Kubanda Kubwelako Ne

Kutendekatu kimye kyo twapimpwileko Keyala wetu, bantu bakeba kufunda Baibolo bavujilako bingi. Mafunjisho a Baibolo akwabo avula atanwa kwingijisha mashinda akatataka a kusapwilamo ku mvula bantu. Ofweshi wa musampi wingijilapo bukiji bukiji inge kuji babena kukeba kufunda Baibolo. Kya kumwenako, inge muntu walomba lufunjisho lwa Baibolo pa keyala wa intaneti wa jw.org, ofweshi wa musampi utuma muluwe ku bakulumpe baji mu nyaunda muji yewo muntu panyuma ya moba abijitu. Nangwa byonkabyo, masawakya afuma mu mwingilo wa mu bujimi amwesha kuba’mba kimye kimo papita milungu yavula pa kuba’mba bafwakesha muntu walombele lufunjisho lwa Baibolo. Twakonsha kuba byepi pa kuba’mba tukwashe bantu bukiji bukiji ponka po bakiji na kizaku kya kufunda?—Mako 4:14, 15.

Inge muntu ubula kwikala mu nyaunda yenu ubena kukeba kufunda Baibolo, mwafwainwa kunemba bukiji bukiji kapepala ka Mwane Monai Uno Muntu (S-43) ne kupa munembeshi mu kipwilo kyenu bukiji bukiji. Munembeshi naye wafwainwa kutuma kano kapepala ku kipwilo kiji ku yoyo nyaunda nangwa kutumina ofweshi wa musampi jonkajo juba nangwa juba jalondelapo kwingijisha keyala wa jw.org. Bipwilo byabula kwikala na keyala wa pa jw.org byafwainwa kulondela mikambizho iji kunyuma ya kapepala ka (S-43). Bakulumpe mu bipwilo bafwainwa kumonanga biji pa uno Keyala kimye kyonse. Inge batambwila muluwe wa kuba’mba muntu mu nyaunda ya kipwilo kyabo ubena kukeba kufunda Baibolo, kechi bafwainwa kukankazhama ne. Musapwishi yense ye bapa mwingilo ku bakulumpe wa kufwakesha yewo muntu ukeba kufunda wafwainwa kuba byobyo bukiji bukiji. Inge mwatana kuba’mba ufwapo, mwafwainwa kusha kapepala po mwanemba nambala ya foni wenu nangwa ko mwikala.