Londai Mufunjishi Mukatampe
“Onkao mambo yainga na kwibasambisha ba mu mikoka yonse ya bantu . . . , ne kwibafunjisha balamenga byonse byo nemukambizhe.”—MATEO 28:19, 20.
1, 2. (a) Muñanyi jishinda atweba bonse motwaikela bafunjishi? (b) Pamambo akufunjisha ñanyi mwingilo wabaya bena Kilishitu bakine yebaji nanji?
NANCHI mwibafunjishinyi? Mujishinda jimo bonse twibafunjishi. Mambo kimye kyonse kyomubena kubula muntu walubilamo jishinda joafwainwa kuyamo, nangwa kimye kyomubena kubula mukwenu momwingijila byakwingila yewo mwingilo, nangwa kulumbulwila mwana byakukasa ntambo yapansapato yanji kokuba’mba mubena kufunjisha. Kukwasha bakwetu muano mashinda kwitusangajika bingi, keibyo nenyi?
2 Pamambo akufunjisha, bena Kilishitu bakine baji namwingilo wabaya bingi. Twatumwa kuya na ‘kufunjisha bantu . . . amba baluke ke baana babwanga.’ (Mateo 28:19, 20) Kabiji nangwatu mukipwilo namo twikala nakimye kyakufunjisha. Banabalume bakoma kumupashi batongolwa kwikala ‘bakafunga nebafunjishi,’ mukukomesha kipwilo. (Efisesa 4:11-13) Mumingilo yabo yabwina Kilishitu yapa juba pajuba, banabakazhi bakoma bafwainwa kwikala “bafunjishi bakufunjisha byawama” kubanabakazhi banyike. (Titusa 2:3-5) Atweba bonse betukambizha kukosesha bakwetu bamulwitabilo, kabiji twakonsha kulondela uno mukambizho mukwingijisha Baibolo kukomesheshako bakwetu. (1 Tesalonika 5:11) Byojaikalapo jishuko jakwikala mufunjishi wa Byambo bya Lesa nekubulako bakwetu mizhilo ikebakwashanga kikupu!
3. Twakonsha byepi kufunjisha bulongo byotuji bafunjishi?
3 Pano twakonsha byepi kufunjisha bulongo byotuji bafunjishi? Kikatampe, kekulonda Mufunjishi wetu Mukatampe, aye Yesu. Bamo bakonsha kwizhinausha’mba: ‘Pano twakonsha kulonda byepi Yesu, mambo aye wajinga waoloka?’ Kyakine kuba twaikala bafunjishi bayukishane. Bino twakonsha kwibikako kwingijisha bulume bwetu nangovu yonse kulonda jishinda joafunjishishengamo Yesu. Pano twayai twisambe pabyotwakonsha kwingijisha mashinda anji ana akufunjishishamo. Ano mashinda kekwamba byambo byapela kumvwa, kushikisha mepuzho afwainwa, ñambilo yamaana, nebyakumwenako byafwainwa.
Kufunjisha Mubyambo byapela Kumvwa
4, 5. (a) Mamboka kufunjisha mubyambo byapela kyokwanemena mubukine bwamu Baibolo? (b) Pakuba’mba tufunjishe mubyambo byapela kumvwa mamboka okyanemena kujimukila nabyambo byotubena kwamba?
4 Bukine buji mu Byambo bya Lesa kechi bwakatazhane. Mululombelo Yesu waambile’mba: ‘Nemutota Tata, . . . mambo mwibifile bino bintu ku bamaana ne ku bamilangwe, ne kwibisolola kutwana twalukeke.’ (Mateo 11:25) Yehoba wasolola nkebelo yanji kuboba baji namichima yakishinka ikepesha. (1 Kolinda 1:26-28) Onkao mambo, bukine bwamu Baibolo bwanembwa mubyambo byapela kumvwa bantu.
5 Mwakonsha kufunjisha byepi mubyambo byapela kumvwa kimye kyomubena kufunjisha lufunjisho lwa Baibolo lwapanzubo nangwa kimye kyomubena kubwela kubantu bakeba kufunda bukine? Twafunjilakoka ku Mufunjishi Mukatampe? Pakuba’mba bantu bamutelekelenga bomvwe, mambo bavula bajinga ‘bantutu babujile kufunda,’ Yesu waambilenga mubyambo bibapelejile kumvwa. (Byubilo 4:13) Kintu kitanshi kikebewa pakuba’mba tufunjishe mubyambo byapela kumvwa, twafwainwa kujimuka nabyambo byotubena kwamba. Kechi twafwainwa kwamba byambo byakukumya amba kokuba’mba bomvwishe bukine bwamu Byambo bya Lesa ne. ‘Byambo byalambisha [byavula byakobankana, NW]’ byakonsha kuchinyatu bantu, kikatakata boba babula kufunda sukulu kufika palepa nangwa babula bulume bwakukonsha kumvwisha. (1 Kolinda 2:1, 2) Mfunjishisho yakwa Yesu imwesha’mba byambo byapela byasalululwa bulongo byakonsha kulengela bantu kumvwisha bukine.
6. Twakonsha kuchinuzhuka byepi kuyekeka muntu yetubena kufunjisha Baibolo byambo byavula?
6 Kabiji pakuba’mba tufunjishe mubyambo byapela, twafwainwa kujimuka satuchinuzhuka kuyekeka ubena kufunda Baibolo byambo byavula. Yesu walangulukijilengako baana banji babwanga papelejile bulume bwabo. (Yoano 16:12) Netuwa twafwainwa kulangulukilako bulume bwamuntu yetubena kufunjisha. Kyakumwenako, kechi twafwainwa kubatu’mba kana tulumbulule byambo byonse kolololo kimye kyotubena kufunjisha lufunjisho mubuku wa Kuyuka Kutangijila ku Bumi Bwa Myaka ne.a Kabiji kechi twafwainwa kupitamotu lubilo uba nobe kufunda byambo byavula kyokintu kyanemeshane. Kuyuka papelela bulume bwayewo muntu yetubena kufunjisha nebintu byoaluba kokwakonsha kwitubula lubilo lotwafwainwa kwendelangapo pakufunda nanji. Kikonkwanyi kyetu kekyakukwasha yewo muntu yetubena kufunjisha kwaluka kemwana wabwanga wa Kilishitu nekwikala mupopweshi wa Yehoba. Twafwainwa kufunda nanji mukimye kiji kyonse kyafwainwa kumukwasha kukwatakanya byambo byoabena kufunda. Mujino jishinda bukine bwakonsha kumufika pamuchima nekumukwasha kwaluluka.—Loma 12:2.
7. Mashindaka akonsha kwitukwasha kufunjisha mubyambo byapela kimye kyotubena kwamba jashi mukipwilo?
7 Kimye kyotubena kwamba jashi mukipwilo, kikatakata umvwe muluonde muji nebakatataka, twakonsha kwamba byepi byambo byapela “kumvwanyika”? (1 Kolinda 14:9) Monai bino bintu bisatu byakonsha kukwasha. Kitanshi, lumbululai byambo byabula kuyukanyikwa byomubena kwamba. Kufunda Byambo bya Lesa kwitulengela kuyuka byambo byashupa kumvwa bantu. Inge twaamba byambo nabiji byakuba’mba ‘kalume wa kishinka ne wa maana,’ ‘mikooko ikwabo,’ ne ‘Babilona Mukatampe,’ twafwainwa kwibilumbulula mubyambo byapela pakuba’mba kishinka kyumvwanyike bulongo. Kyabubiji, kekubula kwamba byambo byavula byakuba saulolobwelatu. Byambo byavula byakobankana byakonsha kulengela luonde kuleka kutako muchima. Pakuba’mba byambo byumvwanyike mwafwainwa kufumyamo byambo bibena kubula kukebewa. Kyabusatu, kechi mwafwainwa kufunjisha byambo byavujishane. Pakupesa-pesa twikala bingi nabyambo byawama byavula. Pano bino kyawama kunengezha byobyo byambo mubishinka bikatampe bicheche, kwambakotu bine byambo bibena kukwasha kulumbulula byobyo bishinka byomwakonsha kwamba bulongo mukimye kyapanyiwa.
Kushikisha Mepuzho Afwainwa
8, 9. Twakonsha kusala byepi jipuzho jakwambilamo byambo byakonsha kutemwa mwina nzubo? Ambai byakumwenako.
8 Vulukai kuba’mba Yesu wayukile bingi kushikisha mepuzho alengejilenga baana banji babwanga kwamba bintu byobalangulukilenga, nekulangula milangwe yabo, apa bino nekufunjisha ndangulukilo yabo. Yesu wibafikilenga pamuchima namepuzho anji. (Mateo 16:13, 15; Yoano 11:26) Nabiji byajinga Yesu, twakonsha kushikishanga byepi mepuzho afwainwa?
9 Pakusapwila kunzubo nenzubo, twakonsha kushikisha mepuzho kuba’mba tulengele bobo bantu kukeba kumvwa byambo, kino kitushinkwila jishinda jakwambilamo nabo Mambo a Bufumu bwa Lesa. Twakonsha kusala byepi jipuzho jakwambilamo byambo byakonsha kutemwa mwina nzubo? Monainga bibena kubiwa. Kenkentai mwaya lubanza kimye kyomubena kusolomoka panzubo. Nanchi mwamonapo tubintu twakukaisha tukaisha banyike tubena kumwesha’mba payoyo nzubo paji nebanyikenyi? Umvwe ibyo, mwakonsha kushikisha’mba: ‘Abya mwalangulukapo kala bikekala ino ntanda kimye kikakoma baana benunyi?’ (Masalamo 37:10, 11) Mwamonapo maloko obakiya pabinzhilo, inyi luvimba wakuchinya bangivi kupasula nzubo. Pano twakonsha kushikisha’mba: ‘Abya mulangulukapo’mba kukekalapo kimye bantu nabiji anweba neamuwa kyotukekala bakasuluka mumazubo etu nekimye kyotubena kwenda mumikwakwanyi?’ (Mika 4:3, 4) Umvwe mwamona kuba’mba paji walemana, mwakonsha kushikisha’mba: ‘Nanchi kukekalapo kimye bantu bonse kyobakekala nabutuntulu bwamubiji bwawamanyi? (Isaya 33:24) Mwakonsha kutana mashinda avula mwakwambila mubuku wa Ukupelulula Ukufuma Mu Malembo.b
10. Twakonsha kushikisha byepi mepuzho akonsha kulengela muchima wamuntu yetubena kufunjisha Baibolo ‘kufumya’ milanguluko nebyoabena kwiumvwa mumuchima wanji, bino twafwainwa kuvulukangaka?
10 Twakonsha kushikisha byepi mepuzho afwainwa kimye kyotubena kufunjisha mafunjisho a Baibolo? Atweba kechi tuji nobe Yesu wayuka biji mumuchima wamuntune. Bino nangwa byonkabyo, kujimuka nekushikisha namaana kwakonsha kwitukwasha kulengela yewo muntu yetubena kufunjisha ‘kufumya’ milanguluko nebyoabena kwiumvwa mumuchima wanji. (Byambo bya Mana 20:5) Kyakumwenako, kampe tubena kufunda kitango kyaamba’mba: “Mambo Kwikala Bwikalo Bwa Kwakamwa Lesa o Kuletela Lusekelo,” mubuku wa Kuyuka. Kino kitango kyaamba pe Lesa byoashikwa kubula bukishinka, bulalelale, nebintutu bikwabo. Muntu yetubena kufunjisha wakonsha kukumbula bingi bulongo jipuzho janembwa, pano nanchi kine waswa kyoabena kufundanyi? Twakonsha kumushikisha’mba: ‘Nanchi nenuwa mwikimona kuwama Yehoba byoashikwa bino bintunyi?’ ‘Mwakonsha kwingijisha byepi ano mafunde amu Baibolo mubwikalo bwenu?’ Bino vulukai’mba twafwainwa kwikala bamushingi, kasa tubena kumupa mushingi yetubena kufunjisha. Kechi twafwainwa kumushikisha mepuzho akumusebanya nangwa kumulengesha bumvu muntu ubena kufunda Baibolo ne.—Byambo bya Mana 12:18.
11. Muñanyi jishinda bañambi bamba pamvula-bantu mobakonsha kushikishisha mepuzho afwainwa?
11 Bañambi bamba majashi amvula-bantu nabo bafwainwa kushikisha mepuzho afwainwa. Mepuzho akwikumbula bene bantu. Ano kemepuzho obekumbwilatu bene bantu babena kuteleka mukachi kamichima yabo kabiji ebakwasha kulangulukapo. Pakimye nepakimye, Yesu washikishenga mepuzho auno mutundu. (Mateo 11:7-9) Kunungapo, panyuma yakwamba byambo byakutendekelapo, ñambi wakonsha kushikisha mepuzho akutongaula bishinka bikatampe bisakwambiwapo. Wakonsha nangwa kwamba’mba: “Mumwisambo wetu lelo jino tusakukumbula ano mepuzho . . . ” Apa bino kumpelo yajashi janji wafwainwa kubwela jibiji kuoa mepuzho oaji kwipuzha patanshi kuba’mba apituluke mubishinka bikatampe.
12. Ambai kyakumwenako kyakumwesha bakulumpe mukipwilo babwina Kilishitu byobakonsha kushikisha mepuzho akukwasha mukwabo mulwitabilo kutekeneshiwa na Byambo bya Lesa.
12 Mumwingilo wabo wabukafunga, bakulumpe mukipwilo babwina Kilishitu bakonsha kushikisha mepuzho akukwasha “ba michima yapungila” kutekeneshiwa na Byambo bya Yehoba. (1 Tesalonika 5:14) Kyakumwenako pakukwasha muntu wapopomenwa, mukulumpe mukipwilo wakonsha kumutangila Masalamo 34:18 aamba’mba: “Yehoba uji kwipi na bonse balajika michima, kabiji wibapulusha bonse ba mipashi yalapila.” Pakushiinwa kuba’mba awe muntu wapopomenwa amone bino byambo byobyamufika, mukulumpe mukipwilo wakonsha kumushikisha’mba: ‘Yehoba uji kwipi nabañanyi? Nanchi kimye kimo mwiumvwapo nobe ‘mwalajika muchima’ na ‘mupashi walapilanyi’? Umvwe, kwesakana namwaambila Baibolo kuba’mba Yehoba uji kwipi nabantu bauno mutundu, nanchi kino kechi kibena kulumbulula’mba uji kwipi neanweba nenyi?’ Byambo byalusa byauno mutundu byakonsha kulangula mupashi wamuntu wapopomenwa.—Isaya 57:15.
Ñambilo Yamaana
13, 14. (a) Twakonsha kwambañana byepi namuntu wamba’mba kechi wakonsha kwitabila mwi Lesa yeabula kumonane? (b) Mamboka otwakonsha kubula kuketekela’mba kechi yense wakonsha kushiinwane?
13 Mumwingilo wetu tukeba kufunjisha bantu satubena kwibafika pamuchima nañambilo yamaana yakwibetabisha. (Byubilo 19:8; 28:23, 24) Nanchi kino kibena kulumbulula’mba twafwainwa kwambanga ñambilo yamaana akatazha kuba’mba bantu betabe bukine bwa Byambo bya Lesa nyi? Ine binone. Kwambañana kwalumbuluka kechi kwafwainwa kwikala kwakatazhane. Ñambilo yamaana yambiwa mujishinda japela ilengela muntu kumvwa. Monai kyakumwenako kimo.
14 Twakonsha kukumbula byepi muntu wamba’mba kechi wakonsha kwitabila mwi Lesa yeabula kumonane? Twakonsha kwambañana nanji pañiñijilo yamuzhilo wabilengwa wakuba kintu nebifumamo. Umvwe twamona kintu kyaubiwa, tuswa kuba’mba kuji kyalengela kuba’mba kino kintu kyubiwe. Twakonsha kwamba’mba: ‘Umvwe kyakuba muji mungye mwine mukasokopyo, olo, kenkese kekunzubo yawama bingi mwayula kajo, kwakubula nangwa kuzhinaukatune mufikenatu kuswa’mba kuji muntu washimikile yoyo nzubo nekubikamo bintu bijimo. Byonkabyo neatweba byotumona ndengelo mwalengelwa bintu nekajo kavula kaji panopantanda, nanchi kuba mwaswa kuba’mba kuji wibilengele bino bintu nenyi?’ Baibolo yaamba bingi bulongo’mba: “Mazubo onse aji ne beashimika; kabiji aye washimika byonse ye Lesa.” (Bahebelu 3:4) Pano bino nangwa kyakuba mwambañane bulongo byepi nabantu, kechi bonse bakonsha kushiinwane. Baibolo ituvululako’mba posotu bonka ‘batongwelwa bumi’ bobakonsha kwitabila.—Byubilo 13:48; 2 Tesalonika 3:2.
15. Ñanyi ñambilo yakwambañana yotwakonsha kwamba mukukonkomwena pabyubilo nemashinda a Yehoba moobila bintu, kabiji byakumwenakoka bibiji bibena kumwesha byotwakonsha kwambañana mujojo jishinda?
15 Pakufunjisha kwetu kana mumwingilo wamubujiminyi, inyi kana mukipwilo, twakonsha kwamba nañambilo yamaana mukukonkomwena pabyubilo bya Yehoba nemashinda moobila bintu. Kikatakata ñambilo ingila bulongo Yesu yoatemenwe kwamba pakimye nepakimye keyoya yakuba’mba ‘nanchi aye.’ (Luka 11:13; 12:24) Ino ñambilo byoyaimana palupusano, yakonsha kulengela muntu kwimwena mwine abyo byambo byobyanema. Pakushiina bubela bwalufunjisho lwamujilo wahelo, twakonsha kwamba’mba: ‘Kafwako shetu watemwa mwananji wakonsha kubika kuboko kwamwananji pamujilone. Kokuba’mba nanchi aye Shetu wamwiulu washikwa bingi luno lufunjisho lwamujilo wahelo.’ (Yelemiya 7:31) Pakufunjisha kuba’mba Yehoba ulama bakalume banji pamuntu pamuntu, twakonsha kwamba’mba: ‘Yehoba byoayuka mazhina atubangabanga mabilyonyi, nanchi aye wakonsha kukankalwa kulama bantu bamutemwa kabiji bapotelwe namashi amutengo a Mwananji?’ (Isaya 40:26; Byubilo 20:28) Kwambañana kwakushiina kwauno mutundu kwakonsha kwitukwasha kufika bantu pamuchima.
Byakumwenako Byafwainwa
16. Mamboka byakumwenako kyobyanemena mulufunjisho?
16 Byakumwenako byafwainwa byawama bingi mambo bilengela bantu kwikala namujojo wakukeba kumvwa byambo. Mamboka byakumwenako kyobyanemena mulufunjisho? Mufunjishi umo waambile’mba: “Bantu kibakatazha bingi kulanguluka nekuyuka kibena kwambiwa umvwe kyakuba mubyobyo byambo kafwamo kintu kyobakonsha kufwanyikizhane.” Byakumwenako bitukwasha kufwanyikizha mumilanguluko bintu bibena kwambiwa, nekwitukwasha kuyuka byambo byakatataka. Yesu wayukile bingi kwamba byakumwenako. (Mako 4:33, 34) Twayai tumone byotwakonsha kwingijisha jino jishinda jakufunjishishamo.
17. Ñanyi bishinka bina biwamisha kyakumwenako?
17 Kika kilengela kyakumwenako kuwama? Patanshi, kyafwainwa kwikala mwayila bantu botubena kufunjisha, kasa kibena kwamba pabintu byobakonsha kumvwa. Tuvuluka kuba’mba byakumwenako byavula byaambilenga Yesu byajinga byabintu bimweka mubwikalo bwabantu bamutelekelenga. Kyabubiji, kyakumwenako kyafwainwa kuyilamo nakishinka kyotubena kwamba. Umvwe kechi kyayilamone, kyakonsha kulubankanyatu bantu babena kwikiteleka. Kyabusatu, mukyakumwenako kechi mwafwainwa kwikala byambo byavula byabula kufwainwa mubyobyo bibena kwambiwane. Vulukai kuba’mba Yesu waambilengatu pabyambo byakebewenga nekushapo byabujilenga kukebewa. Kyabuna, umvwe twashimikizha kyakumwenako, twafwainwa kumona kuba’mba twalumbulula bulongo jishinda mokyatala. Mambo ingene, bamo kuba baumvwa mwakwingijishisha kishinka kyaambiwapo mukyakumwenakone.
18. Twakonsha kumona byepi byakumwenako byafwainwa?
18 Twakonsha kumona byepi byakumwenako byafwainwa? Kechi twafwainwa kulanguluka kwamba mashimikila akulolobwelatune. Byakumwenako bipi byakonsha kukwasha bingi bantu. Langulukaitu pabyakumwenako byakonsha kwingila mukyokyo kishinka kyotubena kwisambapo. Kyakumwenako umvwe tubena kwisamba pamutwe wa Lesa byoalekelako bantu mambo, kabiji tubena kukeba kulumbulula kishinka kiji mu Byubilo 3:19, mwaamba’mba Yehoba ‘uzhimañanya’ nangwa’mba ufuuta bilubo byetu. Kino kishinka akyo kinetu keñambilo yakifwanyikizho, pano ñanyi kyakumwenako kine kyotwakonsha kwingijisha kukonkomwena kishinka? Twakonsha kwingijisha fuuta nangwa kimvwambai. Twakonsha kwamba’mba: ‘Yehoba umvwe witulekelako mambo etu kiji nobe watola kimvwambai nekwiashimuna (nangwa kwiafuuta nafuuta).’ Kyapela bingi bantu kumvwa kishinka kiji mukino kyakumwenako.
19, 20. (a) Kwepi kotwakonsha kutana byakumwenako byawama? (b) Ñanyi byakumwenako bimo byafwainwa byanembwa mumabuku etu? (Monai nepakabokoshi.)
19 Kwepi komwakonsha kutana byakumwenako byafwainwa kubikapo nemashimikila akine abwikalo bwabantu? Mwakonsha kwibikeba mubwikalo bwenu anweba bene nangwa munkomeno yapusana-pusana yabantu bakwabo nebyapichilemo bakwenu bamulwitabilo. Kimo kimye mwakonsha kusala mubintu bikwabo kubikapo nebintu bipema nebibula kupema, bipe byamu nzubo, nangwa kintu kimo kyamweka mukimasamasa kyobayuka bavula. Jishinda jafwainwa kumwenamo byakumwenako byafwainwa kekwikala bantu ‘bamona’ bintu byubiwa pajuba pajuba kotwikala. (Byubilo 17:22, 23) Buku umo waamba pañambilo yamvula-bantu amba: “Ñambi umona byubiwa mubwikalo bwabantu nemingilo yabo, wamba kasa ayuka ngikelo yabantu bamutundu yense, umona bintu nekushikisha-shikisha mepuzho posotu wibiyuka, wikala nabyakumwenako byavula bingi byoakonsha kwingijisha umvwe kyakebewa.”
20 Kabiji kuji nejishinda jikwabo jiji nabyakumwenako byavula byafwainwa, twakonsha kwibimona mu Kyamba kya Usopa, Loleni! nemabukutu akwabo anembwa na Bakamonyi bakwa Yehoba. Mwakonsha kuyuka byavula bingi pakumona ano mabuku byoaingijisha byakumwenako bijimo.c Monai kyakumwenako kyaingijishiwa mupalagalafu 11 yakitango 17 mubuku wa Kuyuka. Akye kyakumwenako kyafwanyikizha bantu byobapusana-pusana mukipwilo, kumyotoka yavula yomubena kwendela nayo pamo mumukwakwa. Kika kyalengela kino kyakumwenako kwikala kyafwainwa? Kenamambo akuba kibena kwamba pabintu bimweka mubwikalo bwabantu, kyayilamo bingi nakishinka kibena kwambiwa, kabiji nemwakwikingijishisha mwaumvwanyika. Twakonsha kwingijisha byakumwenako byanembwa mumabuku pakufunjisha, kampe kwibyesakanya kubyomubena kukeba’mba muntu yemubena kufunjisha Baibolo omvwinemo nangwa kampe mwakonsha kwibyamba mujashi.
21. Ñanyi mfweto ifuma mukwikala mufunjishi wawama wa Byambo bya Lesa?
21 Mfweto ifuma mukwikala mufunjishi wawama yavula bingi. Kimye kyotubena kufunjisha, kokuba’mba tubena kupapo bakwetu; twingijishapo bintu byetu bimo kwibakwasha. Kupana kwauno mutundu kuleta lusekelo, mambo Baibolo yaamba’mba: “Lusekelo lo bamona aba bapana lwakila lo bamona aba batambula.” (Byubilo 20:35) Luno lusekelo kubafunjishi ba Byambo bya Lesa kelusekelo lwakuyuka’mba tubena kufunjisha kintu kyakine kabiji kyamyaka—bukine bwa Yehoba. Kabiji tusangalala nepakuyuka’mba tubena kulonda Mufunjishi Mukatampe, Yesu Kilishitu.
[Tubyambo twa mushi]
a Wanembwa na Bakamonyi bakwa Yehoba.
b Monai kibaba kyaamba’mba, “Imitendekele Ya Kubomfya mu Butumikishi bwa mwi Bala,” papeja 9-15.—Wanembwa na Bakamonyi bakwa Yehoba.
c Pakuba’mba mutane byakumwenako, monai mu Watch Tower Publications Index 1986-2000, pamutwe waamba’mba: “Illustrations.”—Wanembwa mumilaka yavula na Bakamonyi bakwa Yehoba.
Mukivulukanyi?
• Twakonsha kufunjisha byepi mubyambo byapela kimye kyotubena kufunjisha lufunjisho lwa Baibolo lwapanzubo, nangwa kimye kyotubena kwamba jashi mukipwilo?
• Twakonsha kushikisha byepi mepuzho afwainwa pakusapwila kunzubo nenzubo?
• Twakonsha kwamba byepi ñambilo yamaana mukukonkomwena byubilo bya Yehoba nemashinda moobila bintu?
• Kwepi kotwakonsha kutana byakumwenako byafwainwa?
[Kitenguluzha/Kipikichala pa peja 31]
Mukivuluka Bino Byakumwenakonyi?
Pano pajipo byakumwenako bimo. Nga mamboka nekutola buku mobyafuma mumone kyakumwenako byokyakwasha kishinka kibena kwambiwa kumvwanyika?
• Pakuba’mba masongola ekale bulongo kikebewa kwikala namukwenu walumbuluka byonka bikwatankana bañomba pakwimba maoma, nebyonka bingijila pamo banabalume babiji babena kupatula bipe mukimbayambaya.—Kyamba kya Usopa, June 1, 2001, peja 12.
• Byonka byotuteshako muchima pakushikula kipe kilajika, nemwanamulume wabwina Kilishitu byobyo afwainwa kubila mukazhanji lusa.—Kuyuka Kutangijila ku Bumi Bwa Myaka, peja 144.
• Kupopwela bapashi kujitu nobe bujo bukebula banyama bubika bibinda mubitewa byabo.—Kuyuka Kutangijila ku Bumi Bwa Myaka, peja 111.
• Sendwe byoawamisha jibiji kipikichala kyanji umvwe bamonawina, ne Yehoba byobyo akebeshatu’mba aketubwezhe jibiji kubwikalo bwajingapo kuntendekelo boakebele atweba kwikelamo.—Kuyuka Kutangijila ku Bumi Bwa Myaka, peja 181.
[Bipikichala pa peja 28]
Bena Kilishitu bakine bafunjishi ba Byambo bya Lesa
[Kipikichala pa peja 29]
Bakulumpe mukipwilo bakonsha kushikisha mepuzho mukukwasha bakwabo bamulwitabilo kutekeneshiwa mu Byambo bya Lesa