Funjishainga mu Ñambilo Yapela Kumvwa
1. Ñanyi jishinda jimo janema ja kufunjishishamo bulongo?
1 Kufunjisha mu ñambilo yapela kumvwa kwanema bingi. Kulanguluka pa byafunjishanga Yesu Mufunjishi Wayukisha kwakonsha kwitukwasha kuyuka bya ‘kufunjisha bulongo.’—2 Timo. 4:2; Yoa. 13:13.
2. Bi ka byavwangwamo mu kufunjisha mu ñambilo yapela kumvwa, kabiji bi ka bifumamo mu kuno kufunjisha?
2 Ñambilo Yapela Kumvwa: Mu Jashi ja pa Mutumba mwajinga bukine bwanema bingi bwabujile kwambapo muntu mukwabo. Byonse byaambilwe mu ñambilo yapela kumvwa. (Mat. bita. 5-7) Mabumba atelekelenga byaambilenga Yesu “akuminye mo afunjishenga.” Bamingilo bo batumine kuya na kumukwata baambile’mba: “Kafwako muntu waambile byo amba uno muntu ne.” (Mat. 7:28, 29; Yoa. 7:46) Kechi twafwainwa kwamba byambo bya kukumya, byakatazha kumvwa, nangwa bya kumwenako byavula pa kuba’mba bantu bomvwishe bukine ne. Bukine bwakonsha kulumbululwa kwingijisha byambo byayukanyikwa.
3. Mambo ka bamo o bafunjishisha bantu bintu byavula pa kimye kimo, kabiji kino kyakonsha kuchinuzhukwa byepi?
3 Kuyuka pa Kupelela: Yesu walangulukilangako luonde lwanji ne kuyuka pa kupelela mu byambo byo akebele kwamba pa kyo kyo kimye. (Yoa. 16:12) Twafwainwa kumonanga ne kuyuka mwakwambila, kikatakata kimye kyo tubena kusapwila balongo betu, bantu bamwesha lusekelo, nangwa banyike. Kechi twafwainwa kwibafunjishanga bintu byavula pa kimye kimo ne, nangwa kya kuba babena kuteleka bulongo. Bantu baji na michima ya kishinka bakatwajijila kufunda maana a Lesa wa kine Yehoba.—Yoa. 17:3; 1 Ko. 3:6.
4. Mambo ka o kyanemena kutesha muchima ku bishinka mu kifulo kya kwamba pa bintu byavula?
4 Ambainga pa Bishinka: Yesu kechi waambanga byambo byavula bya kulengela bantu kukankalwa kumvwisha ne. Byo aambile’mba: “Bonse baji mu bilende . . . bakafumamo,” kino kechi kyajinga kimye kya kwamba bintu byavula pa mambo a lusanguko lwa baubilenga byawama ne lusanguko lwa baubilenga byatama ne. (Yoa. 5:28, 29) Kimye kyo tubena kufunjisha mafunjisho a Baibolo, twafwainwa kutesha muchima pa bishinka ne kuchinuzhuka muteeto wa kuleta byambo bikwabo byabula mu mwisambo.
5. Mapesho ka o tumwenamo umvwe ke tufunjishe bulongo mu ñambilo yapela kumvwa?
5 Byo kyawamapo kuba’mba Yehoba witufunjisha ñambilo yapela yo twafwainwa kuyuka atweba bonse! (Mat. 11:25) Twayai atweba bonse twibikisheko kufunjisha bulongo mu ñambilo yapela kumvwa, mu kuba bino tukamwenamo lusekelo mu mwingilo.