Mashinda Asatu Akonsha Kwimukwasha Kufunjishanga Bantu Bulongo
1. Mambo ka o twafwainwa kuwamishako byotufunjisha?
1 Basapwishi bonse ke bafunjishi. Kimye kyo tubena kwisamba na bantu kimye kitanshi, kubwelako ku bantu bamwesheshe lusekelo nangwa kufunjisha bantu Baibolo, kine kintu kikatampe ke kyakuba’mba tubena kubyala byambo mu michima yabo. Kabiji byambo byotufunjisha byanema bingi. Tusamisha kyeya pa “binembelo byazhila” abyo byakonsha kukwasha bantu “kwikala na maana a kumona lupulukilo.” (2 Timo. 3:15) Byoaikalapo mwingilo wanema! Akimonai ano mashinda asatu byo akonsha kwitukwasha kufunjishanga bantu bulongo.
2. Twakonsha kufunjisha byepi na byambo byapela kumvwa?
2 Kwamba Byambo Byapela Kumvwa: Umvwe twayuka bulongo mutwe, twakonsha kutendeka kumonanga kuba’mba uno mutwe kechi wakonsha kukatazha muntu wabula kumuyuka ne. Onkao mambo, kimye kyo mubena kufunjisha lufunjisho lwa Baibolo, kechi mwafwainwa kuvuzha byambo ne. Mu kifulo kyakuba bino, ambaitu pa bishinka bikatampe. Kwamba byambo byavula kechi ko kulumbulula’mba mwayuka kufunjisha bulongo ne. (Mana 10:19) Kyanema bingi kutangatu binembelo bibena kwaamba pa kishinka. Panyuma ya kutanga kinembelo, taitu maana pa byambo byakwatankana na kintu kyo mubena kwisambapo. Mu Jashi ja pa Mutumba janembwa mu Mateo kitango 5 kufika ku 7, mutanwa byambo byanema bingi, nangwa byonkabyo, Yesu wafunjishetu na byambo bicheche kabiji byapela kumvwa.
3. Mambo ka byakumwenako kyo byanemena kabiji byakumwenako ka byawama byo mwakonsha kwingijisha?
3 Byakumwenako: Byakumwenako bilengela muntu kutendeka kulanguluka, kumvwisha ne kubula kulubamo. Kechi mwafwainwa kulangulukanga amba kana mwaikala muntu wayuka bishimi apa bino kimupelela kwamba pa bya kumwenako byawama ne. Yesu javula waingijishanga byakumwenako bipi kabiji byapela kumvwa. (Mat. 7:3-5; 18:2-4) Kipikichala kyo mwalenga pa kipepala kyakonsha kwingila bulongo. Inge mwinengezha bulongo mwakonsha kusala byakumwenako byawama.
4. Twakonsha kwipuzha byepi mepuzho bulongo?
4 Mepuzho: Mepuzho alengela muntu ye mufunjisha Baibolo kulanguluka. Onkao mambo, mwafwainwa kumupako kimye inge mwaipuzha bwipuzho. Inge mwamukumbwilako bukiji bukiji, kechi mukayuka biji mu muchima wanji ne. Mukumbu ye akumbula umvwe kechi ye iye ne, kyawama kumushikisha bwipuzho bukwabo bwakonsha kumukwasha kukumbula mukumbu ubena kukebewa mu kifulo kya kufikenatu kumubula mukumbu. (Mat. 17:24-27) Kwambatu kine, atweba bonse kechi twibafunjishi bayukishane. Onkao mambo, Baibolo witutundaika kuteshako muchima ku byotufunjisha. Inge ketube bino mukafuma mapesho a kwikala na bumi bwa myaka atweba bene ne botufunjisha.—1 Timo. 4:16.