Kyubilo kyakila mu Kunema kya Mufunjishi Wawama
1. Ñanyi kyubilo kikatampe kya mufunjishi wawama?
1 Ki ka kilengela muntu kwikala mufunjishi wawama wa Baibolo? Sukulu wa ku mubiji nyi? Kuyuka byavula nyi? Kwikala na maana nyi? Ine, Kyubilo kikebewa ke kyonkakya kyafikizha Mizhilo, kiyukanyikisha baana ba bwanga ba kwa Yesu, kabiji akya kyakila pa byubilo bikatampe byonse bya Yehoba. (Yoa. 13:35; Nga. 5:14; 1 Yoa. 4:8) Kino kyubilo ke butemwe. Mufunjishi wawama umwesha butemwe.
2. Mambo ka o kyanemena atweba bonse kutemwa bantu?
2 Temwai Bantu: Yesu Kilishitu aye Mufunjishi wayukisha, wamweshanga bantu butemwe kabiji kino kibalengelanga kumvwa byo aambilenga. (Luka 5:12, 13; Yoa. 13:1; 15:13) Umvwe twata bantu muchima tukebasapwilanga ponse po twashukilwa ka kimye. Mikiika nabiji kumanyikwa ne milengulwila kechi iketubwezha panyuma ne. Tukamweshanga lusekelo ku boba bo tusapwila ne kupimpula mashinda a busapwishi bwetu kuba’mba twisambe nabo pa bintu byo babena kukeba. Kechi tukekalangatu na kimye kyabaya na bo tufunjisha Baibolo bonka ne, bino tukekalangako ne na kimye kya kunengezhezhamo bulongo lufunjisho lonse lo tukesambapo na botufunjisha.
3. Kutemwa bukine bwa mu Baibolo kuketukwasha byepi mu mwingilo?
3 Temwai Bukine bwa mu Baibolo: Yesu naye watemenwe bukine bwa mu Baibolo kabiji wibumonanga’mba bya buneme. (Mat. 13:52) Umvwe twatemwa bukine, tukambanga na kizaku kabiji kino kikalengela banteleki betu nabo kwikala na lusekelo. Buno butemwe buketukwasha kuta muchima ku byambo byanema byo tubena kwamba mu kifulo kya kuchina’mba tusakulubankanya. Kino kyakonsha kwitulengela kubula kwikala na moyo mu mwingilo wetu.
4. Twakonsha kwikala byepi na kyubilo kya butemwe?
4 Ikalai na Butemwe Twakonsha kwikala byepi na butemwe ku bantu? Kupichila mu kulanguluka pa butemwe Yehoba ne Mwananji bo bamwesheshe kabiji ne kulanguluka pa bantu ba mu nyaunda yetu byo baji. (Mako 6:34; 1 Yoa. 4:10, 11) Kutemwa bukine bwa mu Baibolo kukabaya umvwe ke twikale na lufunjisho lwetu lwa pa bunke kimye kyonse ne kulangulukapo pa byo tufunda. Butemwe ke lubaji lwa kipangwa kya mupashi. (Nga. 5:22) Onkao mambo, twakonsha kusashijila Yehoba kwitupa mupashi wazhila ne kumulomba kwitukwasha kukomenako mu butemwe. (Luka 11:13; 1 Yoa. 5:14) Nangwa kya kuba twafunda sukulu wa ku mubiji, twabanda mu bukine nangwa tuji na maana a kisemwa, twakonsha kwikala mufunjishi wawama wa Baibolo umvwe ke tumweshe butemwe.