Nkunwa Yafwainwa Kwiitekezha pa Kuba’mba Imene

1. Ki ka kyo twafwainwa kutekezhanga pa kuba’mba kikome?

¹ Nkunwa yo babyala mu mashamba yafwainwa kwiitekezha pa kuba’mba imene. Byobyo kiji ne pa mambo a nkunwa ya bukine yo tubyala mu michima ya bantu mu nyaunda yetu. (1 Ko. 3:6) Twafwainwa kubwelangako kabiji ne kutekezha ino nkunwa ya kifwanyikizho kwingijisha Mambo a Lesa umvwe tukeba’mba ikizhe mizhazhi, kumena ne kukoma.

2. Twakonsha byepi kwala kitendekesho kya kukabwelako?

² Shai Mwashikisha Bwipuzho: Pa kunengezha bintu bya kwisamba na bantu mu mwingilo, mwafwainwa ne kunengezhezhapo bwipuzho bwakonsha kuzakula muchima wa yewo muntu bo mukakumbula kimye kyo mukabwelako. Mushikishai buno bwipuzho ku mpelo ya mwisambo pa kyonkakyo kimye kitanshi ne kumwambila’mba mukabwelako. Bavula basalulula mepuzho kufuma mu buku wa Baibolo Ufunjisha akonsha kwibalengela kumwesha mwina nzubo bya kufunda lufunjisho lwa Baibolo.

3. Ñanyi bintu byo mwafwainwa kunemba pa lwendo lutanshi lo mwisamba na yewo muntu?

³ Nembai Bintu Bibena Kukebewa: Aku mupwishatu kwisamba na muntu pa kimye kitanshi, nembai bintu byo mwaji kwisambangapo. Nembai jizhina janji ne ko ekala. Kyawama ne kunemba juba ne kimye kyo mwaji kwisambanga nanji, bintu byo mwaji kwisambapo kabiji inge mwaji kumushilapo ne buku, naye nembai. Nanchi waji kwamba’mba ujipo na bupopweshi ko aya nyi? Uji na kisemi nyi? Abya waji kwimubula bintu byo atemwa ne byo akeba kuyuka nyi? Abino bintu byakonsha kwimukwasha kukeya na kwisamba naji pa bintu byo akeba. Nembai ne kimye kyo mwaumvwañana kukabwelako ne bwipuzho bo mukeya na kukumbula.

4. Mambo ka o twafwainwa kubula kwikileka kuya ku bantu bamwesha lusekelo?

⁴ Kukoka Ne: Satana ubena kwingila bingi na ngovu ‘kwangata mambo’ o twabyala mu muchima wa muntu. (Mako 4:14, 15) Onkao mambo, kange mwikileke umvwe pa kubwelako mwabula kutana pa nzubo muntu uji na lusekelo lwa kukeba kufunda ne. Nanchi mwakonsha kumutumina nkalata nangwa kumushila kakalata munshi ya kinzhilo nyi? Painiya umo watendekeletu bulongo lufunjisho na mwanamukazhi umo bino kechi wamutainepo kimye kyo abweleleko ne. Onkao mambo, wamutumijile nkalata. Nyenga byo amutaine pa nzubo kimye kikwabo kyo aileko, uno mwanamukazhi watemenwe bingi pa kumona uno nyenga byo amutele muchima. Byo tutekezha nkunwa ya bukine, tumvwa bingi bulongo pa kumona byo yamena, kukoma kabiji ne ‘kupanga bipangwa makumi asatu, makumi atanu na jimo, ne kitota kimo.’—Mako 4:20.