Kakitenguluzha Ka Mepuzho

◼ Nanchi basapwishi bafwainwa kutwezhamo ne mutwe mu kwingijisha intaneti kusapwila nangwa kufunjisha bantu bekala mu kyalo kingi nyi?

Basapwishi bamo bengijisha intaneti kufunjisha bantu Baibolo bekala mu byalo mo bakanya mwingilo wetu nangwa mu byalo mwakepa basapwishi. Mu kuba bino mwafuma bintu byawama bingi mu byalo bimo. Nangwa byonkabyo, kuji bizumba byakonsha kwibikamo basapwishi inge ke bengijishe intaneti kwisamba na bantu bo babula kuyuka. Nangwa kya kuba intaneti ikwasha bantu bakishinka kukeba kufunda mambo a Bufumu, kwisamba kwa uno mutundu kwakonsha kulengela mulongo nangwa nyenga kutendeka kupwanañana na babi ne bansatuki. (1 Ko. 1:19-25; Kolo. 2:8) Kabiji mu byalo bimo mo bakanya mwingilo wa Bufumu, kafulumende wakonsha kusopa bantu byo bingijisha intaneti kabiji kino kyakonsha kubika balongo ne banyenga ba mu kyokyo kyalo mu lukatazho. Onkao mambo, basapwishi kechi bafwainwa kwingijisha intaneti pa kukeba bantu ba kusapwilako mambo awama bekala ku kyalo kingi ne.

Inge twasapwila mwenyi wafuma ku kyalo kingi ye twataana mu mwingilo, kechi twafwainwa kutwajijila kwisamba nanji inge wabwela ku kyalo ko ekala ne, kanatu inge ofweshi wa musampi witubuula kuba byobyo. Bino, twafwainwa kumumwesha keyala wetu wa jw.org pa kuba’mba ayukilepo bikwabo nangwa byo akonsha kutumina ofweshi wa musampi wa mu kyalo kyanji. Twakonsha ne kumutundaika kuya ku Nzubo ya Bufumu iji kwipi na ko ekala. Pano bino, mu byalo bimo kafwamo Mazubo a Bufumu ne. Umvwe wakebesha kumufwakesha ku Bakamonyi ba ku mpunzha ko ekala, twafwainwa kunemba kapepala ka Mwane Monai Uno Muntu (S-43) ne kupa munembeshi mu kipwilo kyetu. Munembeshi naye ukatuma kano kapepala kwingijisha jw.org. Ofweshi wa musampi wa mu kyalo muji yeo muntu ukeba kufunda bukine bakamonapo mashinda a kukwashishamo uno muntu kukosesha bulunda bwaji na Lesa.—Monai Mwingilo Wetu wa Bufumu wa June 2014 pa jipa 7 ne wa November 2011 pa jipa 2.

Inge muntu ye tufunda nanji Baibolo wavilukila ku kyalo kingi nangwa inge tubena kufunda na muntu wa ku kyalo kingi kwingisha intaneti, twafwainwa kulondela mashinda ambiwapo peulu. Inge kyaikala bino, twafwainwa kutwajijila kumutundaika kufika kimye kyo bakamufwakesha ku basapwishi ba ku kyokyo kyalo. Pano bino, inge muntu wikala mu kyalo mo bakanya mwingilo wetu, twafwainwa kujimuka bingi pa kwisamba byambo bya mu Baibolo kwingijisha makalata, mafoni nangwa biñambañamba bikwabo.—Mat. 10:16.