Kakitenguluzha Ka Mepuzho

◼ Bañanyi Bafwainwa kunemba kakupashi katanwa pa nkupiko ya buku nangwa pa Intaneti?

Javula mabuku etu ekala na kakupashi pa nkupiko ya kunyuma muntu ko afwainwa kunemba ne kwikatuma ku ofweshi wa musampi kuba’mba bakamutumine buku nangwa amba ukeba Bakamonyi ba kwa Yehoba kumufwakesha. Kabiji umvwe muntu ukeba Kamonyi wa kumufunjisha Baibolo, wakonsha kwingijisha keyala wetu wa pa Intaneti wa www.watchtower.org. Luno lunengezho lubena kukwasha bantu bavula kufunda bukine. Nangwa byonkabyo, lukatazho lubena kwikalako bingi umvwe basapwishi banembelako bakilongo babo nangwa bakwabotu kuba’mba ofweshi wa musampi ebatumine mabuku nangwa kutuma muntu wa kwibafwakesha.

Bantu bamo ofweshi wa musampi bo atumina mabuku kwakubula bene kulomba, babena kwijizhañanya amba jibumba jetu jibena kwibakatazha kabiji ne kuba’mba jibabika pa mutanchi wa bo jitumina mabuku kwakubula abo bene kuyuka. Basapwishi bo baambila ku ofweshi wa musampi amba bakafwakeshe yewo muntu kibalenga bingi bumvu umvwe wazhingila pa kwisamba nanji. Onkao mambo, bantu bakeba mabuku nangwa kukeba Bakamonyi kwibafwakesha, bo bafwainwa abo bene kutuma tuno tumakupashi, kechi bakilongo nangwa balunda nabo kwibanembelako ne. Umvwe ofweshi wa musampi wamona’mba kano ka kupashi kechi kafuma ku yewo muntu mwine ne, bino bamunembelakotu, kafwako kyo akobapo ne.

Pano twakonsha kukwasha byetu wa kilongo nangwa muyukane wetu kufunda bukine? Umvwe mukeba’mba ekalepo na buku, anweba yenka mutuminai. Umvwe wamwesha lusekelo kabiji ukeba’mba Bakamonyi bakamufwakeshe bino kimukatazha kuba’mba mubule bakulumpe mu kipwilo kiji ko ekela, mwafwainwa kunemba kapepala ka Mwane Monai Uno Muntu (S-43) ne kupa munembeshi mu kipwilo kyenu. Aye naye ukamona byo mwanembapo ne kwikatuma ku ofweshi wa musampi. Bino umvwe awo muntu ukeba kufunda bukine uji mu kaleya, nangwa mu kipatela, kechi mwafwainwa kunembelako muntu wa uno mutundu amba ofweshi wa musampi ebakwashe ku mupashi ne. Mwafwainwa kumubula mwine amba akambile balongo bafwakesha oo mapunzha nangwa kumubula’mba mwine anembele ofweshi wa musampi.