengela kumvwa?
2 Bintu byo Tukomvwa: Pa Kibelushi, jashi ja kuba’mba “Kwikala Bakalume ba Mwingilo wa Kimye Kyonse Kukwasha Kuyukanyikisha Jizhina ja Lesa” jikamba pa ene mambo mwingilo wa kimye kyonse kyo alengela bantu kwikala bwikalo bwawama. Kabiji tukomvwa jashi ja kushilañana jaamba’mba “Jimukai Kuchina Kuleta Mwenga pa Jizhina ja Yehoba,” jiketukwasha kuchinuzhuka bitewa bina. Bwipuzho bwa kuba’mba, Ki ka kiketukwasha kusapwila na mukoyo nangwa kya kuba bantu babula kumwesha lusekelo? ne bukwabo bwa kuba’mba, Ki ka kiketukwasha kwingila mwingilo wetu bulongo? bukakumbulwa mu jashi ja kuba’mba “Ene Mambo Jizhina ja Lesa o Jafwainwa Kuzhijikilwa.” Pa Mulungu, tukomvwa mbaji ina ya jashi ja kushilañana jaamba pa byo twakonsha kuzhijika jizhina ja Lesa kupichila mu kufuukula bintu byawama ne kwikala na ndangulukilo, ñambilo ne byubilo byawama. Kikatakata aba bafunda bukine katataka bakamwenamo mu jashi ja mvula bantu ja kuba’mba “Yehoba Ukazhijika Jizhina Janji Jikatampe pa Amagedonyi.”
3. Jishuko ka jo tuji najo kabiji kuno kubuñana kuketukwasha byepi?
3 Katatakatu Yehoba akazhijike jizhina janji. (Ezi. 36:23) Pa kino kimye, tuji na jishuko ja kunemeka bintu byonse bimenwako na jizhina jazhila ja Yehoba. Twaketekela’mba kuno kubuñana kwa mwanzo kuketukwasha atweba bonse kwingila mwingilo wetu bulongo ye twatelwa pa jizhina ja Lesa.